1 कुरिन्थियून 6 - सोरियाली नय्या नियमआपसी झगड़ान को फैसला 1 अगर तुमूनमें भटे एक विश्वासी को दुसारा विश्वासीक दगाड़ झगड़ा हो जाछो, त फैसला खिन अदालताक पास नै जान चैनो; लेकिन तुमून अपून विश्वासीन की मण्डलीक दगाड़ फैसला करून चैछो कि तुम द्वीवै में भटे को सही छै। 2 तुमून जरूर मालूम हुन चैछो, कि हम विश्वासी लोग एक दिन संसारो को न्याय करला। और जब हमून यो संसारा लोगून को न्याय करून छै, त क्या तुम नाना-नान झगड़ान को ले फैसला करून योग्य नाहातिना? 3 तुमून यो ले मालूम हुन चैछो, कि हम दुष्ट दूतून को ले न्याय करला। त हम जरूर यो जीन्दगी में हुनवाला नानि-नानि बातुन को फैसला कर सकनू। 4 अगर तुमारा बीच सांसारिक झगड़ाई हुनान त क्या तुमार बीच कोई ले इसो बुद्धिमान नहातिनी, जो अपून दगाड़ विश्वासी का झगड़ा स शान्ति ले सुलझा सकौ? 5 तुमून शर्म ऊँनी चैछी, कि तुमार मण्डली में कम से कम एक बुद्धिमान आदिमी हुन चैछो जो विश्वासीन का बीच में झगड़ा को फैसला कर सकौ। 6 लेकिन यो मामला स एक विश्वासी दुसारा विश्वासीक खिलाफ अदालत में ली जाछो, उले अविश्वासीन का सामुनि। 7 जब तुमून में भटे कोई एक-दुसरा स अदालत में ली जाछो, त येक मतलब छै, कि तुम बिल्कुल ले मसीह का नियमून को पालन नै करना मर्या। अगर तुमार दगाड़ दुसरा विश्वासी भाई ले गलत करिना को छै, और ध्वाका ले तुमूनथैं थ्वाड़ा छीन लीछ, त कै जन करा। 8 लेकिन तुम त गलत करून मरेछा और ध्वाका दीन मरैछा, और तुम यो अपून विश्वासी भाई का दगाड़ करून मरेछा। 9 तुमून यो जरूर मालूम हुन चैछो, कि बुर करूनवाला लोग परमेश्वरा का राज्य का वारिस नी होला। कोई तुमून ध्वाका ले यो सोचून में मजबूर जन करा कि तुम बुर काम कर सकछा और फिर परमेश्वरा का लोगून का दगाड़ रै सकछा, नै बेश्याक दगाड़ संगति, नै मूर्ति पूजा, नै कोई स्यैनिक दगाड़ नजायज रिश्ता, नै लुचपन, नै आदिमी को आदिमीक दगाड़ नजायज रिशता, 10 नै चोरी करूनवाला, नै लालच करूनवाला, नै पियक्कड़, नै गाली दीन वालो, नै ठगबाजी करून वालो परमेश्वरा का राज्य का वारिस नी होला। 11 तुमूनमें भटे ले पैलि कुछ लोग इसो जीवन जी छ्या, क्याखिनकि तुम प्रभु यीशु मसीहक नाम ले और हमार परमेश्वरा का आत्मा ले तुमार पापून धो दीछ, और तुमून पवित्र और धर्मी बनाछ। शरीर और आत्मा ले परमेश्वरे की महिमा 12 तुमूनमें भटे कुछ लोग यो कौला, कि सब चीज करून खिन मैंस इजाजत छै, क्याखिनकि मैं एक विश्वासी छूँ, येक कारण सब चीज फैदाक नाहातिन; कि सब चीज करून खिन मैंस इजाजत छै लेकिन मैं कोई बातुन को गुलाम नी बनूलो। 13 तुमूनमें भटे कुछ लोग यो कौल, कि खानो हमार शरीर खिन, और शरीर हमार खान खिन छै, यो सच्ची छै लेकिन परमेश्वर हमार शरीर स ले और खान स ले नाश कर द्योलो। शरीर ब्यभिचार खिन नै, बल्कि हमार शरीर प्रभुक छन और उकी सेवा करून खिन बनिनाक छन। 14 येक अलावा, हमार शरीर भौत खास छै, क्याखिनकि जसीकैं परमेश्वरे ले प्रभु यीशु स मरिन में भटे ज्यून करून खिन अपूनी सामर्थ को इस्तमाल करछ्य, उसीकैं हमून ले मरिना में भटे ज्यूनो करोलो। 15 तुमून जरूर मालूम हुन चैछो, कि तुमार शरीर मसीहक अंग छन? त क्या एक आदिमी स अपून शरीर स लीभेरन, जो मसीह को छै। और येस बेश्याक दगाड़ जोड़ून चैछो? नै बिलकुल नै 16 पवित्रशास्त्र में लिखीना को छै, “उन द्वीवै एक तन होला।” त तुमून यो ले मालूम हुन चैछो, कि जो कोई बेश्याक दगाड़ सम्बन्ध बनूछो, उ बेश्याक दगाड़ एक तन हो जाछो। 17 और जो प्रभुक दगाड़ बनिना को रूछो त उकी आत्मा और प्रभु की आत्मा एक हो ग्यान। 18 ब्यभिचार भटे दूर रया, आदिमीक द्वारा करिनाको पाप उक शरीर उतुक प्रभावित नै करनो जतुक यो करछो, लेकिन ब्यभिचार करूनवाला अपून शरीराक खिलाफ पाप करछो। 19 तुमून जरूर मालूम हुनो चैछो, तुमोरो शरीर एक मन्दिर छै जैमें पवित्र आत्मा रूछो, और जो तुमून परमेश्वरा का तरफ भटे मिलीना को छै, और अब तुम अपून नाहातिना, लेकिन परमेश्वरा का छा। 20 क्याखिनकि परमेश्वरे ले यीशु मसीहक बलिदानाक द्वारा तुमून मोल ली हैछ, येक कारण अपून शरीराक द्वारा परमेश्वरे की महिमा करा। |
Soriyali New Testament (सोरियाली नय्या नियम) 2020 by The Love Fellowship is licensed under a Creative Commons Attribution-ShareAlike 4.0 International License.
Beyond Translation