1 यहूना 1 - सोरियाली नय्या नियमजीवन को बचन 1 हम एक आदिमी का बारिमें लिखूनमर्या, जो जीवन को बचन छै। उ दुनिया का बनून है पैलि भटे छ्यो जैस हमूले सुणछ्य और अपून आँखान ले देखछ्य, बल्कि जैस हमूले ध्यान ले देखछ्य और हातून ले छूँ रैछ। 2 यो आदिमी जो जीवन दीछो, उ संसार में आछ, और हमूले ऊस देखछ्य, और उकी गवाही दीनू, और तुमून उ अनन्त जीवन का बारिमें बतूनू जो पिता परमेश्वरा का दगाड़ छ्यो और हमून में प्रगट भ्योछ। 3 जो कुछ हमूले यीशुक बारिमें देखछ्य और सुणछ्य उकी सुसमाचार तुमूनले दीनू, येक कारण तुम ले हमार दगाड़ संगति राँखा; और हमोरो यो दगोड़ो पिता परमेश्वरा का दगाड़ और उक च्योलो यीशु मसीहक दगाड़ छै। 4 और यो बात हम येक कारण लिखनू, ताकि हमरि खुशी पुरी हो जौ। उज्यालो में हिटून 5 जो सुसमाचार हमूले यीशु मसीह थैं सुण रैछ, और तुमून सुणनू, उ यो छै; कि परमेश्वर उज्याला को जसो निको छै और उमें थ्वाड़ा ले अन्यारो नाहातिन। 6 अगर हम कुंनू कि परमेश्वरा का दगाड़ हमरि संगति छै, फिरले अन्यारा में हिटूनमर्या, तो हम झूठ बोलनू और सच्चाई का अनुसार नै हिटना। 7 लेकिन अगर जसिकै परमेश्वर उज्याला में छै, उसीकैं हम ले उज्याला में हिटा, त हम ले एक-दुसारा दगाड़ संगति राखनू; और उको च्योलो यीशु मसीह को खून हमून सब पापून भटे शुद्ध करछो। 8 अगर हम कुंनू कि हमूले पाप नै कर्यो, त अपून आपस ध्वाका दीनू और हम येमें विश्वास नै करना कि परमेश्वर जो कुंछो उ सच्ची छै। 9 अगर हम अपून पापून परमेश्वरा का सामुनि मान लीनू, त उ हमार पापून माफ करून, और सब अधर्म भटे शुद्ध करून में विश्वासयोग्य और धर्मी छै। 10 अगर कुंनू कि हमूले पाप नै कर्यो त हम परमेश्वर स झूठ्ठो ठैहरूनू, और अब तक हमून ले परमेश्वरा का बचनून नै मानियो। |
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
Beyond Translation