2 कुरिन्थियून 2 - सोरियाली नय्या नियम

¹ मैंले अपून मन में यो ठानिना को छ्यो कि फिर तुमार पास आभेरन तुमून दुख नी द्यूलो।

² किलैकी अगर मैं तुमून दुखी करूँलो, त तुमार अलावा मैंस खुशी दीन वाला कोई नाहातिन, सिर्फ तुमी छा जिनून मैंले दुखी करिना को छै।

³ मैंले तुमून योई मक्शद ले चिठ्ठी लिखीना की छै ताकि जब मैं तुमार पास ऊँलो त जिनून है मैंस खुशी मिलून चैछी, उनून है मैंस दुख जन मिलो। किलैकी मैंस तुम सबून में यो बात में भरोस छै, कि जो मेरि खुशी छै, उई तुम सबून की ले छै।

⁴ मैंले भौत दुख में, मन में तखलीफ सह भेरन और आँसू बगा-बगा भेरन तुमून यो चिठ्ठी लिखीना की छी मैंले तुम लोगून दुख दीन खिन नै लिखीना की छी, बल्‍कि येक कारण कि तुम यो जाण जा कि मैं तुम लोगून कतुक ज्यादा प्‍यार करछूँ।

अपराधीन माफी

⁵ और अगर केले मैंस दुखी करिना को छै, त उले मैंस नै, बल्कि एक तरीका ले तुम सबून दुखी करिना को छै, मैं येहै ज्यादा के नै कुंन चानूँ।

⁶ इस आदिमी स तुमून में भटे भौत विश्वासीन ले जो सजा दीछ, उ भौत छै।

⁷ येक कारण येहै निको यो छै कि उको अपराध माफ करा; और ऊस तसल्ली दी, अगर तुम ऊस माफ नी करना त शायद उ इतुक दुखी हो ज्यालो कि निराश हो भेरन हार मान ल्यो।

⁸ येक कारण मैं तुमूथैं बिनती करछूँ, कि ऊस विश्वास दिला कि तुम सच्ची में ऊस प्रेम करछा।

⁹ किलैकी मैंले तुमून येक कारण ले लिखीना को छ्यो, कि तुमून परख लीयू, कि तुम म्यारा हुकमून मानून खिन तैयार छा, या नाहातिन।

¹⁰ लेकिन जैस तुम माफ करछा, ऊस मैंले माफ करछूँ, किलैकी जब मैंस माफ करना की जरूरत हुछी, त मैं तुमार फैदा खिन मसीह का अधिकार ले इसो करछूँ।

¹¹ ताकि शैतान हमून ध्वाका नै दी सको; किलैकी हम उक बुर योजना स जाणनू।

मकिदुनिया प्रदेश खिन यात्रा

¹² जब मैं त्रोआस शैहर में मसीह को सुसमाचारो को प्रचार करून खिन आयू, त वाँ परमेश्वरे ले मैंस सुसमाचार प्रचार करना को भौत ठूलो मौका दीछ।

¹³ मैंले अपून विश्वासी भाई तीतुस स तुमार तरफ भटे समाचार लियून नै देख्यो, येक कारण त्रोआस शैहरा का विश्वासीन भटे विदा होभेरन मैं अपून विश्वासी भाई तीतुस स खोजून खिन मकिदुनिया प्रदेश में वापस आयू।

मसीह में विजय पर्व

¹⁴ परमेश्वरो को धन्यवाद हो, जो मसीह का दगाड़ हमार सम्बन्ध का कारण, उ हमून हमेशा अपून दगाड़ हिटूछो और हमून जीत दिलूछो। येको मतलब छै कि हम जाँ ले जानू, हम सुसमाचारे स सुणूनै जानू ताकि सब लोग परमेश्वरस जाणू और सुणून।

¹⁵ किलैकी हम परमेश्वर खिन मसीह द्वारा ज्यून करि ग्या, उ धूपै कि नियाती। हमार द्वारा प्रचार करि ग्योछ सब लोगून में फैलीना की मीठी खुशबू की नियाती छै, जो उद्धार पान वाला और नाश हुन वाला लोगून का बीच फैलछी।

¹⁶ लेकिन उनून खिन जो विनाशाक बाट में छन, उ मौत की इसी गन्दी वास छै जो उनून मौत क तरफ ली जाछी; लेकिन उनून खिन जो उद्धाराक बाट में बढ़नै जानान, यो जीवन की इसी मीठी खुशबू छै जो जीवनाक तरफ ली जाछी। सच्ची में, कोई ले खुद इस योग्य नै हो सकूनो जो मसीहक ज्ञान की खुशबू स फैला सको।

¹⁷ किलैकी हम उन भौतून का नियाती नाहातिन, जो परमेश्वरा का बचन स अपून फैद खिन प्रचार करनान; लेकिन हम परमेश्वरा का बचन को प्रचार सच्चाई और मसीहक अधिकाराक दगाड़ करनू, यो जाणभेरन कि परमेश्वर हमून देखून मर्योछ।