1 कुरिन्थियून 15 - सोरियाली नय्या नियम

मसीह को पुरूत्थान

¹ हे म्यारा विश्वासी भाईयो, मैं तुमून उई सुसमाचार याद दिलून चाछूँ जो तुमून पैलि सुणा चुक गयूँ, जो सुसमाचार में तुमूनले विश्वास ले करछ्य और जैमें तुम मजबूत ले छा।

² परमेश्वर तुमोरो उ सुसमाचाराक द्वारा उद्धार करछो अगर तुम उ सुसमाचार में विश्वास करून नै छोड़ना जैको मैंले तुमार बीच में प्रचार करछ्य, वरना तुम बेकार में विश्वास में आईनाक छ्या।

³ योई कारण मैंले तुमून उई सबून है जरूरी सुसमाचार बताछ जो मैंस प्रभु यीशु भटे मिलीनाको छ्यो। उ सुसमाचार यो छै कि पवित्रशास्त्राक बचनाक अनुसार यीशु मसीह हमार पापून खिन मर ग्यो।

⁴ और गाड़ी ग्यो; और पवित्रशास्त्राक अनुसार तीसारा दिन परमेश्वरे ले ऊस मरिन में भटे ज्यूनो कर दीछ।

⁵ और तब पतरस (कैफा) स और बारा शिष्यून दिखाई दीछ।

⁶ फिर पाँच सौ भटे ज्यादा शिष्यून एक दगाड़ दिखाई दीछ, जिनूनमें भटे भौत सारा ऐल तक ज्यूना छन लेकिन थ्वाड़ा मर ग्यान।

⁷ बाद याकूब स और सब प्रेरितून ले दिखाई दीछ।

⁸ और सबून का बाद मैंस ले दिखाई दीछ, और जो कि उ बच्चाक जस छै, जो बखत है पैलि पैद भ्योछ।

⁹ क्याखिनकि मैं प्रेरितून में सबून है नानो छूँ, सच्ची पुछा, त मैं प्रेरित कहलून लकारी को ले नाहातिन, किलैकी मैंले परमेश्वर में विश्वास करूनवाला लोगून सताईना को छ्यो।

¹⁰ लेकिन आज मैं प्रेरित छूँ त उ परमेश्वरो को अनुग्रह छै। और उको अनुग्रह जो मैंमें भ्योछ, उ बेकार नै भ्यो लेकिन मैंले और प्रेरित है ज्यादा मेहनत ले करछ्य यो ले म्यारा तरफ भटे नै भ्यो लेकिन परमेश्वर अनुग्रह ले म्यारा द्वारा काम करून मरैछ्यो।

¹¹ येक कारण चाहे मैं छूँ, चाहे उन दुसारा प्रेरित हुन, हम सबून ले मसीहक बारिमें एक्कै सुसमाचारो को प्रचार करनू, और येमें तुम विश्वास ले करछा।

मरिन में भटे ज्यूनो हुनो

¹² येक कारण अब मैं तुमूनथैं यो पुछून चाछूँ: क्याखिनकि हम सबून ले तुमार बीच योई प्रचार करछ्य कि जब मसीह मर ग्यो त ऊस फिर ज्यूनो करि ग्योछ त तुमून में भटे कोई ले यो नै कौ कि परमेश्वर विश्वासीन का मरना का बाद दुबारा ज्यून नी करोलो।

¹³ अगर मरिनान को ज्यूनो हुनो नाहातिन, त मसीह ले ज्यूनो नै भ्यो।

¹⁴ और अगर मसीह मरिनान में भटे ज्यूनो नै भ्यो, त जो सुसमाचारो को हम प्रचार करनू उले बेकार छै और मसीह में तुमोरो विश्वास ले बेकार छै।

¹⁵ येक अलावा, हम पक्का तरीका ले उ गवाह छा जिनूनले परमेश्वरा का बारिमें झूठ बोलछ्य, क्याखिनकि हमूले गवाई दीछ कि उले मसीह स मरिनान में भटे ज्यूनो करछ्य। लेकिन अगर यो सच्ची छै कि मरीनाक ज्यून नै हुना, त परमेश्वरे ले मसीह स मरिन में भटे ज्यूनो नै कर्यो।

¹⁶ अगर मरीनाक लोगून मौताक बाद ज्यून नै हुना, त मसीह ले मौताक बाद ज्यूनो नै भ्यो।

¹⁷ और अगर मसीह ज्यूनो नै भ्यो, त तुमोरो मसीह में विश्वास करूनो बेकार छै; और तुम अब ले अपून पापून में जीन मरैछा।

¹⁸ अगर मसीह मरिनान में भटे ज्यूनो नै भ्यो, त जो विश्वासी मर ग्यान, उन बचाई नी ग्या, बल्कि उन ले नाश हो ग्यान, मतलब यो कि हमेशा खिन परमेश्वर भटे अलग हो ग्यान।

¹⁹ अगर मसीह में हमेरि आश केवल यो जीवन खिन छै, त हमून में संसार में औरून की तुलना में सबून है ज्यादा हमरि हालत खराब छै।

²⁰ लेकिन सच्चाई यो छै कि परमेश्वरे ले मसीह स, जो पैल आदिमी छै जैस मरिन में भटे ज्यूनो करछ्य, और उ यो बात को सबूत छै उ उन लोगून ले ज्यूनो करोलो जो मर चुक ग्यान।

²¹ त तुम देखछा, कि यो संसार में मौत पैल आदिमी आदमाक द्वारा आछ, और उसीकैं मरिनान में भटे ज्यूनो हुन में ले एक आदिमी मसीहक द्वारा शुरू हो ग्योछ।

²² सब मरनान क्याखिनकि हम सबै पैल आदिमी आदमाक वंशज छा। लेकिन उन सब जो दुसरा आदिमी मसीह में जुड़िनाक छन, उनून नय्या जीवन दीई जालो।

²³ लेकिन हरेक आदिमी स अपून-अपून बारीक अनुसार मरिनान में भटे ज्यूनो करि जालो; मसीह जो पैल आदिमी छ्यो जैस मरिन में भटे ज्यूनो करि ग्योछ, फिर जब मसीह वापस आलो त जो उक दगाड़ मजबूत रिशता राखनान उनून दुबारा मरिन में भटे ज्यूनो करि जाला।

²⁴ फिर, जब मसीह परमेश्वरो को बिरोध करून वाली सबै बुरी ताकतून नाश कर द्योलो, उक बाद संसारो को अन्त हो जालो। तब मसीह अपून पिता परमेश्वरो को राज्य सौंप द्योलो कि उ उमें पुर तरीका ले राज्य करौ।

²⁵ मसीह स उ राज्य में राज करूनो चैछो जब तक कि परमेश्वर उक सब दुश्मनून पुरी तरीका ले हरा नै द्यो।

²⁶ जो दुशमनश सबून है आखरी में नाश करि जालो उ मौत छै।

²⁷ क्याखिनकि पवित्रशास्त्र कुंछो कि “परमेश्वर सब कुछ मसीहक अधिकार में कर द्योलो,” त यो पक्का छै कि येमें परमेश्वर शामिल नाहातिन क्याखिनकि उई छै जैले मसीह स अधिकार दीईना को छ्यो।

²⁸ जब सब कुछ परमेश्वरा का च्यालाक अधिकार में हो जालो, त उ खुद स पुर तरीका ले परमेश्वरा का अधिकार में कर द्योलो, जैले ऊस यो अधिकार दीछ। ताकि परमेश्वरै सबून खिन सब कुछ हो।

²⁹ अगर मरीनाक ज्यून नै करि जाना, त लोग की कराला जो उनून खिन बपतिस्मा लीन मर्यान? त उन मरीनाक लोगून का तरफ भटे उनून बपतिस्मा किलै दी जानमर्योछ?

³⁰ जाँ तक हमरि बात छै, अगर मरीनाक ज्यून नै करि जाना त हमोरो खुद स खतरा में डालून मूर्खता छै।

³¹ हे म्यारा विश्वासी भाईयो, मैं हर दिन मौत को सामना करछूँ। मैं जो कुंछूँ उ बिल्कुल सच्ची छै जसकैं कि यो ले सच्ची छै कि मैं भौत खुश छूँ किलैकी तुम हमार प्रभु यीशु मसीह में विश्वास करछा।

³² या इफिसुस में, म्यारा दुशमन एक खतरनाक जानवर की नियाती छन जो मैंस नुकशान पुजून चानान। अगर म्योरो ईनाम केवल यो संसार मेंई छै, त मैंस यो सब सहन करना कि जरूरत छै। अगर यो सच्ची हुनो कि मैंस आखरी दिन में दुबारा ज्यूनो नी करि जालो, त बड़िया हुनो कि मैं मौज करनू, जसकैं यो कहावत छै, “आ हम खानू-पीनू किलैकी शायद भोल हम मर जूला और उ हमोरो अन्त होलो।”

³³ जो लोग इसकैं त बात करनान उनार द्वारा बेकुफ जन बना, “बुरी संगति निको चरित्र स ले बिगाड़ दीछी।”

³⁴ तुम सतर्क होज्या, और पाप करून छोड़ दी; किलैकी तुमूनमें भटे थ्वाड़ा लोगून को परमेश्वरा का दगाड़ ठीक रिशता नाहातिन, मैं तुमून शर्मिन्दा करून खिन यो कुंछूँ।

हमून कसो शरीर मिलोलो

³⁵ अगर उदारण खिन कोई पूछछो, कि परमेश्वर मरिन में भटे कसकैं ज्यूनो करोलो, और उनोरो शरीर कसो होलो।

³⁶ म्योरो जबाब यो छै कि मूर्ख जन बना, जो केले तुम बूछा, जब तक अंकुर नै निकलनो तब तक उ नै बढ़नो।

³⁷ जो केले तुम बूछा, चाहे ग्यूँ हो या के और, यो केवल एक बीज छै। उको उ रूप नाहातिन जो बोटो को होलो।

³⁸ लेकिन परमेश्वर अपूनी इच्छाक अनुसार उ बोट स उ रूप दीछो जो उ खिन चाछो। हरेक प्रकारो को बी अपून रूप में बढ़छो।

³⁹ अगर हम धरती में रून वाला सबै जानवरून का बारिमें ले सोचा त उन सब ले एक जसा नी देखीना। आदिमीन को अलग रूप हुछो। पक्षीनको अलग रूप हुछो। माँछान को अलग रूप हुछो। हर प्रकाराक जानवरून अलग रूप हुछो।

⁴⁰ और जसकैं धरती में अलग प्रकाराक शरीर छन, उसीकैं आकाश में ले छन जसीकैं सूरज, चाँद और तारा छन, आकाश की चीजून में एक तरीका की खुबशुरती हुछी, और धरती की चीजून में एक दुसरी तरीका की खुबशुरती हुछी।

⁴¹ सूरज की खुबशुरती अलग छै और चाँद की खुबशुरती अलग छै, और तारान की खुबशुरती अलग छै, क्याखिनकि एक तारा है दुसारा तारा की खुबशुरती में फरक छै।

⁴² त इसोई मरीनाक लोगून को दुबारा ज्यूनो हुन में ले होलो। जो शरीर स उ उन दफनूनान उ इसा शरीर छन जो सड़ जानान, लेकिन जब यो दुबारा है ज्यूनो होलो त यो एक इसो शरीर होलो जो सड़ नै सकूनो।

⁴³ जब हमार शरीर स दफनाई जाछो तब हमोरो शरीर बदसूरत और कमजोर हुछो। लेकिन जब उ दुबारा है ज्यूनो होलो, त उन खुबशुरत और शक्तिशाली होलो।

⁴⁴ एक आदिमी को शरीरै स जसीकैं दफनाई जाछो, उ केवल यो संसार में कोई ले आदिमीक जीवन खिन लायक छै। लेकिन जब परमेश्वर ऊस दुबारा है ज्यूनो करछो, त उको नय्या शरीर स्वर्ग में जीवन जिनाका योग्य होलो। अगर एक इसो शरीर छै जो केवल संसार में रून लायक छै, त एक इसो शरीर ले होलो जो स्वर्ग में रूनो लायक छै।

⁴⁵ पवित्रशास्त्र में यो ले लिख रैछ कि, “यो धरती को पैल आदिमी, मतलब आदम, जीवित प्राणी बनछ्य,” और आखरी आदम, जो कि मसीह छै, यो उई छै जो अनन्त जीवन दीछो।

⁴⁶ उ जीवन जो स्वर्ग में हमेशा खिन छै, पैलि नै ऊँनो; बल्कि जो जीवन पैलि ऊँछो, उ यो धरती को जीवन छै। और उक बाद, स्वर्ग को जीवन आलो।

⁴⁷ पैल आदिमी जो आदम छ्यो धरतिक माटा ले बनिना को छ्यो। मसीह जो कि दुसोरो आदिमी छै, जो स्वर्ग भटे आछ।

⁴⁸ आदमाक वंशज ले उसीकैं धरतिक माटा ले बनिनाक छन, जसो उ छै। लेकिन उन लोग जो स्वर्गाक आदिमी छन जो यीशु मसीह की सुणनान, उन ले उका जस छन।

⁴⁹ और जसकैं परमेश्वरे ले हमून ऊसो शरीर दीछ जसो धरतिक पैल आदिमी को छ्यो, उसीकैं हम विश्वासीन को मसीह को जसो शरीर होलो, जो अब स्वर्ग में छै।

⁵⁰ हे म्यारा विश्वासी भाईयो, मैं यो कुंछूँ, यो धरती में हमोरो शरीरो मास और खून ले बनिना को छै; हम स्वर्ग में परमेश्वरा का राज्य में अपून यो शरीराक दगाड़ प्रवेश नी कर पाला। हम स्वर्ग में अपून इस शरीराक दगाड़ नै रै सकना जो मर सकछो, क्याखिनकि वाँ कोई मौत नाहातिन।

⁵¹ सुणो, मैं तुमूनथैं भेद की बात करछूँ, कि हम सब विश्वासी नी मरला, लेकिन हम सबून को रूप बदल जालो।

⁵² यो अचानक होलो, इतुक जल्दी ले जतुक देर कोई अपूनो आँख की पलक झपकून में करछो। जब आखरी तुरी बजाई जालि, त जो लोग मर चुक ग्यान उन हमेशा खिन जीवन जीन खिन दुबारा ज्यून करि जाला और हम जो ज्यूना छा, हमार शरीर बदल जाला।

⁵³ क्याखिनकि हमोरो यो शरीर जो आसानी ले मर जाछो और सड़ जाछो, ऊस एक इस शरीर में बदली जानो चैछो जो नै कभै मरूनो और नै कभै सड़नो।

⁵⁴ जब इसो होलो, त उ पुर हो जालो जो पवित्रशास्त्र में लिखीना को छै, “मौतस पुर तरीका ले हरा दी जालो और मौतो को नामो निशान नी रोलो।”

⁵⁵ उसीकैं यो ले पुर होलो, जो पवित्रशास्त्र में लिखीना को छै, “हे मौत काँ छै तेरि जय? हे काँ र्यो तेरो डंक? इसीकैं पवित्रशास्त्र में जो लिखीना को छै उ पुरो होलो।”

⁵⁶ क्याखिनकि पाप इसो डंक छै जैको नतीजा मौत हुछी, और नियम-कानून पाप स अपूनी शक्ति दीनान।

⁵⁷ लेकिन परमेश्वरो को धन्यबाद हो, जो हमार प्रभु यीशु मसीह ले हमून खिन करिना को छै उक द्वारा परमेश्वरे ले हमून पाप और मौत में जीत दीछ।

⁵⁸ येक कारण हे म्यारा विश्वासी भाईयों, अपून विश्वास में मजबूत रौ और गलत शिक्षान का द्वारा जन भटका, प्रभु खिन जो काम तुम करछा उमें हमेशा बढ़नै जा। क्याखिनकि यो जाणछा, कि जो केले तुम प्रभु खिन करला उको ईनाम तुमून जरूर मिलोलो