2 कुरिन्थियून 9 - सोरियाली नय्या नियम

दगड़िया मसीह लोगून खिन मद्दत

¹ अब यरूशलम शैहरा का विश्वासीन की मण्डली स दान दीना की सेवा का बारिमें तुमून लिखूनो जरूरी नाहातिन।

² किलैकी मैं येका बारिमें तुमेरि निकी नीयत स जाणछूँ। मैं मकिदुनिया प्रदेशा का रूनवालान थैं यो कुंन में गर्व करछूँ कि तुम अखया प्रदेशा का लोग पोरा साल भटे तैयार भ्यान। तुमार हौंसला ले भौतून प्रेरणा मिलछ्य।

³ मैं इन तीन विश्वासी भाईन येक कारण भेजूनमरयूँ कि हमूले जो गर्व तुमार बारिमें करछ्य, उ यो बात में खोखला नै ठहरून; लेकिन जैसो मैंले क्योछ, कि तुम यरूशलम शैहर में विश्वासीन खिन दान दीन खिन तैयार रौ।

⁴ काँई इसो नै हो कि कुछ मकिदुनिया प्रदेशा का निवासी म्यारा दगाड़ आभेरन यो देखून कि तुम दान दीन खिन तैयार नाहातिन, त हो सकछो, कि यो भरोसा का कारण हमोरो अपमान हो, लेकिन तुमोरो येहै ले ज्यादा अपमान होलो।

⁵ येक कारण मैंले यो जरूरी समझछ्य कि मैं विश्वासी भाईन थैं यो बिनती करूँ कि उन पैलि तुमार पास न्हैजून और इसो इंतजाम करून कि तुमूले दान दीना को जो वादा करिना को छै, उ म्यारा पुजून है पैलि जामा हो और उ दान तुमेरि जोर-जबरदस्ती ले नै, बल्कि तुमेरि निकी नीयत ले हो।

दान कसीकैं दीनो चैछो

⁶ यो बात को ध्‍यान राखा कि जो थ्वाड़ बूछो, उ थ्वाड़ काटोलो; और जो भौत बूछो, उ भौत काटछो।

⁷ हरेक ले अपून मन में जतुक ठान ले, उतुकै दान दे। उ नै कुण-कुणा भेरन, और नै दबाव ले, किलैकी “परमेश्वर खुशी ले दान दीन वालान प्रेम करछो।”

⁸ परमेश्वर सब प्रकार को अनुग्रह तुमून जरूरत है ज्यादा दी सकछो। जैले हर बात में और हर बखत, सब कुछ, जो तुमून जरूरत होलि, तुमार पास रौ, ताकि तुमार पास उहै निको काम करून खिन ले तुमार पास भौत कुछ बच जालो।

⁹ जसो पवित्रशास्त्र में लिखीना को छै, “परमेश्वर जरूरतमंद लोगून जरूरत है ज्यादा दीछो, उकी धार्मिकता हमेशा बनिना की रोलि।”

¹⁰ परमेश्वरै छै जो किसान खिन बी और फिर खान खिन रोटो दीछो। उसीकैं, तुमार पास जो छै ऊस परमेश्वर बढ़ालो, ताकि तुम जरूरतमंद लोगून की और ले मद्दत कर सका।

¹¹ तुमून हर तरीका ले आशीष मिलेली, ताकि तुम हमेशा खुला दिल ले दान दी सका। जब हम तुमार दीईना का दान ले गरीब लोगून की मद्दत करला, त उन लोग परमेश्वरो को धन्यवाद कराला।

¹² किलैकी यो सेवा स पुरो करूना ले, नै केवल परमेश्वरा लोगून की जरूरत पुरी होलि, लेकिन लोगून का तरफ भटे परमेश्वरो को भौत धन्यबाद हुछो।

¹³ किलैंकी यो दान दीना की सेवकाई ले साबित होलो कि तुम सच्चा छा और भौत सारा लोग परमेश्वरै की महिमा कराला, किलैंकी तुमूनले यो मानिना को छै कि मसीह को सुसमाचार सत्य छै और अब उको पालन ले करछा और निका तरीकाले सब गरीब विश्वासीन की और सब विश्वासीन की दिलेरी मद्दत ले करनै रूछा।

¹⁴ उन तुमून खिन परमेश्वर थैं प्रार्थना कराला। उन तुमून प्रेम करनान, किलैकी उन जाणनान कि परमेश्वरेले तुम लोगून में कतुक अनुग्रह करिना को छै।

¹⁵ आखरी में, हम सबून परमेश्वरो को धन्यवाद करून चैछो किलैकी उले हमून सबून है ठूलो ईनाम दीछ, जब उले अपून च्याला स हमार पापून खिन दण्ड दीछ। जैको शब्दून में बयान नै करि जा सकूनो।