2 कुरिन्थियून 13 - सोरियाली नय्या नियम

आखिरी चेतावनी

^1-2 पवित्रशास्त्र में यो लिखीना को छै, कि “हरेक मामला को द्वी या तीन जनून की गवाही का द्वारा सुलझाई जानो चैछो।” मैं पैलि उन लोगून चेतावनी दी चुक गयूँ जो मेरि दुसरी यात्रा में वाँ छ्या और पाप करून मरैछ्या, अब मैं फिर उनून और सबून चेतावनी दीछूँ, जसो कि मैंले पैलि चिठ्‌ठी में दीईना को छ्यो। अब मैं तुमार पास तिसरी बार ऊँन वाला छूँ और अगर उनूनले अब ले पाप करूनो बंद नै करिना को छै, त कोई ले सजा है बच नी पालो।

³ मैं येक कारण कुछूँ, किलैकी तुम सबूत माँगून मरैछा की मसीह म्यारा द्वारा कुंछो, और मसीह तुमून सुधारछो, त यो साबित हुछो की उ कमजोर नाहातिन; लेकिन तुमार बीच में शक्तिशाली छै।

⁴ उ कमजोरीन का कारण सूली में चढ़ाई त गयोछ, फिरले परमेश्वरै की सामर्थ ले ज्यूनो छै, हम ले त मसीह का नियाती शाररीक रूप ले कमजोर छा; लेकिन तुम अनुभव करला कि हम परमेश्वरै की सामर्थ का द्वारा मसीह का दगाड़ ज्यूना छा।

⁵ अपूनास परखा, कि विश्वास सच्चो छी या नाहातिन। अपूनास जाँचा, क्या तुम अपून बारिमें यो नै जाणना, कि यीशु मसीह तुमून में छै? नै त तुम निकम्मा निकलछ्या।

⁶ लेकिन मेरि आश छै, कि तुम जाण लेला, कि हम निकम्मा नै निकल्या।

⁷ हम अपून परमेश्वर थैं प्रार्थना करनू, कि तुम कोई बुराई नै करा; या तक कि अगर तुमून यो विश्वास हुनो कि हम सच्चा प्रेरित नाहातिन, त हम तुमून खिन प्रार्थना करूनमर्यान कि, कोई गलत काम करे बिना, तुम केवल निका काम करा।

⁸ किलैकी हम सत्य को बिरोध में के नै कर सकना, पर सत्य खिन कर सकनू।

⁹ जब हम कमजोर छा, और तुम विश्वास में मजबूत बना, त हम खुश हुनू, और यो प्रार्थना ले करनू, कि तुम विश्वास में मजबूत हो जा।

¹⁰ येक कारण मैं तुमार सामुनि ऊँन है पैलि तुमून यो बात लिखूनमरयूँ, ताकि मैंस अपूनो अधिकार का इस्तमाल करना की जरूरत नै हो जो कि प्रभु ले मैं तुमून दंड दीन खिन दीईना को छै। किलैकी मैं अपूनो अधिकार को इस्तमाल तुमार विश्वास स मजबूत करून खिन करून चाछूँ नै कि ऊस नष्ट करून चाछूँ।

आखरी नमस्कार

¹¹ येक कारण हे म्यारा विश्वासी भाईयो, मैं इन बातुन का दगाड़ चिठ्‌ठी बन्द करछूँ, खुश रौ; सिद्ध बननै जा; एक दुसरा को हौंसला दीनै रौ; एक्कै मन रखा; मेल-मिलाप ले रौ; तब प्रेम और शान्ति को दाता परमेश्वर तुमार दगाड़ होलो।

¹² एक-दुसारा स दगाड़ प्रेम ले गला मिलभेरन नमस्कार करा।

¹³ सब परमेश्वरा का लोग तुमून नमस्कार कुंनान।

¹⁴ मैं प्रार्थना करछूँ कि प्रभु यीशु मसीह को अनुग्रह और परमेश्वरो को प्रेम और पवित्र आत्मा की संगति तुम सब का दगाड़ हुनै रौ।