1 कुरिन्थियून 7 - सोरियाली नय्या नियम

ब्याका बारिमें सवाल

¹ अब मैं उन सवालून का बारिमें जबाब द्यूलो, जो तुमूले अपून चिठ्ठी में पुछिनाक छ्या, हमून खिन क्या यो ठीक होलो कि ब्या नै करा?

² लेकिन मैं यो सला दीछूँ, कि ब्यभिचार भटे बचुन खिन हरेक आदिमी ब्या करौ, और अपूनी घरवालीक दगाड़ वफदार रौ।

³ यो जरूरी छै घरवालो अपूनी घरवाली खिन अपूनो कर्तव्य पुरो करौ; और उसीकैं घरवाली ले अपून घरवाला खिन अपूनो कर्तव्य पुरो करौ।

⁴ घरवाली स अपून शरीर में अधिकार नाहातिन लेकिन उमें उक घरवाला को अधिकार छै; उसीकैं घरवाला स ले अपून शरीर में अधिकार नाहातिना, लेकिन घरवाली को अधिकार छै।

⁵ तुम एक दुसारा भटे अलग जन रया; लेकिन तुम द्वीवै पैलि थ्वाड़ा बखत खिन अलग होभेरन एक-दुसारा भटे सहमत हो जा, कि तुम प्रार्थना कर सका, और येक बाद दुबारा फिर तुम दगाड़ मिलभेरन रौ, काँई इसो नै हो कि शैतान पापी स्वभाव में जीवन जीन खिन तुमेरि परीक्षा करौ और तुम अपूनी इच्छान काबू में नी कर पाला।

⁶ लेकिन मैं जो यो कुंछूँ उ केवल मेरि सला छै नै कि हुकुम।

⁷ मैं यो चाछूँ, कि जसो मैं कुवाँरा छूँ, उसीकैं सब आदिमी ले हुना; लेकिन हरेक परमेश्वरा का तरफ भटे खास बरदान मिलीनाक छन; कैसे ब्या करना को कैसे कुवाँरा रूना को।

⁸ लेकिन कुवाँरान और विध्वानक बारिमें मेरि यो सला छै, कि मेरि नियाती कुवाँरा रूना त ठीक हुनो।

⁹ लेकिन अगर उन अपूनास काबू नै कर सकना, त ब्या कर सकनान; क्याखिनकि शरीर की इच्छान में जलून है निको ब्या करूनो ठीक छै।

¹⁰ जिनोरो ब्या हो ग्योछ। उनून मैं नै, बल्कि प्रभु यीशु हुकुम दीछो कि घरवालो अपूनी घरवाली स तलाक नै दे।

¹¹ अगर उनूनमें तलाक हो ले ज्यौ, त दुसोरो ब्या करिना बिना रौ; या अपून घरवालाक दगाड़ फिर मिलभेरन रौ, और नै घरवालो अपूनी घरवाली स तलाक दे।

¹² लेकिन अब यो प्रभु को हुकुम नाहातिन पर मैं विश्वास करूनवाला लोगून थैं कुंन चाछूँ, जिनोरो ब्या विश्वास नै करूनवाला लोगून का दगाड़ हो ग्यो; अगर कोई मसीह भाई की घरवाली विश्वास नै करनी, और उक दगाड़ रून चांनी, त उको घरवालो ऊस तलाक नै दे।

¹³ और मैं विश्वासी बैनिनथैं बात करछूँ जिन लोगून ले इसा आदिमीनक दगाड़ ब्या कर रैछ जो विश्वासी नाहातिन, लेकिन उन उनार दगाड़ रून खिन खुश छै, त उन उनून तलाक नै दी।

¹⁴ जैको घरवालो विश्वासी नाहातिनो परमेश्वर ऊस ले अपूनो समझछो, क्याखिनकि उकी घरवाली विश्वासी छै। और उसीकैं जैकी घरवाली विश्वासी नाहातिनी, परमेश्वर ऊस ले अपूनो समझछो, क्याखिनकि उको घरवालो विश्वासी छै। अगर यो सच्ची नी हुनो, त परमेश्वर तुमार नान्तिना अपूनो नी समझनो, लेकिन अब तुमार नान्तिन ले परमेश्वरा का अपून छन।

¹⁵ लेकिन जो घरवालो या घरवाली विश्वासी नाहातिन, अगर उन आपस में तलाक लीन चानान त उनून तलाक लीन दी, जब इसो हुछो, त विश्वासी ऊस ब्याक रिशता भटे आजाद छै क्याखिनकि परमेश्वरे ले हमून शान्ति ले जीवन जीन खिन बुलाईना को छै।

¹⁶ हे घरवालीयो तुमून याद रून चैछो, कि तुमार कारण तुमार घरवाला अपून पापून भटे उद्धार पान, और हे घरवालो तुमून ले याद रून चैछो, कि तुमार कारण तुमेरि घरवालीन ले अपून पापून भटे उद्धार पान।

परमेश्वरा का बुलाहट का अनुसार चला

¹⁷ हरेक मण्डली का विश्वासीन थैं मैं यो कुंछूँ, जैस परमेश्वर ले जो हाल में तुमून चुन रैछ और तुमून अपून लोग हुन खिन बुला रैछ, उसीकैं विश्वासीन की मण्डली में बनिना का रौ। सब विश्वासीन की मण्डली खिन म्येरो योई संदेश छै।

¹⁸ एक उदारण खिन, अगर कोई यहूदी प्रभु यीशु में विश्वास करछो, त ऊस अपून यहूदी हुना की पछ्याण त्यागना की जरूरत नाहातिना। और उसीकैं अगर कोई आदिमी जो गैर-यहूदी छै, और प्रभु में विश्वास करछो, त ऊस यहूदी बनून खिन खतना करूना की जरूरत नाहातिन।

¹⁹ कैको खतना होईना हो या नै होईना को हो, येले कै फर्क नै पड़नो, लेकिन परमेश्वरा का हुकमून को पालन करून भौत जरूरी छै।

²⁰ हरेक आदिमी स परमेश्वर ले जस हालत में चुन रैछ और अपूनो लोग हुन खिन बुला रैछ, उसीकैं विश्वासीन की मण्डली में बनिना का रौ।

²¹ अगर कोई आदिमी दास छै, और प्रभु में विश्वास करछो, त तुमून यो बात को बुर नै लगूनो चैछो, हालाकि, अगर तुमोरो मालिक तुमून बतूछो कि तुम आजादी ले जा सकछा, त जा सकछा।

²² क्याखिनकि जो दास की हालत में परमेश्वर ले चुन रैछ और बुला रैछ, त उ एक आजाद आदिमी का नियाती छै क्याखिनकि प्रभु यीशु ले ऊस उक पापून भटे मुक्त करिना को छै, और उसीकैं जो आजादी का हालत में बुलाईना को छै, उन मसीहक दास बनून।

²³ परमेश्वरेले तुमून खिन एक भौत ज्यादा कीमत चुकाईना की छै, आदिमीन का दास जन बना, बल्कि परमेश्वरा का दास बना।

²⁴ हे म्यारा विश्वासी भाईयों, जो जस हालत में चुनी और बुलाई ग्योछ, उ उई में परमेश्वरा का दगाड़ रौ।

ब्याक बारिमें सवाल जबाब

²⁵ कुँवारीन का बारिमें प्रभु की कोई आज्ञा मैंस नै मिली, लेकिन परमेश्वरे ले अपून दयाक अनुसार मैंस ज्ञान दीछ जैमें भरोसा करि जा सकछो और मैं उक अनुसारै अपूनी सला दीछूँ।

²⁶ क्याखिनकि इन दिनून में हरेक जाग में विश्वासीन खिन मुशकिलुन को बखत छै येक कारण मैंस लागछो कि तुमून यो करून चैछो, जो लोग कुँवारा छन, उन कुँवारा रून।

²⁷ अगर तैं शादीशुदा छै, त अपूनी घरवाली है अलग हुना की कोशिश जन कर; और अगर कुँवारो छै, त ब्या करूना की कोशिश जन कर।

²⁸ अगर तेरो ब्या हो जाछो त कै पाप नाहातिन; और अगर कुँवारी को ब्या करि जौ त कै पाप नाहातिन; हलाकि, शादीशुदा लोग यो संसार में अपूनो जीवन में भौत मुसीबतून को अनुभव कराला, और मैं चाछूँ कि तुम उसीकैं मुसीबतून भटे बचिनाक रौ।

²⁹ हे म्यारा विश्वासी भाईयों, मैं यो कुंछूँ कि, मसीह को वापस उन में अब ज्यादा बखत नै बच र्यो, येक कारण यो बात ले परेशान जन हो, कि तुमेरि घरवाली छी या नाहातिन, लेकिन प्रभु यीशु की सेवा करना का बारिमें सोचनै रौ।

³⁰ जो लोग रूनान, माना की उन रूना नै; और जो लोग खुश छन माना उन खुश नै हुना, जो लोग अपून खिन चीज खरीदनान उनून इन सब चीजून का बारिमें ज्यादा परेशान नै हुनो चैनो, किलैकी इसो करभेरन तुम प्रभु सेवा भटे दूर हो सकछा।

³¹ और यो संसार में हमार पास जो कैले छै, हमून यो सोचून चैछो कि सब कुछ हमून खिन भौत कीमती नाहातिन, क्याखिनकि यो संसार में सब चीज नाश हो जालो।

³² मेरि यो इच्छा छै कि तुम सांसारै की इच्छान भटे दूर रौ। कुँवारो आदिमी प्रभु की बातुन की चिन्ता में रूछो कि प्रभु खुश राखूँ।

³³ लेकिन शादीशुदा आदिमी संसारे की बातुन की चिन्ता में रूछो, कि अपूनी घरवाली कसकैं खुश राखू।

³⁴ शादीशुदा और कुँवारी में फरक छै, कुँवारी चेलि परमेश्वरे की सेवा करना का बारिमें में चिन्ता करनै रूछी कि उ अपून मन और शरीर स प्रभु खिन अलग करून चाछी लेकिन शादीशुदा स्यैनि संसारे की चीजून की चिन्ता करनै रूछी कि कसकैं अपून घरवाला स खुश राखू।

³⁵ मैं यो बात तुमेरि भलाई खिन कुंछूँ, नै कि तुमून फसून खिन, बल्कि येक कारण कि जसो ठीक छै, ऊसोई करि जौ; ताकि तुम सब एक मन होभेरन प्रभु की सेवा करनै रौ।

³⁶ अगर तुमून में कोई आदिमी अपूनी चेलि स कुँवारी राखौ, और अब उ यो सोचछो कि यो एक निकी बात नाहातिन, क्याखिनकि ब्या करून खिन उकी उमर ढलून मरैछ, और अब बबा सोचछो कि उकी चेलि स सच्ची में ब्या करून चैछो, त ऊस उको ब्या कर दीन चैछो, इसो करूनो कैले गलत बात नाहातिन।

³⁷ लेकिन अगर उ बबा ले अपून मन में यो फैसला कर हैछ, कि उकी चेलि को ब्या करून ठीक नाहातिन, और केले ले ऊस इसो करून खिन मजबूर करिना को नाहातिन, त उक पास ऊसो करना को अधिकार छै। येक कारण अगर उ अपूनी चेलि को ब्या नै करना को फैसला करछो त उ परमेश्वरा का नजरून में निकी बात छै।

³⁸ त जो अपूनी कुँवारी चेलि को ब्या कर दीछो, उ निको करछो और जो ब्या नै करून दीनो, उ और ले निको करछो।

³⁹ जब तक कोई स्यैनि को घरवालो ज्यून छै, त ऊस उक दगाड़ रूनो चैछो, लेकिन जब उको घरवालो मर जाछो, त उ जैका दगाड़ चौ ब्या कर सकछी, लेकिन जरूरी यो छै कि उ आदिमी ले प्रभु में विश्वास करूनो वालो हुन चैछो।

⁴⁰ लेकिन अगर उ दुबारा ब्या नै करनी त म्यारा बिचार में और ले धन्य छै, और मैं समझछूँ, कि जब मैं तुमूनथैं इसो कुंछूँ त परमेश्वरे की आत्मा का तरफ भटे कुंछूँ।