2 तीमुथियुस 3 - सोरियाली नय्या नियम

आखरी दिनून खिन चेतावनी

¹ तीमुथियुस जो बात मैं अब तैथैं कुछूँ, ऊस ध्यान ले सुण कि आखरी दिनून में यीशु मसीह का वापस उना है पैलि भौत बुरो बखत आलो।

² क्याखिनकि लोग अपून बारिमें सोचाला, और धना क लोभी, डीगमार, घमंडी, और दुसरान को बुराई करूनवाला और ईजा-बाबको हुकुम नै मानून वाला, एसान नै मानूनवाला और अपवित्र,

³ निर्दयी, माफ नै करनवालो, दोष लगूनवाला, अपून आप में काबू नै राखून वाला, जालिम, भलाई भटे बैर राखून वाला,

⁴ विश्वासघात करून वला, ढीठ, अभिमानी, और परमेश्वरा का नै बल्कि सुख-विलास का चानवाला होलो।

⁵ उन इसो दिखावा कराला, जसीकैं उन परमेश्वरा का भक्त करनान, लेकिन उन परमेश्वर की सामर्थ स नी मानाला, इसा लोगून है बचभेरन रया।

⁶ इनून में भटे कुछ लोग उन छन, जो पुर परिवारून ध्वाका दीनान, और मूर्ख स्यैनिन अपून वश में कर लीनान जो अपून पापून का बोझ ले दब भेरन हर प्रकार का बुरी इच्छान वश में छन।

⁷ उन हमेशा नय्या चीज सिखनै रूनान, लेकिन मसीह का बारिमें सच्ची शिक्षान कभै नै समझ सकना।

⁸ इन झूठ्ठा शिक्षक छन, जो मसीह का बारिमें सच्ची बात बतून है रोकना की कोशिश करनान, जसीकैं यन्नेस और यम्ब्रेस ले मूसा को विरोध करछ्य, उसीकैं उनेरि बुद्धि ले भ्रष्ट हो गैछ। और उन सच्ची में मसीह में विश्वास नै करना।

⁹ उन ज्यादा लम्बा बखत तक लोगून ध्वाका नी दी पान। क्याखिनकि, जसीकैं लोगून ले जाण लीछ की यन्नेस और यम्ब्रेस मूर्ख छ्या, उसीकैं हरेक लोग जाण ल्याला कि उन मूर्ख छन।

तीमुथियुस स खास हुकुम

¹⁰ लेकिन हे तीमुथियुस, तैं निकीकैं जाण छै कि मैं कि सिखूछूँ, और कसा तरीका ले जीछूँ, जीवन में म्योरो की मक्शद छै और म्योरो कसो विश्वास छै। और तैं जाण छै कि मैं धीरज राखछूँ, और सब लोगून प्रेम करछूँ, मैंले दुखून सहन करछ्य।

¹¹ तैं उन भयानक मुसीबतून का बारिमें जाण छै जो लोगून ले म्यारा दगाड़ अन्ताकिया, इकुनियुम, और लुस्त्रा शैहरून करछ्य, और मैंले वाँ कसीकैं सताव सहन करछ्य। मैंले इसा अत्याचार सहन करछ्य, लेकिन प्रभु ले सब बातुन में मेरि रक्षा करनै रयान।

¹² यो बात सच्ची छै कि जो यीशु मसीह में सच्चाई जीन्दगी जीनो को फैसला करनान, उन सब में जुल्म होला।

¹³ लेकिन दुष्ट लोग और उन ध्वाकाबाज लोग और ले ज्यादा बुरा काम कराला। उन लोगून ध्वाका द्याला और खुद ले दुसरान थैं है ध्वाका खाला।

¹⁴ पर हे तीमुथियुस, इन बातुन में हमूले तैंस सिखायान और जिनूनमें तैं विश्वास ले करछ्य, और तैं लगातार इन बातुन में विश्वास ले अमल करूनै रौ; क्याखिनकि तैं जाण छै कि तैंस यो सच्चाई कैले बताछ।

¹⁵ और नानछना भटे तैं पवित्रशास्त्र जाण छै, और यो तैंस मुक्ति को ज्ञान दी सकछो, जो तैंस मसीह यीशु में विश्वास करूना का द्वारा मिलछो।

¹⁶ पुरो पवित्रशास्त्र परमेश्वरा का प्रेरणा द्वारा लिखीना को छै। यो लोगून सिखून खिन, डाट-फटकार लगून खिन, गलतिन सुधारून खिन और उनून सिखून खिन हमून खिन फैदामन्द छै।

¹⁷ ताकि परमेश्वर की सेवा करूनवाला आदिमी सिद्ध बनून और हर प्रकारा भल कामून करून खिन तैयार होज्यौ।