1 यहूना 3 - सोरियाली नय्या नियम1 जरा सोचा, कि पिता परमेश्वर ले हमून कदुक प्रेम करछ्य, ताकि हम परमेश्वरा का सन्तान बना; और सच्ची में हम उक सन्तान छा ले। लेकिन यो संसारा लोग नै जाणना कि हम परमेश्वरा का सन्तान छा, क्याखिनकि उन पिता परमेश्वर नै जाणना। 2 हे प्रिय दगड़ियो, अब हम परमेश्वरकि सन्तान छा, और अब तक यो प्रगट नै भ्यो कि भविष्य में हम की बनला, बश हम इतुक जाणनू कि जब उ प्रगट होलो त हम ले उक समान हूँला, क्याखिनकि हम ऊस ऊसो देखला जसो उ छै। 3 और जो कोई मसीह की आश राखछो, उ अपून आपस ऊसो पवित्र करछो, जसो उ पवित्र छै। 4 जो कोई लगातार पाप करछो, उ परमेश्वरा का नियम-कानून पालन नै करूनो; और पाप त नियम-कानून पालन करून है इनकार करून छो। 5 और तुम जाणछा, कि यीशु मसीह येक कारण आछ, कि पापून भटे छुटकारा दे, और उमें कोई पाप नाहातिन। 6 जो कोई मसीह में बनिनाको रूछो, उ लगातार पाप नै करूनो, जो कोई पाप करछो, उले नै त मसीह देखछ्य, और ऊस नै जाणनो। 7 हे नान्तिनो, केका बेहकून में जन आया; धर्मी उई छै जैको चाल-चलन खरो छै ठीक जसकैं यीशु मसीह धर्मी छै। 8 जो कोई लगातार पाप करछो, उ शैतान का तरफ भटे छै, क्याखिनकि शैतान शुरू भटे पाप करनै आर्योछ; परमेश्वरो को च्योलो येक कारण आछ, कि शैताना का कामून नाश करो। 9 जो कोई परमेश्वर की सन्तान छै, उ लगातार पाप नै करूनो; क्याखिनकि परमेश्वरो को स्भाव उमें छै और उ लगातार पाप नै कर सक्नो, क्याखिनकि उ परमेश्वर की सन्तान छै। 10 येलेई परमेश्वर की सन्तान और शैतान की सन्तान की पछयाण हुछी, कि जो कोई धार्मिकता काम करूछो और अपून भाई स थैं प्रेम राँखछो, उ परमेश्वर सन्तान छै। एक दुसरा का दगाड प्रेम करा 11 जो समाचार तुमूले शुरू भटे सुणछ्य, उ यो छै, कि हम एक दुसारा का दगाड़ प्रेम राँखा; 12 और आदमो को च्योलो कैना का नियाती जन बना, जैले शैतान की बातुन मानछ्य, और जैले अपून भाई हाबिल को खून करछय। और ऊस कि कारण ले मारछ्य? येक कारण कि उक काम बुरा छ्या, और उक भाई का काम धार्मिकता का छ्या। 13 हे विश्वासी भाईयों, अगर संसार का लोग तुमून भटे बैर करनान, त ताजुब जन कर्या। 14 हमून पत्तो छै, की हम मौते की शक्ति भटे आजाद हो ग्या और येल हमार पास परमेश्वरा का तरफ भटे अनन्त जीवन छै, किलैकी हम विश्वासी भाईन का दगाड़ प्रेम राखनू; और जो प्रेम नै राखनो उ मौत बश रूछो। 15 जो कोई अपून विश्वासी भाई का दगाड़ बैर राँखछो, उ खूनी छै; और तुम जाणछा, कि कोई खूनी में अनन्त जीवन नै रूनो 16 हमूले प्रेम येले जाण छै, कि यीशु मसीह ले हमून खिन अपून प्राण दी दीयान; येक कारण हमूले ले विश्वासी भाईन खिन प्राण दिन चैछो। 17 लेकिन जैका पास संसारे की संपत्ति छै, और उ अपून विश्वासी भाई स कंगाल देखिभेरन उमें तरस खान नै चानो, त उमें परमेश्वरो को प्रेम नै हो सकनो। 18 हे नान्तिनो, हम बचनून और बातुन ले नै, लेकिन काम और सच्चाई का दगाड़ ले प्रेम करा। परमेश्वराका सामुनि हिम्मत 19-20 जब हम दुसरान का दगाड़ प्रेम करनू, त हम जाणला कि हम सच्चाई का छा। जब कभै ले हमोरो मन हमून दोषी ठैहरछो, तब हम अपून मनून में परमेश्वरा का सामुनि आराम पानू, क्याखिनकि परमेश्वर हमार मनून भटे ठूलो छै; और सब कुछ जाणछो। 21 हे दगाड़ियो, अगर हमोरो मन हमून दोष नै दे त हमून परमेश्वराका सामुनि हिम्मत हुछी। 22 और जेलै हम परमेश्वर थैं माँगून, उ हमून उथैं भटे मिलछो; क्याखिनकि हम उको हुकमून माननू; और उई करनू, जो परमेश्वर स खुश करछो। 23 और परमेश्वरा का हुकुम यो छै कि हम उक च्योलो यीशु मसीहक नाम में विश्वास करा, और जसो उले हमून हुकुम दी रैछ, उक अनुसार आपस में प्रेम राखा। 24 और जो परमेश्वरो को हुकमून को पालन करछो, उ परमेश्वर में, और परमेश्वर उमें बनिना को रूछो; और येले उ पवित्र आत्मा जो उले हमून दी रैछ, हम जाणनू कि परमेश्वर हमून में बनिना को रूछो। |
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
Beyond Translation