1 कुरिन्थियून 12 - सोरियाली नय्या नियम

आत्मिक बरदान

¹ हे म्यारा विश्वासी भाईयों, मैं नै चाँछूँ कि उ सवाला का बारिमें जो तुमूले आत्मिक बरदानून का बारिमें मैंथैं पुजछ्य, तुम निकीकैं समझा।

² तुम जाणछा कि तुम विश्वासी बनून है पैलि कसीकैं जीवन जी छ्या, त कोई तुमोरो मार्गदर्शन करून मरैछ्यो ताकि तुम गूँगी मूर्तिन की अराधना करा।

³ येक कारण मैं चाछूँ कि तुम जाण ली, जो कोई परमेश्वरै का आत्मा का अगुवाई ले बोलछो उ नै कुंनो कि यीशु श्रापित छै; और नै कोई पवित्र आत्मा का बिना कै सकनो कि “यीशु प्रभु छै।”

⁴ पवित्र आत्मा का द्वारा मिलीना का बरदान त अलग-अलग छै, लेकिन पवित्र आत्मा एक्कै छै।

⁵ और अलग-अलग सेवा करून खिन लोगून का पास बरदान छन, लेकिन हम लोग एक्कै प्रभु की सेवा करनू।

⁶ परमेश्वरा का काम करून खिन अलग-अलग तरीका छन, लेकिन परमेश्वर एक्कै छै, जो हम सबून का द्वारा काम करछो।

⁷ हमून में भटे हरेक स एक इसी काबिलियत दी जांछी जो पवित्र आत्मा की मौजूदगी स बतूछी ताकि हम अपून दगड़िया विश्वासीन की मद्दत करा।

⁸ किलैंकी परमेश्वरो को आत्मा एक आदिमी स बुद्धि की बात सुणना को वरदान दीछो, और उई आत्मा दुसरा स ज्ञान की बात सुणूना को वरदान दीछो।

⁹ और कैसे उ आत्मा का द्वारा मसीह में विश्वास मजबूत करना को वरदान दीछो और कैसे उ आत्मा का द्वारा बिमारून चंगो करना को वरदान दी जाछो।

¹⁰ कैसे सामर्थ का काम करना को वरदान; और कैसे भविष्यवाणी को; और कैसे आत्मान परखनान वरदान, और कैसे अनेक प्रकारे की भाषा बोलना को वरदान; और कैसे भाषान को अर्थ बतूना को वरदान दीछो।

¹¹ सबै वरदान एक्कै आत्मा का काम छन। उ हरेक विश्वासी स वरदान दीछो जसो पवित्र आत्मा चांछो।

शरीर एक अंग अनेक

¹² किलैंकी आदिमी को शरीर एक्कै छै और उक अंग भौत छन, और उ एक शरीर का सब अंग भौत हुन में ले सब मिलभेरन एक्कै शरीर छै उसीकैं मसीह ले और उमें विश्वास करूनवाला विश्वासी ले एक्कै छन।

¹³ किलैकी हम सबून ले क्या यहूदी छन, क्या गैर-यहूदी, क्या दास, क्या स्वतंत्र एक्कै आत्मा का द्वारा एक शरीर हुन खिन बपतिस्मा लीछ, और हम सबून एक्कै आत्मा मिलछ्य, जसीकैं हम सब एक्कै कटोरा भटे अंगूरो को रस पीनू।

¹⁴ हमार शरीर में एक्कै अंग नाहातिन, लेकिन भौत छन।

¹⁵ मान ली, अगर खुटो कौ, कि मैं हात नाहातिनू येक कारण मैं शरीरो को अंग नाहातिनू, त क्या उक इसो कुंना ले उ शरीरो को अंग नाहातिनी?

¹⁶ और अगर कान कौ, “मैं आँख नाहातिनू येक कारण मैं शरीरो को अंग नाहातिनू,” त क्या उक इसो कुंना ले उ शरीरो को अंग नाहातिनी?

¹⁷ अगर पुरो शरीर आँखाई हुनो त सुणूना क्याले? अगर पुरो शरीर कानै हुनो त सुंगूनो क्याले हुनो?

¹⁸ लेकिन सच्ची में परमेश्वरेले हमार शरीर का अंगून अपूनी इच्छा का अनुसार हर अंग स शरीर में ऊसोई जाग दी रैछ।

¹⁹ अगर पुर एक्कै अंग हुनो, त शरीर नी हुनो।

²⁰ येक कारण, भले शरीर का कई अंग छन, फिरले शरीर एक्कै छै।

²¹ आँख हात थैं नै कै सकनो, “मैंस तेरि जरूरत नाहातिन,” और नै खोरो खुटान थैं कै सकनो, “मैंस तेरि जरूरत नाहातिन।”

²² लेकिन शरीरा का उन अंग जो औरून है कमजोर लागनान, उन भौतई जरूरी छन।

^23-24 और शरीरा का जिन अंगून को हम कम आदर योग्य समझनू उनूनले हम ज्यादा आदर दीनू; और हमार बतशुरत अंग और ले भौत खुबशुरत हो जानान, और जिन अंगून हम कम आदर का योग्य माननू उनून सबून है ज्यादा ध्यान ले कपाड़ा पैनुनू। येक कारण हम ध्यान ले उन हिस्सा की रक्षा करनू जिनून नै देखी जानो चैछो, जब की ज्यादा आदरा का योग्य हिस्सान की इतुक बिशेष देखभाल की जरूरत नै हुनी। येक कारण परमेश्वरेले शरीरै स इसीकैं बना रैछ कि उन हिस्सान को ज्यादा सम्मान और देखभाल दी जौ जिनोरो महत्व कम छै।

²⁵ परमेश्वरेले इसो येक कारण करछ्य ताकि शरीरा का अंग एक दुसरा का दगाड़ नी लड़ाला, उनून एक दुसारा खिन एक जसी देखभाल हुन चैछी।

²⁶ अगर शरीरै को कोई एक अंग दुख पाछो त उक दगाड़ शरीर का और ले सबै अंग दुखी हुनान। अगर कोई एक अंग को मान बढ़छो त उक दगाड़ सबै अंग उकी खुशी में भागी हुनान।

²⁷ इसीकैं तुम सब ले मिलभेरन मसीह का शरीर छा, और तुमूनमें भटे हरेक उक शरीर का अंग छा।

²⁸ मसीह का यो शरीर में, जो विश्वासीन की मण्डली छन, परमेश्वरेले हमून अलग प्रकारै की सेवा खिन चुन रैछ। सबून है पैलि, उनून प्रेरित, दुसारा परमेश्वरो को संदेश दिनवाला, तीसारा सिखून वाला, फिर चमत्काराक काम करूनवाला, फिर चंगो करूनवाला, और उपकार करूनवाला, और प्रधान, और हर प्रकार की भाषा बोलूनवालो।

²⁹ हर कोई प्रेरित नाहातिन। हर कोई परमेश्वरो को संदेश दिनवाला नै हुनो। हर कोई सिखूनवालो नै हुनो। हर कोई चमत्कारा का काम करून वालो नै हो सकनो।

³⁰ सबून चंगाई करूना को बरदान नै मिल रियोछ, सब हर प्रकार की भाषा नै बोल सकना।

³¹ सब भाषान का अनुवाद करूनवाला नै हुना, येक कारण तुमून ईमानदारी ले सबून है उपयोगी बरदानू की इच्छा करूनी चैछी। लेकिन अब मैं तुमून सबून है निको बाटो देखुछूँ।