1 कुरिन्थियून 5 - सोरियाली नय्या नियम

विश्वासीन की मण्डली में बुर काम

¹ मैंले लोगून तुमार बारिमें यो कुंनो सुण रैछ कि तुम लोगून में ब्यभिचार हुछो, लेकिन इसो ब्यभिचार त जो लोग परमेश्वरे स नै जाणना उन लोगून में ले नै हुनो, उ यो छै कि, एक आदिमी अपूनी सौतेली ईजाक दगाड़ ब्यभिचार करनान।

² और तुम अपून आप में भौत घमण्ड करछा, बल्कि तुमून दुख ले भरि जान चैछो, और तुमून इस लोगून अपूनी विश्वासी मण्डली भटे भ्यार निकाल दीनो चैछो।

³ हलाकि मैं वाँ तुमार दगाड़ नाहातिनू, लेकिन म्यारा बिचार तुमार दगाड़ छन, मैं वाँ तुमार दगाड़ नाहातिनू, लेकिन म्यारा मन में इसो छै कि मैंले सच्ची में इस काम करून वालानक खिलाफ अपूनो फैसला सुणा हालछ्य जो उन करून मर्यान।

⁴ जब तुम प्रभु मसीह यीशुक नाम ले इकट्ठा हुछा, तो म्यारा बिचार तुमार दगाड़ हुनान और प्रभु यीशु मसीह की सामर्थ ले तुमारा दगाड़ छै। त इसो आदिमी हमार प्रभु यीशु मसीहक अधिकार ले,

⁵ त उ आदिमी जो पापपूर्ण ब्यवहार करूनमर्योछ, ऊस अपूनी मण्डली है भ्यार निकाला और उ आदिमी स शैताना का हवाला कर दी, ताकि यो आश करि जा सकछी की उ अपून पापून है पश्चाताप करो। किलैकी अगर उ पश्चाताप करो, तब उ सच्ची में उ दिन बचाया जालो जब प्रभु न्याय करोलो।

⁶ तुमोरो घमण्ड करूनो बिल्कुल ले ठीक नाहातिन; कि थ्वाड़ा खमीर पुर ओलीना को धुलास खमीर कर दीछो? उसीकैं, अगर एक आदिमी स पाप करना की इजाजत दी जाछी, त जल्दी सब उई करून खिन प्रभावित होला।

⁷ इस काम करूनवाला लोगून थैं कौ कि उ तुमार मण्डली को हिस्सा नै हो सकनो। तब तुम विश्वासीन की मण्डली को हिस्सा होलो जो एक नय्या और शुद्ध रिशता में एक-दुसराक दगाड़ जुड़ला जैमें कोई पाप को कोई असर नै हो, क्याखिनकि परमेश्वरे ले पैलि भटेई तुमून माफ करिना को छै और तुमून पवित्र करिना को छै। तुमून पवित्रताक दगाड़ जीवन जीनो जरूरी छै। क्याखिनकि हमून हमार पापून भटे छुटकारा दीन खिन मसीह बलिदान हो ग्योछ। यो हमून उन भेड़ा का पाठान की याद दिलूछो जो इस्राएलियून ले फसहक दिन मिस्र में भौत पैलि बलिदान कर्यान।

⁸ येक कारण मैं कुंछूँ कि हमून हमेशा परमेश्वरा का पवित्र लोगून को जसो ब्यवहार करूनो चैछो। हमून बुर कामून में जीवन नै जीनो चैछो जसो कि हम मसीह में विश्वास करून है पैलि करछ्या, मतलब उन बुर और दुष्ट कामून करूनो बन्द कर दीनो चैछो जो हम करछ्या। येक बजाय, हमून परमेश्वरा का हुकमून को पालन करून छै और कोई ले बुरो काम करून नाहातिन, बल्कि हमून हमेशा ईमानदार और भरोसमंद हुन चैछो।

⁹ मैंले अपूनी चिठ्ठी में तुमून लिखीना को छै, कि ब्यभिचारीन की संगति जन करा।

¹⁰ यो नै, कि तुम बिलकुल यो संसाराक ब्यभिचारीन, या लोभीन, या ध्वाका दीन वालान, या मूर्तिपूजकून की संगति जन करा; क्याखिनकि यो दशा में त तुमून संसार में भटे निकल जानो पड़ूनो।

¹¹ म्येरो यो कुंनो छै; कि अगर कोई अपून-आपस विश्वासी कुंनवालो, जो ब्यभिचारी, या लोभी, या मूर्तिपूजक, या गाली दिनवालो, या पियक्कड़, या अंधेर करूनवाला हो, त उकी संगति जन करा; बल्कि इसा आदिमी का दगाड़ खानो ले नै खान चैनो।

¹² क्याखिनकि जो लोग विश्वासी नाहातिन उनोरो न्याय करून हमरि जिमेदारी नाहातिनी, लेकिन तुम उन लोगून डाँठून चैछो, जो तुमार विश्वासीन की मण्डलीक छन।

¹³ लेकिन जो लोग विश्वासी नाहातिन, उनोरो न्याय परमेश्वर करछो। लेकिन पवित्रशास्त्र में लिखीना को छै, कि उ दुष्ट आदिमी तुमार मण्डलीक हिस्सा नै हो सकनो।