1 पतरस 3 - सोरियाली नय्या नियम

स्यैनि और घरवालो

^1-2 हे घरवालीयो, तुम ले अपून-अपून घरवालान का अधीन रौ। ताकि अगर उमें भटे कोई ले परमेश्वरा का बचन में विश्वास करून है इन्कार करछो और जसा तरीका ले तुम ब्यवहार करछा, तुमून उनून यो बतूना की जरूरत नी होलि कि उनून विश्वास करूनो चैछो। जब उन तुमार शुद्ध और ईश्वरीय ब्यवहार स देखाला त उन मसीह में विश्वास कराला।

³ और अपूनास खुबशुरत बनूना की कोशिश जन करा, जसीकैं कि बालून की अलग-अलग तरीका ले सजावट करूनो, और सोना का मैंहगा-मैंहगा जैवर पैनून, या मैंहगा-मैंहगा कपाड़ा पैनून।

⁴ तुमून अपनास इसा ब्यवहार ले सुन्दर बनूनो चैछो जो बदलनो नै, मतलब एक विनम्र और शांत स्‍वभाव, जो कि परमेश्वर खिन भौत अनमोल छै।

⁵ पुरान जमाना समय की भक्ति में रूनवाली स्यैनिन जो परमेश्वर में भरोसा करछी, उनूनले अपनास अपून घरवालान का अधीन करछ्य, और इस तरीका ले उन अपनास सुन्दर बनूछ्या।

⁶ सारा को उदारण ली, जो अपून घरवाला अब्राहम को हुकुम मानछी, और ऊस स्‍वामी कैभेरन बुलूछी। मतलब यो कि, अगर तुम दुसरान का दगाड़ भलाई करछा, और कोई ले प्रकारा का डरले जन डरा, त तुमले सारा की चेलिन होला।

⁷ उसीकैं हे घरवालो, तुम अपूनी घरवालीन का दगाड़ मेल-मिलाप ले रौ, और उनार मद्दत करना का बारिमें बिचार करा, तुमून याद राखून चैछो कि उन तुमून है कमजोर छन, येक कारण तुमून उनोरो आदर करून चैछो। किलैकी तुम द्वीवै उ बरदान स साझा करछा जो परमेश्वरा का अनुग्रह ले तुमून दीईना को छै, मतलब अनन्त जीवन को बरदान। इसो करा ताकि जब तुम परमेश्वर थैं प्रार्थना करा त उ तुमेरि सुणो।

भलाई करना का कारण सताव

⁸ आखिर में, मैं तुमूनथैं यो कुंन चाछूँ, कि तुम सबून को एक मन हुन चैछो, और एक-दुसारा में दया करा, और एक-दुसारा खिन प्रेम राखा, भलाई करा और नम्र बना।

⁹ बुराईक बदला बुराई जन करा और नै गाली का बदला गाली दी; लेकिन येका बदला आशीष दी। किलैकी परमेश्वरेले तुमून येक कारण बुला रैछ ताकि तुम दुसरान आशीष दी सका। अगर तुम इसो करछा त परमेश्वर ले तुमून आशीष द्योलो।

¹⁰ किलैकी पवित्रशास्त्र कुंछो, “अगर कोई आदिमी अपून जीवन में आनन्द लीनो चाछो और निका दिन देखून चाछो त ऊस सतर्क रून चैछो कि उ बुरी बातुन जन करौ। और ऊस इसी बातुन करून बन्द कर दीनो चैछो जो सच्ची नाहातिन।

¹¹ ऊस जरूर उ बुराई करून छोड़ दीन चैछी। येका बजाय, ऊस भलाई करून चैछी। और दुसरान का दगाड़ शान्ति ले रून खिन कोशिश करून चैछी।

¹² किलैकी प्रभु की नजर उन लोगून में रूछी जो लोग धर्मी छन। और उ हमेशा उनेरि प्रार्थनान सुणभेरन उनोरो जबाब दीन खिन तैयार रूछो। लेकिन परमेश्वर उन लोगून का खिलाफ काम करछो जो लोग बुराई करनान।”

¹³ अगर तुम हमेशा भल काम करना की कोशिश करछा, त सच्ची में कोई ले तुमेरि बुराई नै कर सकनो।

¹⁴ लेकिन अगर जो सही छै उ करना का कारण तुम दुख सहछा त परमेश्वर तुमून आशीष द्योलो। ऊसो करा जसो यशायाह ले पवित्रशास्त्र में लिखीना को छै, “उन लोगून है जन डरा, जो तुमून डरूनान और यो बात की चिन्ता जन करा लोग कि कर सकनान।”

^15-16 बल्कि तुमून मसीह स प्रभु जाणभेरन अपून जीवन में उकी अराधना करूनी चैछी। अगर कोई उ आश का बारिमें के पुछो, जो हम सब विश्वासी हुना का नाता आपस में साझा करनान, त हमेशा ऊस समझून खिन तैयार रौ, और इस तरीका ले ब्यवहार करा कि तुम दोषी महसूस जन करा और हमेशा उई करा जो सही छै। फिर अगर लोग तुमार खिलाफ बुरा बोलनान, त उनी शर्मिदा होला जब उन मसीह का दगाड़ तुमार सम्बंध का कारण तुमार निका ब्यवहार स देखाला।

¹⁷ अगर हम अपून निका कामून का वजह ले दुख पानू त यो निको छै, किलैकी हमून खिन परमेश्वरे की यो इच्छा छै। यो बुरा कामून का कारण दुख पान है हमून खिन कई ज्यादा निको छै।

मसीह को दुख

¹⁸ मैं यो कुछूँ कि मसीहले ले हमार पापून का कारण दुख उठाछ और मर ग्यो। उ सिर्फ एक बार मरछ्य और इसो दुबारा करना की जरूरत नाहातिन। उ एक धर्मी आदिमी छ्यो जो पापी लोगून खिन मर ग्यो ताकि उ हमून परमेश्वरा का पास ल्या सको। उनूनले उक शरीर स त मार डालछ्य लेकिन ऊस पवित्र आत्मा का सामर्थ ले फिर ज्यूनो कर दी ग्योछ।

¹⁹ तब उकी आत्मा ले जाभेरन उन आत्मान सुसमाचार सुणाछ, जो उ जाग में परमेश्वरा का द्वारा कैद करिना का छ्या, जाँ मरिनाका लोगून की आत्मा छन।

²⁰ यो उन लोगून की आत्मा छ्या जिनून भौत बखत पैलि परमेश्वरा का हुकुमून नि मानिना को छ्यो। जब नूह जहाज स बनून मरैछ्यो, त परमेश्वर भौत धैर्य ले इन्तजार करूनमर्योछ कि देखा क्या उन लोग अपून पापून है पश्चाताप करला। लेकिन जब पानि ले संसारो को विनाश कर दीछ, त जहाज में जानवाला सिर्फ आठ लोग बच गैछ्या।

²¹ पुराना जमाना में उनोरो उद्धार अब हमार उद्धार को एक उदारण छै जब हम बपतिस्मा लीनू। जो पानि में हम बपतिस्मा लीनू, उ हमार शरीरो को मैल दूर नै करनो, लेकिन उ यो बात को चिन छै कि हमूले परमेश्वर थैं माफी माँगछै ताकि आघिलकै हमार मन परेशान नै रौ। हमून माफी मिल सकछी किलैकी यीशु मसीह मरिनाका बाद फिर ज्यूनो भ्योछ।

²² और उ स्वर्ग में न्हैग्यो। अब उ वाँ परमेश्वरा का दैंन तरफ सबून है ऊँचा जाग में छै, और उ सब स्वर्गदूतून और सब अधिकारीन और सब शक्तिन में राज्य करछो।