2 कुरिन्थियून 5 - सोरियाली नय्या नियमहमोरो स्वर्गीय घर 1 किलैकी हम जाणनू, कि या धरती में हमोरो शरीर एक तम्बू का नियाती छै जैमें हम रूनू। अगर उ नाश हो जाछो त हमून परमेश्वरा का तरफ भटे स्वर्ग में एक इसो शरीर मिलोलो, जो आदिमीक हातून ले बनाईना को नै लेकिन हमेशा तक बनिना को रूछो। 2 यो एक सच्चाई छै कि जब हम या यो धरती में छा, तब हम यो शरीर में कराहनू और भौत इच्छा राखनू कि, हमून एक इसो शरीर मिलो जो हमार स्वर्गीय घर जसो होलो। 3 जब हम उ स्वर्गीय शरीरो को पा लीनू, त हम कोई नंगड़ा आदिमी का नियाती नी हूला। 4 सच्ची यो छै कि यो तम्बू में रून बखत हम बोझ ले दबीना ले कुणाट करनै रूनू, किलैकी हम इन संसारिक शरीरून छोड़ून नै चाना लेकिन हम चानू कि परमेश्वर हमून स्वर्गीय शरीर दे, ताकि हमार नय्या शरीर जो हमेशा खिन रौला, यो शरीर का बदल द्याला जो मर जालो। 5 परमेश्वरेले हमून नय्या शरीर खिन तैयार करिना को छै, उले हमून बयाना में पवित्र आत्मा ले दीईना को छै। यो बयाना उ वादा छै, जैस परमेश्वर बाद में हमून खिन पुरो ले करोलो। 6 येक कारण हम परमेश्वर में भरोसा राखनू, और यो जाणनू; कि जब तक हम यो शरीर में रूनू, तब तक हम परमेश्वर है दूर छा। 7 किलैकी जब हम ऐल यो संसार में रूनू, त हम अपून विश्वास का दगाड़ प्रभु का पीछल हिटनू, नै कि ऊस देखभेरन हिटनू। 8 येक कारण हम परमेश्वर में भरोसा राखनू, और जब हम मरला त यो शरीर स छोड़ द्यूला, और हम प्रभुक दगाड़ रून और उत्तम समझनू। 9 यो कारण हमार मने की मनसा यो छै, कि चाहे हम उक दगाड़ स्वर्ग में रूँ चाहे हम यो धरती में रूँ, लेकिन हम प्रभु स खुश करून चानू। 10 किलैकी जरूरी छै, कि हम सबून को मसीह का द्वारा न्याय करि जालो, कि हर आदिमी अपून-अपून भल बुरा कामून को जो उले शरीर का द्वारा करिना छन, उनोरो फल पालो। परमेश्वरै थैं मेल-मिलाप 11 येक कारण प्रभु को डर मानभेरन हम लोगून थैं सच्चाई में विश्वास करना को बिनती करनू। परमेश्वर हमून पुरी तरीका ले जाणछो और मैंस आश छै, कि तुमार जमीर हमून निकीकैं जाणछो। 12 हम फिरले अपूनी बड़ाई तुमार सामुनि नै करना बल्कि हम तुमून मौका दीन मर्या कि तुम हमून में गर्व करा ताकि तुम उनून येको जबाब दी सकला, जो अपून मन का बजाय दिखावटी बातुन में घमण्ड करना। 13 कोई कुंछो कि हम पागल छा त परमेश्वर खिन; और अगर होश में छा, त तुमार भलाई खिन छै। 14 किलैकी मसीह को प्रेम हमून मजबूर कर दीछो; किलैकी हमून यो भरोस छै कि एक आदिमी सब लोगून खिन मर ग्यो, येक कारण सब लोग मर ग्या। 15 और येक कारण मसीह सब खिन मरछ्य, उन अघिलकैं खुद स खुश करून खिन नै जीन पर उनून मसीह खिन जीन चैछो। मसीह उनून खिन मरछ्य और पिता परमेश्वरेले ऊस ज्यूनो करछ्य। मसीह में नय्या संसार 16 येक कारण अब भटे हम आदिमीन का नजरून ले केको न्याय नै करना। होई एक बखत छ्यो, जब हमूनले मसीह स आदिमी का नजरून ले देखछ्य, लेकिन अब हम इसो नै करना। 17 येक कारण, अगर कोई मसीह में विश्वास करछो त उले एक नय्या स्वभाव पाईना को छै, पुरानी बात खत्म हो ग्यान और अब नय्या बात आ ग्यान। 18 यो सब बात परमेश्वरा का तरफ भटे छन, जैले मसीहक द्वारा हमून अपून पास बुलाछ, और लोगून को परमेश्वरा का दगाड़ मेल-मिलाप करनाकि सेवा हमून दी रैछ। 19 येको मतलब यो छै कि परमेश्वर सब लोगून खिन एक बाटो बनून मर्योछ जो केले मसीह ले करिना को छै उक द्वारा परमेश्वरा का दगाड़ मेल-मिलाप कर सका, और लोगून का पापून को दोष उनूनमें नै लगायो, और परमेश्वरेले शान्ति का बारिमें उको संदेश स सुणूना को काम हमून दीईना को छै। 20 येक कारण हम मसीहक राजदूत छा; परमेश्वर उक संदेश स ग्रहण करून खिन हमार द्वारा लोगून थैं बिनती करछो। हम मसीहक तरफ भटे बिनती करनू, कि परमेश्वरा का पास आ जा। 21 मसीह, जो पाप भटे अनजान छ्यो, परमेश्वरेले ऊस हमून खिन पापी ठैहराछ, ताकि हम परमेश्वरा का नजर में धर्मी बन ज्या किलैकी मसीह ले हमार पापून को दण्ड अपून मलिमें ली लीछ। |
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
Beyond Translation