1 पतरस 4 - सोरियाली नय्या नियम

बदलीना को जीवन

¹ येक कारण जसीकैं मसीह ले अपून शरीर में रैभेरन दुख उठाछ, उसीकैं तुमून ले उई स्वभावा का दगाड़ दुख उठून खिन तैयार रून चैछो जो उक पास छ्यो। किलैकी अगर तुम मसीह खिन दुख उठून खिन तैयार छा त तुमूले पाप नै करना को फैसला कर हालछ्य।

² जैको नतीजा यो छै कि उ आदिमी अपून पुर जीवन यो धरती में अपून पापी स्वभाव का अनुसार नी जिलो। लेकिन उ उई करोलो जो परमेश्वर चाछो कि उ करो।

³ किलैकी पैलि तुमूनले अपूनो बखत गैर-विश्वासी लोगून का दगाड़ बुरा काम करभेरन बर्बाद कर दीछ। जैले लुचपन की बुरी इच्छा, नशा में मतवाला हुनो, रंगरलियाँ, पियक्कड़पन, और मूर्ति पूजा जैले परमेश्वर नफरत करछो।

⁴ योई कारण तुमार पुराना दगड़िया हैरान हुनान जब तुम उनार दगाड़ उन बुरा कामून में शामिल नै हुना जो उन करनान। येक कारण उन तुमार बारिमें बुरा बोलनान।

⁵ लेकिन एक दिन उन जरूर परमेश्वरा का सामुनि न्याय खिन ठाड़ होला, और परमेश्वर उनूनमें भटे हरेक स उनार द्वारा धरती में करिना का कामून का बारिमें पुछोलो। परमेश्वर ज्यूना और मरिनाका लोगून को न्याय करोलो।

⁶ योई कारण छै कि मरिनाका लोगूनले ले मसीह का बारिमें सुसमाचार सुणछ्य। उनार शरीरून ले सब लोगून की नियाती मरून पड़छ्य, लेकिन अब उन आत्मा में हमेशा परमेश्वरा का दगाड़ रूनान।

परमेश्वरा का निका भण्डारी

⁷ सब बातुन को अन्त तुरन्त हुनवालो छै; येक कारण अपून-आप में काबू करभेरन और सच्चाई का दगाड़ प्रार्थना में लाग रौ।

⁸ सबून है ठूली बात यो छै कि एक-दुसारा से ईमानदारी ले प्रेम करा किलैकी अगर तुम लोगून प्रेम करछा, त तुम हमेशा कोई ले गलत काम स माफ करून खिन तैयार रौला, जो उनूनले कर्यान।

⁹ अपून घरून में लोगून को स्वागत करा और इसो करनै रौ।

¹⁰ हरेक आदिमी स परमेश्वरै की तरफ भटे बरदान मिलीना को छै और उनून उ ऊस बरदान को इस्तमाल दुसरान की सेवा करून खिन करून चैंछो अलग-अलग बरदानून को इस्तमाल भौत बड़िया तरीका ले करूनो चैंछो जो परमेश्वरेले उनून अनुग्रह भटे दीईना को छै।

¹¹ अगर तुमार पास प्रचार करना को बरदान छै, त तुमून परमेश्वरो को बचन को प्रचार करून चैछो। अगर तुमार पास दुसारा लोगून की मद्दत करना को बरदान छै, त यो ऊस सामर्थ का दगाड़ करा जो परमेश्वर तुमून दीछो। त फिर जो केले तुम करछा उ यीशु मसीह का द्वारा परमेश्वरेस महिमा दिलालो। सारी महिमा और सामर्थ हमेशा-हमेशा खिन उकी छै। आमीन।

मसीह का दुखून में शामिल हुनो

¹² हे म्यारा विश्वासी भाईयो, जो दर्दनाक दुख तुम सहछा, उनार बारिमें हैरान जन हो, किलैकी तुम मसीह का छा। लेकिन यो बात दिखून खिन हो रैछ कि क्या तुम सच्ची में परमेश्वर में विश्वास करछा। येक कारण, यो जन सोचा कि तुमार दगाड़ कुछ अजीब घटना होर्यान।

¹³ बश येक बारिमें खुश रौ, किलैकी तुमून मसीह का दुखून को एक हिस्सा मिलछ्य। यो कारण, जब मसीह सब लोगून खिन अपूनी महिमा प्रकट करून खिन दुबारा आलो त तुम आनन्द ले भर जाला।

¹⁴ अगर मसीह का नामाका कारण तुम लोगून को अपमान करि जाछो, त अपनास धन्‍य समझा; किलैकी परमेश्वरो को महिमामय आत्मा तुमार भितर रूछो।

¹⁵ सतर्क रौ कि तुमून में भटे कोई ले खूनी का नियाती, या चोर का नियाती या बुरा काम करूनवाला का नियाती या दुसारा का कामून में दखल-अन्दाजी करूनवाला आदिमी का नियाती दुख नी भोगाला।

¹⁶ लेकिन अगर कैसे मसीह हुना का नाता ले दुख सहन करून पड़ो, त तुम येस शर्म की बात जन समझा, बल्कि परमेश्वरै की महिमा करा कि तुम येक कारण दुख सहन करून मरेछा किलैकी तुम मसीह का लोग छा।

¹⁷ परमेश्वरो को न्याय शुरू हुना को बखत आग्योछ, जो परमेश्वरा का लोगून भटे शुरू होलो, किलैकी उ पैलि हम विश्वासीन को न्याय करोलो, येक कारण उन भयानक बातुन का बारिमें सोचा जो उन लोगून का दगाड़ होलि जो उ सुसमाचार स नै मानना जो उकी तरफ भटे ऊँछो।

¹⁸ जसो कि पवित्रशास्त्र कुंछो, “अगर एक धर्मी आदिमी को बचाई जानो इतुक कठिन छै, तो दुष्ट और पापी लोगून का दगाड़ कि होलो।”

¹⁹ येक कारण, जो लोग उ दुख स सहन करनान जसी परमेश्वरै की इच्छा हुछी, उनून हमेशा परमेश्वर में भरोस राखून चैछो, जैले उनून बनाछ। परमेश्वर हमेशा उ करछो जैस करना को उले वादा करिना को छ्यो और येक कारण जो भल काम छन उनून हमेशा करनै रौ।