2 पतरस 1 - सोरियाली नय्या नियम

स्वागत

¹ मैं, शमौन पतरस, जो यीशु मसीह को प्रेरित छूँ। मैं यो चिठ्ठी तुम सबून खिन लिखूनमरयूँ जो उ कीमती विश्वास स साझा करछा जो हमून में छै, उ विश्वास जो हमार परमेश्वर और मुक्तिदाता यीशु मसीह का द्वारा हमून दीईना को छै, जो हमून परमेश्वरा का दगाड़ सही ठैहरछो।

² मैं प्रार्थना करछूँ कि परमेश्वर में तुमून ज्यादा है ज्यादा अनुग्रह और शान्ति मिलो जसकैं तुम परमेश्वर और हमार प्रभु यीशु का ज्ञान में बढ़छा।

स्वर्गीय बुलाहट और चुनाव

³ परमेश्वर ले अपून सामर्थ का द्वारा हमून उ सब कुछ दीछ जो हमून एक इसो जीवन जीन खिन चैछो जो परमेश्वरेस खुश करछो। यो हो सकछो किलैकी हम परमेश्वरेस जाणनू और उ उई छै जैले हमून अपूनी महिमा और भलाई का द्वारा अपून लोग हुन खिन बुला रैछ।

⁴ और उकी महिमा और भलाई का कारण, उले हमून भौत महान और अनमोल बरदान दीयान, जैको उले वादा करिना को छ्यो, ये इसा वादा छन जो तुमून संसारै की बुरी इच्छान भटे बचुन में ताकतवर बनुनान, इन बुरी इच्छान पुरी करूनवाला उन लोग छन जो मसीह में विश्वास नै करना, और तुम परमेश्वरा का नियाती निका चाल-चलन में भागीदार बन गैछा।

⁵ क्याखिनकि तुम परमेश्वरा का स्वभाव में सहभागी हुन खिन छा, येक कारण तुमून केवल मसीह में विश्वास करून चैछो, बल्कि तुमून हमेशा उई करूनो कोशिश करून चैछो जो दुसरान खिन ठीक छै। तुमून नै सिर्फ उई करून चैछो जो ठीक छै पर तुमून इसो हुन चैछो जो जाणनान की कसीकैं समझदारी ले ब्यवहार करूनो चैछो।

⁶ तुमून केवल योई नै जाणून चैनो कि कसीकैं दुसरान का दगाड़ समझदारी ले ब्यवहार करून छै, तुमून सिर्फ अपून में काबू नै राखून चैछो बल्कि तुमून मुसीबत में ले धैर्य ले राखून चैछो, तुमून सिर्फ धैर्य नै राखून चैनो, बल्कि तुमून इसीकैं जीवन जीनो ले चैछो जो परमेश्वरेस खुश करछो।

⁷ तुमून सिर्फ इसीकैं जीवनई नै जीना चैनो जो परमेश्वरेस खुश करछो, बल्कि तुमून विश्वासीन अपून परिवारा का लोगून की नियाती प्रेम करून चैछो, और तुमून सिर्फ विश्वासीन का दगाड़ अपून परिवारक लोगून का नियाती प्रेम करूनो चैछो, बल्कि तुमून सब लोगून प्रेम करून चैछो।

⁸ अगर तुम हमेशा इसीकैं जीवन जीछा त यो तुमार फैदा खिन छै, और इसो जीवन प्रभु यीशु मसीह का ज्ञान में बढ़ून खिन मद्दत करछो।

⁹ लेकिन अगर कोई आदिमी इस तरीका ले जीवन नै जीनो त उ एक इसा आदिमी नियाती छै जो निकीकैं नै देख सकनो। वह भूल ग्योछ कि परमेश्वरेले ऊस उन पापून खिन माफ कर दीछ जो उले मसीह में विश्वास करून है पैलि करिना का छ्या।

¹⁰ येक कारण हे म्यारा विश्वासी भाईयो, अपूनास और दुसरा लोगून यो देखून खिन और ले निका ब्यवहार करना की कोशिश करा कि परमेश्वरेले सच्ची में तुमून चुनिना को छै और तुमून अपून लोग हुन खिन बुला रैछ। अगर तुम इसो करला त तुम जरूर परमेश्वर है अलग नी होला।

¹¹ और यो कि परमेश्वर उ राज्य में बड़ी खुशी ले तुमोरो स्वागत करलो जाँ यीशु मसीह छै, जो हमोरो प्रभु और हमोरो मुक्तिदाता छै, और उ हमेशा खिन राजा का रूप में राज्य करोलो।

पतरसो को आखरी बखत

¹² हालाकि तुम पैलि भटे इन बातुन जाणछा और जो सच्ची शिक्षा तुमून मसीह का बारिमें मिलीना की छै ऊस मजबूती ले पकड़ भेरन रौ, जो लोगून ले तुमून दीईना की छै, मैं तुमून उनार बारिमें लगातार याद दिलूनै रूलो।

^13-14 हमार प्रभु यीशु मसीह ले मैंस साफ बाता हैछ कि मैं जल्दी मर जूलो। येक कारण मैंस लागछो कि मैंखिन यो सही छै कि जब की मैं एल ले ज्यूनो छूँ त मैं तुमून इन चीजून की याद दिलूनै रूँ।

¹⁵ येक कारण मैं इन बातुन एल लिखना का द्वारा तुमून यो बातुन बतून खिन भौत मेहनत करनमर्यू, ताकि मेरि मौता का बाद तुम हर बखत इन बातुन याद राख सका।

मसीह की महिमा ककी आँखान ले देखीना का गवा

¹⁶ किलैकी जब हम प्रेरितून ले तुमून हमार प्रभु यीशु मसीह की सामर्थ और वापस उनाक बारिमें बताछ, त हम तुमून चतुराई ले के बनाईना कहानी नै बतून मरैछ्या। बल्कि, हमूनले मसीह को महिमा अपूनी आँखान ले देखीना को छ्यो।

^17-18 हम उ पवित्र पहाड़ में उक दगाड़ छ्या जब उले पिता परमेश्वरा का द्वारा सम्मान और महिमा दी गैछी। त हमूले उ बखत परमपिता परमेश्वरै की तरफ भटे यो आवाज सुणछ्य, “यो म्येरो प्रिय च्योलो छै, जै भटे मैं खुश छूँ। हमूले खुद स्वर्ग भटे ऊँन वाली यो आवाज स सुणछ्य।”

¹⁹ हम यो ले जाणनू कि मसीह का बारिमें परमेश्वरो को संदेश दिनवाला लोगून ले जो बचन लिखीना का छ्या, उन बिल्कुल सच्चा छन, और जो हमूले तुमून उक वापस उनाक बारिमें सिखाईना का छ्या उन उकी पुष्टि करनान। तुमून उन बचनून निकीकैं सुणूनो चैछो, किलैकी जसा तरीका ले अन्यारा में जलूनो वालो दीया लोगून सही बाँट देखून में मद्दत करछो, उसीकैं यो बचन तुमून यो जाणून में मद्दत करोलो कि सत्य कि छै। हमार प्रभु यीशु मसीह का वापस ऊँन तक तुमून उन बचनून निकीकैं सुणून चैछो। उको वापस ऊँनो नय्या दीनो को रातैनि को जसो उज्यालो लागोलो, और उन रात ब्यान को तारा को जसो होलो। उ बखत उको उज्यालो तुमार दिलून में चमकोलो और तुमार सामुनि परमेश्वर साफ तरीका ले प्रकट करोलो।

²⁰ लेकिन सबून है खास बात यो छै कि तुम समझछा कि कोई ले अपूनी योग्यता ले परमेश्वर की भविष्यद्वाणी स समझूना क योग्य नाहातिन जो पवित्रशास्त्र में दीईना की छै।

²¹ किलैकी पवित्रशास्त्र में दीईना कोई ले भविष्यद्वाणी कभै ले आदिमी का द्वारा नै हुनी। लेकिन पवित्र आत्मा ले लोगून का मनून तैयार करछ्य, जब उनूनले परमेश्वरा का तरफ भटे आईना का संदेश स बोलछ्य।