2 कुरिन्थियून 11 - सोरियाली नय्या नियम

पौलुस और झूठे प्राचारक

¹ तुम दुसरान अपनूछा जो खुदै की तारीफ करनै रूनान और येक कारण मैंस उम्मीद छै कि अगर मैं थ्वाड़ा बेकूफी करछूँ त ऊस तुम बरदास कर लेला।

² किलैकी मैं तुमूनथैं प्रेम करछूँ और तुमेरि परवाह करछूँ जैस परमेश्वर करछो। येक कारण कि मैंले तुमून मसीह स दीना को वादा करिना को छै, और एकलो ऊसोई। यो एक बबा का नियाती छै जैले अपूनी चेलि को ब्याक बखत उक घरवालास एक शुद्ध कुँवारी का रूप में दीछो।

³ लेकिन मैं डरछूँ कि जसीकैं शैतान ले, एक स्याँपा का रूप में चालाकी ले पैलि स्यैनि हव्वा स बहकाछ, उसीकैं तुम लोगून का मनून ले बहका दी जौ और तुम मसीह का प्रति अपूनी निष्‍कपट और सच्‍ची भक्‍ति स खत्म नै कर दी।

⁴ जब कोई तुमार पास ऊँछो और हमार द्वारा सुणाईना को यीशु का प्रचारा का अलावा कोई दुसारा यीशु को प्रचार करछो, या कोई और आत्मा तुमून मिलीना की छै, जो पैलि नी मिलीना की छी; या और कोई सुसमाचार सुणो जैस तुम ले पैलि नी मानिना को छ्यो, त तुम येस खुशी ले अपनूछा।

⁵ मैंस लागछो कि मैं उन लोगून की नियाती निको छूँ जो सोचनान की उन सबै प्रेरितों में भटे सबून है महान छै।

⁶ माना कि मैं बोलून में निपूण नाहातिनू, लेकिन म्यारा पास मसीह और सुसमाचार का बारिमें ज्ञान छै। बल्कि येको प्रमाण हम सब तरीका ले और हर प्रकारै की बातुन में तुमून लोगून दी चुक ग्या।

⁷ तुम लोगून मलि उठून खिन मैंले अपूनास दीन बनाछ और बिना के लिये तुम लोगून का बीच में परमेश्वरो को सुसमाचारो को प्रचार करछ्य। क्या मैंले इसो करभेरन पाप करछी?

⁸ मैंस तुमेरि सेवा करून खिन दुसरी विश्वासीन की मण्डली को सयोग मिलछ्य। तुमून यो नै कुंन चैनो कि इसो करूनो गलत छै।

⁹ और जब मैं तुमार दगाड़ छ्यू, और जब मैंस पैसान की जरूरत छी, तब ले मैंले तुमून परेशान नै कर्यो। किलैकी मकिदुनिया प्रदेशा का विश्वासी भाईन ले आभेरन पैसा दीभेरन मेरि जरूरत पुरी करछ्य। मैंले हर बात में तुमून परेशान नै कर्यो, और मैं ऊँन वाला दिनून में ले तुमून परेशान नी करूँलो।

¹⁰ और जसो कि तुम जाणछा कि मसीह जो कुंछो उ सब सच्ची छै, तुम यो पक्को कर सकछा कि अब मैं तुमूनथैं जो कुछूँ उ सच्ची छै। येक कारण पुर अखया प्रदेशा का सारा इलाकान में भटे केथैं ले रूपाया नै लिया।

¹¹ मैंले तुमूनथैं पैसा क्याखिन नै लीनू? कि मैंले इसो येक कारण करछ्य किलैकी मैं तुमून प्रेम नै करनू? परमेश्वर जाणछो कि मैं तुमून प्रेम करछूँ।

¹² लेकिन मैं जो करनै ऊँन मरयूँ, उई करनै रछूँ, ताकि मैं उन लोगून हमार दगाड़ बराबर समझी जाना को मौका दीन है रोक सकूँ। उन सच्ची में मौक चानान कि यो साबित करून खिन उन ले हमार बराबर छन और उनूनले गर्व करना को अधिकार छै।

¹³ किलैकी इसा लोग झूठ्ठा प्रेरित, और छल ले काम करूनवाला, और मसीह को प्रेरित हुना को ढोग करनान।

¹⁴ मैंस ताजुब नै हुनो कि उन इसो काम करनान, किलैकी शैतान खुद लोगून ध्वाका दी सकछो कि उ परमेश्वरै की महिमा वाला स्वर्गदूत बनभेरन आईना का छन।

¹⁵ येक कारण यो कोई ठुली बात नाहातिन कि अगर शैताना का सेवक धार्मिकता का सेवकून की नियाती दिखून खिन खुद स बदल दीन। लेकिन अन्त में उनून उई मिलोलो जो उनारा कामून का अनुसार छै।

मसीह खिन दुख उठूनो

¹⁶ मैं फिर कुछूँ, कोई मैंस मूर्ख नै समझो; नै त मूर्ख समझभेरन मेरि सह ली, ताकि थ्वाड़ा मैंले घमण्ड कर सकूँ।

¹⁷ येक बारिमें मैं जो कुन वाला छूँ, उ प्रभु का अधिकार ले नै, लेकिन माना मूर्खता ले कुछूँ।

¹⁸ जब भौत लोग उन बातुन की डींग मारनान, जो संसारा का नजर में महत्व राखनान, त मैंले उई करूँलो।

¹⁹ तुम समझदार होभेरन मूर्ख लोगून का ब्यवहार स खुशी ले सह लीछा।

²⁰ किलैकी जब तुमून कोई दास बना लीछो, या तुमार पास जो केले छै, ऊस ले ली लीछो, या ध्वाका दीभेरन फैदा उठा लीछो, या अपूनास ठूलो बनूछो, या तुमार मुँख में थप्पड़ मारछो, त तुम सह लीछा।

²¹ त तुमून कि लागछो कि मैंस शर्म ऊँन चैछी किलैकी मैंले इसो नै कर्यो? बल्कि जिन बातुन का बारिमें उन लोग डींग मारनान, मैंले उन बातुन का बारिमें उई कर सकछूँ।

²² क्या उनी यहूदी छनी? मैंले छूँ। क्या उनी इस्राएली छनी? मैंले छूँ; क्या उनी अब्राहम का वंश का छनी? मैंले छूँ।

²³ क्या उनी मसीह का सेवक छनी? मैं पागल आदिमी का नियाती कुछूँ, मैं उनून है कई बढ़भेरन सेवक छूँ। मैंले उनून कई ज्यादा मेहनत करिना को छै, उनून है कई ज्यादा जेल में जाईना को छूँ, भौत बार मारी गयूँ, और हमेशा मैंस मौतो को सामना करून पड़छ्य।

²⁴ पाँच बार मैंले यहूदी अगुवान का हातून है उनतालीस कोड़ा खाया।

²⁵ तीन बार मैं डंडा ले पीटी गयूँ, और एक बार ढुगाँन ले मारी गयूँ। तीन बार इसो भ्योछ कि जो समुंद्री जहाज में मैं यात्रा करून मरैछयूँ, उ टुट ग्यो; एक दिन और एक रात मैंले समुद्र में काटछ्य।

²⁶ मैं बार-बार यात्रान में; नदीन का जोखिम में; डाकूनका जोखिम; अपून जातिवालान है जोखिम में; गैर-यहूदी है जोखिम में; नगरून में का जोखिमून में; जंगल का जोखिमून में; समुद्रा का जोखिमून में; झूठ्ठा विश्वासी भाईन का बीच जोखिमून में रयूँ।

²⁷ मैंले भौत रातून जाग भेरन, भुखो-प्यासो रैभेरन, मैंस भौत बार खान खिन नै मिल्यो, सर्दी और थ्वाड़ा कपड़ान में रैभेरन कड़ी मेहनत करछ्य और भौत मुसीबतून झेलीना को छै।

²⁸ और इन सब बातुन का अलावा हर दिन सबै विश्वासीन की मण्डली की चिन्ता मैं खाई जाछी।

²⁹ जब कोई कमजोर हो जाँछो, त मैंले कमजोरी महसूस करछूँ। जब कोई पाप करछो, त म्येरो दिल जलि जाछो।

³⁰ अगर के बात में घमण्ड करून छै, त मैं अपूनी कमजोरीन में घमण्ड करूँलो।

³¹ प्रभु यीशु मसीह को पिता परमेश्वर हमेशा धन्‍य छै। उ जाणछो कि मैं झूठ नै बोलून मरयूँ।

³² जब मैं दमिश्‍क शैहर में छ्यू, त अरितास राजा का राज्यपाल ले मैंस गिरफ्‍तार करून खिन शैहर में पहरा बैठा दीछ।

³³ लेकिन म्यारा दगड़ियान ले मैंस चार दिवारी का खिड़की भटे डाला में बैठाभेरन तलि उतार दीछ, और इसीकैं मैं राज्यपाल का हातून भटे बच निकल ग्यू।