2 कुरिन्थियून 6 - सोरियाली नय्या नियम

¹ परमेश्वरा का सहकर्मी हुना का नाता हम तुम लोगून थैं यो बिनती करनू कि परमेश्वरो को जो अनुग्रह तुमूनमें होईना को छै, ऊस बेकार नै हुन दी;

² किलैकी पवित्रशास्त्र में परमेश्वरेले क्योछ, “ठीक बखत में मैंले तेरि प्रार्थना सुणलीछ, और उद्धार का दिन मैंले तेरि मद्दत करछ्य।” सुणा; ऐल योई उ ठीक बखत छै। देखा, ऐल उद्धार को दिन छै।

³ परमेश्वरा सहकर्मी हुना का नाता हम कैसे ले के बात में ठोकर खाना को कोई ले मौका नै दीनो, ताकि हमरि सेवा में कोई ले दोष नै अ।

⁴ लेकिन हर बात में हम यो साबित करनू कि हम परमेश्वरा का सच्चा सेवक छा। हम अपून निका गुणून दिखाभेरन, दुखून, क्लेशून, गरीबी और संकटून बड़ी हिम्मत का दगाड़ सहन करनू।

⁵ हमून कोड़ा ले मारी ग्योछ, जेल में डाली ग्योछ, हम में भीड़ ले उपद्रव करछ्य। हमूले भौत मेहनत करछ्य, हम रात-रात भर जाग और भुखा रया।

⁶ हमूनले अपून निर्दोष स्वभाव ले, ज्ञान ले, शहनशीलता ले, दयालु हो भेरन, पवित्र आत्मा का हुकुम मानना का द्वारा,

⁷ सच्चा प्रेम ले, सच्चाई का बचन ले, परमेश्वरै की सामर्थ ले; हम दैना हात में धार्मिकता का हथियार स हमला खिन और बौं हात में रक्षा खिन इस्तमाल करनू।

⁸ जब लोग हमून तुच्छ जाणनान, और दुसरान बतुनान कि हम बुरा लोग छा या निका लोग छा या हम कपटी समझी ग्या, लेकिन हम सच्ची बोलनू।

⁹ कुछ लोग हमून प्रसिद्ध समझनान, लेकिन कुछ लोग हमून अनजान और मरिनाका नियाती समझनान और फिरले देखा, हम ज्यूना छा; हमून दण्ड त दीई जाछो लेकिन हमून जानै ले नै मार सकना।

¹⁰ हमार पास दुख को बखत छ्यो, लेकिन हमेशा खुश रूनू, हम खुद त कंगाल छा, लेकिन भौत लोगून आत्मिक रूप ले धनवान बना दीनू। हम इसा छा जसीकैं हमार पास के नाहातिन, फिरले हमार पास सब कुछ छै।

¹¹ हे कुरिन्थियूस का विश्वासीयो, हमूले खुलभेरन तुमूनथैं बात करिना की छै, हम तुमून अपून पुर दिल ले प्रेम करनू।

¹² तुमून खिन हमोरो प्रेम कभै कम नै भ्यो, लेकिन तुमोरो प्रेम हमून खिन कम हो ग्योछ।

¹³ लेकिन मैं अपून बच्चा समझभेरन तुमूनथैं कुछूँ, कि तुम ले उक बदला में तुम ले हमूनथैं अपून पुर दिल ले प्रेम करनै रौ।

हम परमेश्वरा का मन्दिर छा

¹⁴ तुम अविश्वासी लोगून का दगाड़ संगति जन राखा। किलैकी धार्मिकता और अधर्म को की मेल जोल? या उज्याला और अन्यारो को की दगोड़ो?

¹⁵ और मसीह को दुष्ट शैताना का दगाड़ की लगाव? या विश्वासी का दगाड़ अविश्वासी को की नाता?

¹⁶ परमेश्वरा का मन्दिर में मूर्तिन की कोई जाग नाहातिन। किलैकी हम त जिन्दा परमेश्वरा का मन्दिर छा; जसो परमेश्वरेले पवित्रशास्त्र में कईना को छै, “मैं इन लोगून का दगाड़ रूलो और उनूनमें हिटूलो फिरूलो; और मैं उनोरो परमेश्वर हूँलो, और उन म्यारा लोग होलो।”

¹⁷ येक कारण प्रभु हमूनथैं पवित्रशास्त्र का द्वारा कुंछो, “उन लोगून भटे अलग हो जा जो परमेश्वरा पछिल नै हिटना। और अपवित्र चीजून है दूर रौ, त मैं तुमून अपनूलो;

¹⁸ और मैं तुमोरो पिता हूँलो, और तुम म्यारा च्याला और चेलि होला; यो सर्वशक्तिमान प्रभु परमेश्वरो को बचन छै।”