प्रेरितून का काम 1 - सोरियाली नय्या नियम

यीशुक ज्यून हुना को सबूत

¹ प्रिय थियुफिलुस, मैंले पैल किताब में उन सब बातुन का बारिमें लिखीना को छै, जो यीशु ले शुरू में कर्यान, और सिखूनै र्यान।

² उ दिन तक जब कि उ परमेश्वरा का द्वारा स्वर्ग में उठा ली ग्योछ। उहै पैलि यीशु ले प्रेरितून, पवित्र आत्मा का द्वारा हुकुम दीछ, जिनून उनूनले खुद चुनिना को छ्यो।

³ यीशु ले अपून दुख उठूना का और मौत का बाद भौत पक्का सबुतून दीभेरन अपून आपस उनून ज्यून दिखाछ। और चालीस दिन तक उनून दिखाई दीनै र्योछ, और परमेश्वर उनार बीच में कसीकैं राज्य करोलो उक बारिमें बात करनै रियोछो।

⁴ एक बार जब उन एक दगाड़ छ्या, त उले उनून हुकुम दीछ, “यरूशलम शैहर स छोड़भेरन जन जाया, लेकिन उ दानो को इन्तजार कर्या जो म्यारा पिता परमेश्वर ले तुमून दीना को वादा कर रैछ, और तुमूले मैंस उक बारिमें बात करून ले सुण रैछ।

⁵ यहूना ले त तुमून पानि में बपतिस्मा दीछ, लेकिन थ्वाड़ा दिनूनका बाद परमेश्वर तुमार दगाड़ रून खिन पवित्र आत्मा भेजाला, ताकि तुमार भितर रौ।”

यीशु मसीह को स्वर्ग खिन जानो

⁶ बाद में जब प्रेरित दुबारा यीशुथैं मिल्यान, त उनूनले उथैं पुछछै, “हे प्रभु, क्या अब तुम रोमी सामराज्य स नाश करन खिन और इस्राएल का राज्य स फिर बनालै?”

⁷ उले उनूनथैं क्योछ, “उ बखत और उ चीज कब होलि, केवल म्योरो पिता परमेश्वरा का पास तय करूना को अधिकार छै, तुमून जाणना की जरूरत नाहातिन।

⁸ लेकिन जब पवित्र आत्मा तुमून में आला, तब तुम सामर्थ पाला। और यरूशलम शैहर और पुर यहूदिया और सामरिया प्रदेश में और पुर संसार में लोगून म्यारा बारिमें बताला।”

⁹ यो कैभेरन यीशु उनार देखन-देखनै परमेश्वर ले ऊस स्वर्ग में उठा लीछ, और बादलून का कारण उन ऊस नै देखी सक्या।

¹⁰ और उक मलि जान बखत जब शिष्य आकाश का तरफ चाँन मरैछ्या, तब अचानक द्वी आदिमी सफेद कपाड़ पैनिना का उनार सामुनि ठाँड़ भ्यान,

¹¹ और कुन लाग्यान, “हे गलीली जिला का लोगों, तुम किलैं याँ ठाड़ हो भेरन आकाश का तरफ चाँन मरैछा? योई यीशु जैस परमेश्वरले स्वर्ग में उठा ली हैछ, उसीकैं उ फिर आलो, जसकैं तुम लोगून ले ऊस स्वर्ग का तरफ जान देखछ्य।”

मत्तियाह स यहूदा को पद मिलून

¹² जब उन द्वी आदिमी न्हैग्या, तब प्रेरित जैतून नामाका पहाण भटे जो यरूशलम शैहर भटे लगभग एक किलोमीटर दूर छै, यरूशलम शैहर में वापस आग्या।

¹³ और जब शैहर में वाँ पुज्यान त उन घरा का दौल में जो प्रेरित वाँ थ्वाड़ा बखत खिन रूकीना का छ्या। उन यो छ्या, पतरस, यहूना, याकूब, अन्द्रियास, फिलिप्पुस, थोमा, बरतोलोमी मत्ती, हलफईक च्योलो याकूब, शमौन जो रोमी सामराज्य का बिरोध में छ्यो और याकूबो को च्योलो यहूदा।

¹⁴ उनार दगाड़ वाँ और ले स्यैनिन छ्या और यीशुक भाई और उकी ईजा मरियम प्रेरितून का दगाड़ एक मन होभेरन प्रार्थना में लाग रूछ्या।

¹⁵ उनी दिनून में जब वाँ लगभग एक सौ बीस विश्वासी लोग जाम छ्या। तब पतरस उनार बीच में ठाड़ है भेरन कुन लागछ,

¹⁶ “हे विश्वासी भाईयो, पवित्र आत्मा ले भौत बखत पैलि राजा दाऊद का द्वारा यहूदाका बारिमें पैलि भटे कईनाकों छ्यो, यो यहूदा यीशु स पकड़ून वाला लोगून की अगुवाई करून वालान में भटे एक छ्यो। यो जरूरी छ्यो कि उक बारिमें पवित्रशास्त्र में लिखीना की बात पुरी हो।

¹⁷ हालाकि उ त हमून में भटे एक छ्यो, और उ यो सेवा का काम में ले हमोरो दगड़िया छ्यो।

¹⁸ जसो कि तुम जाणछा, कि यहूदा ले यीशु स ध्‍वाका ले पकड़िनाक रूपयान ले एक गडो मोल लीछ। और वाँ उ ख्वारा का बल भिमें खिती ग्यो, और मर ग्यो और उको पेट फाटि ग्यो और उक सब अनाड़ा-पाताड़ा भ्यार निकली ग्या।

¹⁹ जो यहूदा का दगाड़ भ्योछ उ यरूशलम शैहरा का रूनवाला सब लोग जाणि ग्या, और येक कारण उन लोग उ जाग स अपूनी भाषा में ‘हकलदमा’ मतलब ‘खूनी गड़ो’ कुन लाग्यान।

²⁰ राजा दाऊद भजन संहिता की किताब में लिखछो, ‘उको घर उजड़ जालो, और उमें कोई नी बश,’ दाऊद दुसारा जाग यो ले कुंछो, ‘कोई दुसोरो उको पद लीले।’

^21-22 येक कारण यो जरूरी छै कि हमार दगाड़ जुड़ून खिन एक इसा आदिमी स चुनी जौ, जो प्रभु यीशुक मरिना में भटे ज्यून हूनाक गवा बनो। उ हर बखत हमार दगाड़ रईना को हो जब प्रभु यीशु हमार दगाड़ छ्यो, उ बखत भटे जब प्रभु यीशु मसीह स यहूना का द्वारा बपतिस्मा दी जान भटे लीभेरन स्वर्ग में उठाई लीई जान तक।”

²³ तब उनूनले द्वी आदिमीन को नामको सुझाव दीछ, पैल यूसुफस जैथैं बरसब्बा ले कुंनान, जैको खानदानी नाम यूस्तुस छै, दुसोरो मत्तियाह को।

²⁴ और यो कैभेरन प्रार्थना करछ्य, “हे प्रभु, तुम सब लोगून का दिल स जाणछा, येक कारण तुम हमून बता इन द्वीवैन में भटे तुमून ले कैस चुन छै,

²⁵ कि उ यो सेवा काम में और प्रेरिताक उ खाली पद समालो। यहूदा उ जाग में न्हैग्यो जो उखिन उचित छ्यो।”

²⁶ तब उनूनले उन द्वीवैन की नामेंकी परची डालछ्य, तब परची मत्तियाहाक नामेंकी निकलछ, और उ उन इग्यार प्रेरितून का दगाड़ शामिल कर ली ग्यो।