1 कुरिन्थियून 8 - सोरियाली नय्या नियम

मूर्तिन खिन चढ़ाईना को खानो

¹ अब मूर्तिन का सामुनि बलि चढ़ाईना चीजून का बारिमें हम जाणनू कि हम सब ज्ञानी छा। सच्ची में ज्ञान हमून घमंडी बनूछो जब की प्रेम हमून एक-दुसारा खिन मददगार बनूछो।

² अगर कोई समझछो कि उ कै जाणछो, त उ ऐल तक यो कैले नै जाणनो जसो जाणू चैछो।

³ लेकिन अगर कोई परमेश्वर थैं प्रेम राखछो, त परमेश्वर उ आदिमी स जाणछो।

⁴ येक कारण अब मैं मूर्तिन का सामुनि बलि चढ़ाईना का चीजूनक बारिमें तुमोरो सवालो को जबाब दीन चाछूँ। हम जाणनू कि केवल एक्कै जीवित परमेश्वर छै और यो संसार में मूर्ति बेजान छन।

^5-6 लेकिन फिरले, आकाश में और धरती में कई लोगून परमेश्वर और प्रभु कयी जाछो। लेकिन हमून खिन एक्कै परमेश्वर छै और उई हमोरो पिता छै। उले सब कुछ बनाछ, और हम उक द्वारा ज्यूना छा। उसीकैं हमोरो एक्कै प्रभु छै और उ यीशु मसीह छै। उक द्वारा सब कुछ बनाई ग्यो छ्यो और उक द्वारा हम ज्यूना छा।

⁷ लेकिन हमार थ्वाड़ा विश्वासी ऐल तक नै जाणना कि मूर्तिन का पास कैले शक्ति नाहातिन, क्याखिनकि उन पैलि उन मूर्तिन की पुज करछ्या। अब जब उन, उन मूर्तिन का सामुनि बलि चढ़ाईना को खाना स खानान, जो गलत सोचनान कि उन ऐल ले उन मूर्तिन की पूजा में शामिल छन। और उन यो सोचभेरन परेशान हुनान कि अगर उन मूर्तिन को चढ़ाईना को खानो खानान त उन पाप कर चुक ग्यान।

⁸ लेकिन खानो हमून परमेश्वरा का नजदीक नै ल्या सकनो। अगर हम ऊस नै खाना त उले कैले नुकशान नाहातिन और ऊस अगर हम खानू, त उले कै फैद ले नाहातिन।

⁹ लेकिन सतर्क रया, इसो नै हो, कि तुमेरि यो आजादी विश्वास में कमजोर लोगून खिन पाप को कारण नै बनौ।

¹⁰ तुम जाणछा कि यो मूर्ति सच्ची में परमेश्वर नाहातिन, अगर कोई विश्वास में कमजोर छै, और उले तुमून वाँ खानो खान देख लीछो, त क्या ऊस मूर्तिन का सामुनि बलि चढ़ाईना की चीजून खाना की हिम्मत नी होलि, पर यो सोचून की इसो करून पाप छै।

¹¹ इसीकैं तुमार ज्ञाना का कारण जो विश्वासी भाई विश्वास में कमजोर छन उ मसीह में विश्वास करूनो बन्द कर द्योलो, जैखिन यीशु मसीह ले अपूनास बलिदान करछ्य।

¹² अगर हमार इसा काम करना ले हमार विश्वासी भाई अपराधी महसूस करनान, त हमुले उक खिलाफ और मसीहक खिलाफ ले पाप करछा।

¹³ येक कारण, अगर मूर्तिन को चढ़ाईनाक खान खाना ले दुसारा विश्वासी भाई विश्वास में कमजोर हुना को कारण बनछो, त मैं इसो खाना स कभै नी खूँ ताकि मैं दुसरा विश्वासीन का विश्वास स कमजोर हुना को कारण नै बनूँ।