2 कुरिन्थियून 8 - सोरियाली नय्या नियम

खुशी ले दान दिन

¹ अब हे म्यारा विश्वासी भाईयो, मैं तुम लोगून उ अनुग्रह का बारिमें बतूनो चाछूँ, जैस परमेश्वरेले मकिदुनिया प्रदेशा का विश्वासीन की मण्डली में दीछ।

² जब उनून भौत सी परेशानीन ले उनून परखी ग्यो, त उन भौत खुश भ्यान उन भौत गरीब छ्या और उनूनले दुसारा विश्वासीन की मद्दत करून खिन खुशी ले दान दीयान।

³ और उनार बारिमें मेरि यो गवाई छै, कि उनूनले नै केवल उतुकै दीछ, जो उनूथैं हो सकछ्यो लेकिन उहै कई ज्यादा, यो उनूनले अपूनी इच्छा ले दीछ।

⁴ उनूनले त हमूनथैं भौत बिनती करभेरन मैंथैं अनुमति माँगछ्य कि उनूनले यरूशलम शैहरा का विश्वासीन की मद्दत खिन सेवा-काम में भाग लीना को मौक मिलो।

⁵ हमूले नी सोचीना को छ्यो उन इस तरीका ले दान दी सकनान, सबून है पैलि उनूनले खुद स प्रभु की सेवा खिन समर्पित कर दीछ। उक बाद उनूनले खुद स परमेश्वरा का इच्छा ले हमार बाताईना का अनुसार चलून खिन समर्पित कर दीछ।

⁶ येक कारण हमूले तीतुस स समझाछ, कि जसो उले पैलि शुरू करिना को छ्यो, ऊसोई तुमार बीच में यो दान का काम स पुर ले कर ली।

⁷ लेकिन जसो तुम हर बात में विश्वास, बचन में ज्ञान और हर तरीका को प्रयास, और उ प्रेम में, जो हमून खिन राखछा, बढ़नै जानू, उसीकैं अब गरीब विश्वासीन की आर्थिक मद्दत खिन ले बढ़नै जा।

⁸ मैं तुमून कोई हुकुम नै दीनू, बल्‍कि दुसरा लोगून का हौंसला को उदारण दीभेरन मैं तुमार प्रेम की सच्‍चाई की परीक्षा लीन चानू।

⁹ तुम हमार प्रभु यीशु मसीह को अनुग्रह जाणछा, कि उ अमीर होभेरन ले तुमून खिन कंगाल बनग्यो ताकि उक कंगाल हुना तुम अमीर हो ज्या।

^10-11 पोरा साल तुम दान दीन वालान में भटे पैला छ्या बल्कि इसो करना की इच्छा ले राख छ्या। यो बात में मेरि सलाह यो छै; और यो मामला में तुमून खिन सबून है निको यो छै कि जो काम तुमूले पोरा साला शुरू करिना को छ्यो ऊस पुर ले करा, जैकी योजना तुमूले खुद बनाई की छी। यो काम स पुर करून खिन अपूनी उ कमाई और ताकतले करा, और यो शुरू करून खिन तुमार पास बखत छै।

¹² अगर तुम दान दीन खिन तैयार छा त जो केले तुमार पास छै, उक अनुसार केले दीई जौ, उ परमेश्वरेस ग्रहण हुछो। कैंथैं यो आश नै करि जा सकूनो कि उ अपूनी समता है ज्यादा दान दे।

¹³ इसो नाहातिन कि तुमून दुसारा लोगून की जरूरतून में मद्दत करून चैछो और अपूनास मुसीबत में डालूनो चैछो। म्येरो मक्शद छै कि तुमोरो जीवन एक समान हो।

¹⁴ यो बखत त तुमेरि बढ़ोतरी उनेरि जरूरत पुरी करून खिन भौत छै, कभै यो ले सम्भव छै कि तुमून खुद स कैकी मद्दत की जरूरत छै और उ अपूनी बढ़ोतरी में ले तुमेरि मद्दत करा। तब द्वीवै पक्ष एक जसो हो जाला।

¹⁵ जसो पवित्रशास्त्र में लिखीना को छै, “जैले भौत ज्यादा जाम कर लीछ उले केले ज्यादा नै पायो। और जैले कम जामा करछ्य, उले केले कमी स महसूस नै कर्यो।”

तीतुस और उका दगड़िया

¹⁶ परमेश्वरोको धन्यबाद हो, जैले तुमार बारिमें उई चिन्ता तीतुस का मन डालछ्य, जो मैंमें छी।

¹⁷ जब हमूले उथैं तुमूनथैं मिलून खिन क्योछ, त उले नै केवल हमरि यो बिनती स्वीकार करछ्य, बल्कि उ बड़ा जोश ले अपूनी इच्छा ले तुमार पास आछ।

¹⁸ और हमूले उक दगाड़ दुसरा विश्वासी भाईन ले भेज रैछ, जैको नाम सुसमाचार प्रचार करून खिन विश्वासीन की मण्डली में फैलीना को छै।

¹⁹ और इतुकै नै, लेकिन उ विश्वासीन की मण्डली का द्वारा चुनी ग्योछ कि यो दाने स काम खिन हमार दगाड़ जौ और हम यो सेवा येक कारण करनू, कि प्रभु की महिमा और यो देखून खिन कि हम यरूशलम में विश्वासीन की मद्दत करून खिन उत्सुक छा।

²⁰ हम यो बात में सतर्क रूनू कि तीतुस का दगाड़ उ विश्वासी स भेजना ले यो मद्दत की धन को इंतजाम करूना की सेवा में कैसे हम में आँगूलो उठूना को मौका नै मिलो।

²¹ हमोरो मक्शद उई करना छै जो नै केवल प्रभु का नजरून में, बल्कि लोगून का नजरून में ले सही हो।

²² इन द्वीवैन का दगाड़ हम अपून एक और विश्वासी भाई स भेजून मर्या। जैस हमूले बार-बार परख रैछ उ हमेशा मद्दत करून खिन भौत उत्सुक छै; लेकिन अब तुमूनमें ऊस भौत भरोसा छै, त उ मद्दत करून खिन और ले ज्यादा उत्सुक छै।

²³ अगर कोई तीतुस का बारिमें पुछो, त उ म्येरो दगड़िया, और तुमून खिन म्येरो सहकर्मी छै, और अगर हमार विश्वासी भाईन का बारिमें पुछून, त उन विश्वासी की मण्डली खिन भेजिना का और मसीह को सम्मान करनान।

²⁴ येक कारण उनून अपूनो प्रेम दिखाया, और विश्वासीन की मण्डलीन में साबित करा कि तुमार बारिमें हमोरो घमण्ड सच्ची छै।