1 पतरस 5 - सोरियाली नय्या नियम

अगुवान और नौजवानून संदेश

¹ कुछ बात इसी छन जो मैं वाँक यहूदी अगुवान थैं कुंन चाछूँ किलैकी मैंले तुमोरो जैसो एक यहूदी अगुवा छूँ। मैंले खुद उन दुखून देखीना को छै जो भौत बखत पैलि मसीह ले सहन कर्यान। त मैंले उकी महिमा में भागीदार हूँलो, जब उ फिर यो संसार में वापस आलो। मैं तुमूनथैं बिनती करछूँ कि,

² जसकैं ग्वाला अपूनी भेड़ून की रखवाली करनान, उसीकैं तुमून ले हर विश्वासी की रखवाली करूनी चैछी जिनून परमेश्वरेले तुमेरि देखभाल में राखिना को छै। यो सेवा स अपूनी इच्छा ले करा, किलैकी परमेश्वर योई चाछो कि तुम इसो करा। इसो सिर्फ येक कारण जन करा किलैकी तुमून इसो करून खिन मजबूर करि ग्योछ, और नै यो काम येक कारण करा कि तुम धन कमून चाँछा लेकिन सिर्फ परमेश्वर और लोगून की सेवा करून खिन करा।

³ जिन लोगून की जिम्मेदारी परमेश्वरेले तुमून दी रैछ, उनूनमें अधिकारीन का नियाती अपूनो अधिकार जन जता, बल्कि उनून खिन एक निको उदारण बना।

⁴ जब यीशु मसीह दुबारा वापस आलो, जो कि हमोरो प्रधान ग्वाला का नियाती छै, तब तुमून एक सुन्दर मुकुट दीई जालो जो कभै ले अपूनी चमक नी खोलो।

⁵ इसीकैं तुम जवान लोगून पुराना विश्वासीन को हुकुम मानून चैछो। तुम सबून दीन होभेरन एक-दुसरा की सेवा करूनी चैछी। किलैकी पवित्रशास्त्र में लिखीना को छै कि, परमेश्वर घमंडी लोगून को बिरोध करछो लेकिन उ उन लोगून में अनुग्रह करछो जो लोग दीन छन।

⁶ येक कारण, अपनास परमेश्वरा का प्रति नम्र करा जो हर बात में सामर्थी छै ताकि उ, उ दिन तुमून एक निका जाग में उठालो जो उले चुन रैछ।

⁷ परमेश्वर तुमेरि परवाह करछो और येक कारण अपूनी सारी चिन्ता परमेश्वर में डाल दी।

⁸ हमेशा सतर्क रौ और जागनै रौ, किलैकी शैतान, तुमोरो दुश्मन तुमून में हमला करून चाछो ताकि तुम परमेश्वरा का हुकुमून नै माना। उ फाड़ खान वाला बाघका नियाती छै, जो अघिल-पछिल घुमछो और देखनै रूछो कि उ कैस खूँ।

⁹ तुमूनले परमेश्वर में पुरी रीतिले विश्वास करून चांछो, और शैतानो को हुकूमो को पालन नै करून चांछो। याद राखा कि विश्वासी भाई-बैनि जो पुर संसार में रून मर्यान, इसा तरीका का दुखून सहन करून मर्यान जसकैं तुम सहन करून मरैयछा।

¹⁰ परमेश्वर जो पुर तरीका ले अनुग्रह ले भरिनाका छन, उले हमून मसीह का दगाड़ हमार रिश्ताका कारण स्वर्ग में उकी अनन्त महिमा में सहभागी हुनखिन हमून बुला रैछ। तुमार थ्वाड़ा बखत खिन दुख सहन करना का बाद, परमेश्वर तुमून मजबूत करोलो, ताकि तुमोरो विश्वास मजबूत हो, और डगमगून वाला नै हो।

¹¹ उ सम्मान पानो को लायक छै किलैकी उकी सामर्थ को कोई अंत नाहातिन। आमीन।

अन्तिम अभिवादन

¹² मैंले यो चिठ्ठी थ्वाड़ा शब्दून में सिलवानुस की मद्दत ले लिखछै और तुमून भे ज छै। मैं ऊस मसीह में एक विश्वासयोग्य भाई का रूप में मानछूँ। मेरो यैसे लिखनाको मक्शद तुमून उत्साहित करून और तुमून विश्वास दिलून छै कि जो कुछ ले तुम महसूस करून मरेछा उ सच्ची में तुमार प्रति परमेश्वरो को अनुग्रह को हिस्सा छै। यो अनुग्रह में मजबूत बनिनाका रौ।

¹³ बेबीलोन देशा का विश्वासी तुमून नमस्कार करनै रौ, जिनून परमेश्वर ले चुन छै जसकैं उले तुमून चुन छ्यो। मरकुस, जो मैं खिन एक च्याला का नियाती छै, उले तुमून नमस्कार करछो।

¹⁴ एक-दुसरा का दगाड़ प्रेम ले गाल मिलभेरन नमस्कार करा। मैं प्रार्थना करछूँ कि परमेश्वर हरेक उ आदिमी स शान्ति दे, जो मसीह में छन।