2 पतरस 2 - सोरियाली नय्या नियम

झूठ्ठा शिक्षक

¹ जसा तरीका ले तुम भौत पैलि झूठ्ठा संदेश दीन वाला लोग इस्राएली लोगून का बीच में दिखाई दीईयान, उसीकैं तुमार बीच में झूठ्ठा शिक्षा दीन वाला दिखाई द्याला। उन झूठ्ठी शिक्षान चुपचाप ले फैला द्याला, जो लोगून मसीह में विश्वास करून है रोक देली। यो झूठ्ठा शिक्षा दीन वाला मसीह स अपून स्वामी मानून है ले इन्कार कर द्याला जो उनोरो मालिक छै और जैले उनून पाप की शक्ति है आजाद करिना को छै। इसीकैं उन अपनास अचानक नाश करवा द्याला।

² भौतसा लोग जो कुंनान कि उ विश्वासी छन, उन इन झूठ्ठा शिक्षकून का बुरा कामून की नकल कराला, और दुसरा लोग जो विश्वासी नाहातिन, उन परमेश्वरा का तरफ जानवाला बाटा का बारिमें बुरा-बुरा बातुन कराला।

³ इन सिखून वाला लालची होला, और उन बनि-बनाई कहानीन सुणाभेरन तुमून ध्वाका द्याला ताकि तुमूनथैं चीजून प्राप्त कर सकून। परमेश्वरे ले भौत बखत पैलि फैसला कर हलछ्यो कि उ उनून सजा द्याला और उन करून खिन तैयार छन। उन जरूर उनून नाश कर द्याला।

झूठ्ठा शिक्षकून को न्याय

⁴ तुम जाणछा कि भौत बखत पैलि जब थ्वाड़ा दुष्ट दूतून ले परमेश्वरोको हुकुम नै मानियो, तो उले उनून उनार करिना की सजा दीछ। उले उनून नरक में खित दीछ, और उनून अन्यारा कैद में उ दिन तक राखि ग्योछ जब की उन न्याय का दिन कि इन्तजार करनान जब उनून उ सजा मिलेलि जैका उन लायक छन।

⁵ तुम यो ले जाणछा कि जब भौत बखत पैलि रूनवाला लोगून ले परमेश्वरो को डर नै मानो त परमेश्वरे ले उन लोगून का बुरा कामून नजर अंदाज नै कर्यो जो उन करन मर्यछ्या। बल्कि उले पुरी धरती स भरून खिन पानि भेजभेरन उनून इसी सजा दीछ कि उन सब डूब ग्या और नाश हो ग्या। लेकिन उले नूह समेत उन आठ लोगून बचाछ, जिनूनले परमेश्वरो को दगाड़ सही हुना का बारिमें प्रचार करिनाको छ्यो।

⁶ और तुम यो ले जाणछा कि भौत बखत पैलि परमेश्वरे ले सदोम और अमोरा का शैहरून में रूनवाला लोगून दण्डित करछ्य किलैकी उनूनले बुरा काम करिनाको छ्यो। येक कारण उले उनून पुरी तरीकाले आग में भस्म कर दीछ और राख हो ग्या। इसो करभेरन उले दिखाछ कि उन लोगून की होलो जो उको डर नै मानना।

⁷ लेकिन यैहै पैलि की उले सदोम शैहर स विनाश करछ्य, त परमेश्वरे ले लूत स जो एक धर्मी आदिमी छ्यो, ऊस शैहर भटे निकाल दीछ और इसीकैं ऊस बचा लीछ। लूत भौत दुखी छ्यो किलैकी सदोम शैहरा का लोग कोई ले नियम स नै मानछ्या और बेशर्मी का काम करछ्या।

⁸ उ उन बुरा लोगून का बीच रूछ्यो, और उ हरेक दिन उन बुरा कामून देख छ्यो जो उन करछ्या और उन बुरा बातुन सुणछ्यो जो उन बोल छ्या, और यो सब ऊस भौत परेशान करछ्यो, किलैकी उ एक धर्मी आदिमी छ्यो।

⁹ जब की परमेश्वरे ले इन सारी चीजून कर रैछ, त यैले पत्तो चलछो कि उ जाणछो कि अपून लोगून उनार दुखून भटे कसकैं छुड़ून छै, और यो ले जाण छै कि कसा बुरा लोगून न्याय दिन तक लगातार सजा दिन छै।

¹⁰ परमेश्वर सब दुष्ट लोगून सजा द्योलो, लेकिन उ उन झूठ्ठा शिक्षकून जरूर सजा द्योलो जो अपून बुरा इच्छान का अनुसार काम करनान और जो अपून मलि में परमेश्वरो को अधिकार स अस्वीकार करनान। उन ढीठ और घमंडी छन। उन महिमामय स्वर्गदूतून का बारिमें बुरा बोलना ले नै डरनान।

¹¹ लेकिन याँ तक कि स्वर्गदूत जो इन झूठ्ठा शिक्षकून है कई ज्यादा सामर्थी और शक्तिशाली छन, उन ले उनोरो अपमान नै करना जब उन परमेश्वरा का सामुनि उनूनमें दोष लगूनान।

¹² लेकिन इन झूठ्ठा शिक्षक जानवरून का नियाती छन। इन जानवरून पत्तो नाहातिन कि कसो सोचून छै और इनोरो मक्शद केवल पकड़ून और मार डालून छै। इन लोग केले करनान जो इनारा मन में उछो, और याँ तक कि इन उन चीजून की बुराई करनान जो इनून समझ ले नै उनी। उन जरूर इन जानवरून की नियाती नाश हो जाला।

¹³ उनोरो विनाश उ नुकसानो को ईनाम छै जो उनूनले करछ्य। उनून छकाला दिन तक बुरा सुख-विलास में पड़ीनाको रून पसन्द करनान। उन तुमार बीच एक कलंक और दाग छन और तुम लोगून का दगाड़ खान-पिन बखत उनून कपटी बात करून में खुशी हुछी।

¹⁴ उन हरेक स्यैनि का दगाड़ व्यभिचार करून चानान, जैस उन देखनान। उन पाप करनाको मौको खोजनै रूनान उन-उन लोगून ध्वाका दीनान जिनोरो मसीह में विश्वास कमजोर छै, और उन उनून पाप का तरफ लिजानान। उनेरि ज्यादा है ज्यादा चीजून प्राप्त करना को हमेशा बढ़नै रून वाली इच्छा का कारण परमेश्वर उनून दण्ड द्योलो।

¹⁵ उनूनले निका काम करून छोड़ दीयान, और उनूनले उसीकैं बुरा काम करून शुरू कर दीयान, जो कि बओर का च्याला बिलाम ले भौत बखत पैलि करिना को छ्यो। ऊस गलत काम करभेरन पैसा कमून निको लागछ्यो।

¹⁶ लेकिन परमेश्वरेले बिलाम स उक बुरा कामून खिन उकी गधी का द्वारा फटकार लगवाछ। चाहे गदीन बोलना नै लेकिन ऊस गधी ले बिलाम स एक इन्सान की नियाती बात करछ्य, जब उ बिलाम स राजा थैं मिलून खिन लादभेरन ली जानमरेछी, और उले उ बखत परमेश्वरा का संदेश दिनवाला बिलाम स बेवकूफी भरिना को काम करून है रोक छै।

¹⁷ इन झूठ्ठा शिक्षक उन पानि का झरना का नियाती बेकार छन, जो सुख ग्यान। उन निराश करूनवाला बादलून की नियाती छन, जिनून तेज हवा उड़ाभेरन ली जाँछी। परमेश्वरे ले उनून खिन एक इसी जाग तैयार करछ्य जो पुरी तरीकाले अन्यारो छै।

झूठ्ठा शिक्षकून को ध्वाका

¹⁸ जब झूठ्ठा शिक्षक लोगून शिक्षा दीनान, तो उन बेकार और घमण्ड ले भरिना क शब्दून को इस्तमाल करनान। उन लोगून बतुनान कि उन-उन बेशर्मी का कामून कर सकनान जो उनार शरीर करून चानान और उन लोगून फिर पाप करून खिन भरमा दीनान जो यैले-यैले इसा बुराई का जीवन ले बचभेरन निकलनान।

¹⁹ उन लोगून बतुनान कि उन जो केले करून चानान उ खिन आजाद छन, हालाँकि उन खुद गुलामून की नियाती छन किलैकी उनोरो अपूनो पापी स्वभाव उनूनले बुरा काम करून खिन मजबूर करनान। किलैकी जो केले तुमून अपून वश में करछो, तुम उक दास बन जाछा

²⁰ जब लोगून ले प्रभु यीशु मसीह स अपून प्रभु और मुक्तिदाता मान हलछ्यो, तब प्रभु ले उनून यो संसारै की बुराई भटे बचा हलछ्यो। लेकिन अब एक बार फिर उन बुरा कामून में फंस ग्यान और उन बुरा काम अब उनून अपून वश में करनान, येक कारण अब मसीह स अस्वीकार कर दिनाका बाद उनेरि दशा उनार विश्वासी बनून है पैलिक दशा है ले बुरी हो गै।

²¹ मेरो कुनानको मतलब यो छै, कि परमेश्वर उन लोगून जिनूनले यीशु मसीह स कभै स्वीकार नै कर्यो, उनून सजा त द्योलोई, लेकिन उनून त भौत कड़ी सजा द्योलो जिनूनले यीशु मसीह स्वीकार करभेरन छोड़ दीछ। उनूनखिन निको हुनो अगर उन कभै यो जाणनाई नै कि अपून जीवन स धर्मी तरीकाले चलूना को कि अर्थ हुछो। अब उन जाणना कि सही कि छै लेकिन उनूनले परमेश्वरेकि उन हुकमून को पालन करून छोड़ दीछ, जो हम, प्रेरितूनले उनून दी गैछी।

²² उनूनले जो करछ्य, बिल्कुल उई बात इन द्वी कहावत कुछी, “कुकुर उलटी करछो, और फिर ऊस खा लीछो।” और “जब कोई आदिमी एक सूअर स नहवा दीछो, त वह सूअर फिर है कीचड़ में पड़ून खिन न्हैजाछो।”