1 कुरिन्थियून 10 - सोरियाली नय्या नियम

इस्राएलीन का इतिहास भटे चेतवानी

¹ हे म्यारा विश्वासी भाईयो, मैं चाछूँ कि तुम याद राखा, बिरान जागा में हमार पूर्वजून का दगाड़ भौत पैलि कि भ्योछ। परमेश्वरेले उन सबून की अगुवाई एक बादल भेजभेरन करछ्य, जो उनार अघिल-अघिल हिटून मरेछ्यू, और उले उन सबून सुखी जमीन मैं लाल सागरा का पानिक बीच भटे सुरक्षित पुजाछ।

² जसीकैं हम प्रभु यीशु का शिष्य बनून खिन बपतिस्मा लीनू, उसीकैं उन सबै बादला का छाया में छ्या और मूसा का शिष्य बनून खिन लाल सागर भटे ग्यान।

³ उन सबून ले उई रोटो खाछ जैस परमेश्वरेले उनून खिन स्वर्ग भटे दीईना को छ्यो।

⁴ उन सबून ले उई पानि पीछ जो परमेश्वर ले उनून दीछ। उनूनले एक चट्टान भटे निकलून वाला पानि स पीछ, और उ चट्टान की तुलना मसीह खिन करि जा सकछी जैले उनार दगाड़ रैभेरन उनून जीवन दीछ।

⁵ लेकिन परमेश्वर उनूनमें भटे भौतून भटे खुश नी छ्यो, येक कारण उन बिरान जागा मेंई उनार प्राण निकलग्या।

⁶ भौत पैलि हमार पूर्वजून का दगाड़ होईना की यो बात हमून खिन चेतावनी छन कि अगर हम उनार नियाती बुराई करना की इच्छा राखनू त कि होलो।

⁷ और नै तुम मूर्ति पूजा करा; जसो कि उनूनमें भटे कतुक करछ्या, जसो पवित्रशास्त्र में लिखीना को छै, “लोग खान-पिन खिन दावत में बैठग्या और आनन्‍द मनून खिन उठ ग्या।”

⁸ और हमोरो कैका दगाड़ ले नाजायज रिशता नै हुनो चैनो जसो उनूनमें भटे कतुक कुंन ले करछ्य और एक दिन में तेईस हजार मर ग्या।

⁹ और नै हम प्रभु स परखा; जसो उनूनमें भटे कत कुंन ले करछ्य, और स्याँपून का डसना का द्वारा मर ग्या।

¹⁰ और नै तुम कुड़कुड़ा, जसा तरीका ले उनूनमें भटे कतुक कुढ़-कुड़ायान, और एक स्वर्गदूत का द्वारा मारी ग्यान, जैस परमेश्वरेले भेजिना को छयो।

¹¹ लेकिन यो सब बात, जो उनूनमें भ्यान, एक चेतावनी का नियाती छी; और उ हमून चेतावनी दीन खिन लिखीना का छन, जो यो संसार का अंत बखत में रून मर्यान।

¹² येक कारण अगर वाँ कोई इसो आदिमी छै जो कुंछो कि परमेश्वर में उको भरोसा मजबूत छै, त ऊस सतर्क रूनो चैछो कि इसो नै हो कि उ अचानक विश्वास भटे भटक जौ और उ पाप करौ।

¹³ पाप करूना की इच्छा हम सबून का पास जरूर ऊँछी, मगर परमेश्वर सच्चो छै। उ तुमून कोई इसी परीक्षा में नी पड़ून द्योलो, जो तुमेरि ताकत है भ्यार हो लेकिन उ परीक्षा का दगाड़ उपाय ले करोलो कि तुम विश्वास में मजबूत रै सका।

मूर्ति पूजा का खिलाफ चेतवानी

¹⁴ यो कारण, हे म्यारा विश्वासी भाईयो, तुमोरो मूर्ति पूजा भटे कै लीन दीन नाहातिन।

¹⁵ मैं तुमून मसीह में समझदार समझभेरन कुंछूँ, जो मैं कुंछूँ, उक बारिमें ध्यान ले सोचा, जो मैं कुंन जान मरयूँ उ ठीक छी या नाहातिन।

¹⁶ जब हम प्रभु भोज में इस्तमाल करि जानवाला कटोर में भटे अंगूरो का रस पीनू, जै खिन हम परमेश्वरो को धन्यबाद दीनू, त हम सच्ची में मसीह का खून स साझा करून मर्यान। और जब हम रोटा स तोड़नू और येस खानू, त हम सच्ची में मसीह का शरीरै स साझा करूनमर्यान।

¹⁷ क्याखिनकि एक रोटो यो बात को चिन छै कि हम जो भौत छा मसीह में एक शरीर छा, क्याखिनकि हम सब एक्कै रोटा में भटे खानू।

¹⁸ जरा इस्राएल का लोगून का बारिमें सोचा, जब सबै लोग परमेश्वरा का चढ़ाई जानवाला खाना स खानान त परमेश्वरै की पूजा में भाग लीनू। इसीकैं जो लोग मूर्तिन को चढ़ाई जानवाला खाना स खानान उले उन मूर्तिन की पूजा में भाग लीनान।

¹⁹ मैं यो नै कुंनू कि मूर्तिन को चढ़ाईना की चीजून की कै कीमत छै या मूर्तिन को कै महत्व छै।

²⁰ नै! बिल्कुल नै। बश यो, कि जो चीज स लोग मूर्तिन का अघिल बलिदान करनान, उ परमेश्वर खिन नै, लेकिन शैतान खिन बलिदान करनान और मैं नै चानू, कि तुम शैतान का भागीदार बना।

²¹ यो नै हो सकनो कि तुम प्रभु का कटोर में भटे और शैतान का कटोर में भटे नै पी सकना। इसीकैं तुम प्रभु की मेज और शैतान का मेज द्वीवैन का भागीदार नै हो सकना।

²² अगर तुम इसो करछा, त तुम प्रभु स भौत क्रोधित करछा। याद राखा कि तुम उ है ज्यादा शक्तिशाली नाहातिन।

सब कुछ परमेश्वरे की महिमा खिन

²³ तुमून में भटे थ्वाड़ा कुंनान, कि हम कैले करून खिन आजाद छा। होई, लेकिन हमून खिन सब कुछ ठीक नाहातिन। हम कैले करून खिन आजाद नाहातिना, लेकिन सब कुछ परमेश्वर में हमार विश्वास स मजबूत नै करनो।

²⁴ तुमूनमें हरेक अपूनी भलाई का बारिमें जन सोचा, लेकिन दुसरान का भलाई का बारिमें ले सोचा।

²⁵ लेकिन जब तुम बाजार भटे शिकार खरीद छा त ऊस खा ली। लेकिन यो जन पुछा कि यो मूर्तिन को चढ़ाईना छी या नाहातिन, और इसो करना ले तुमोरो जमीर परेशान नी होलो।

²⁶ तुम खा सकछा, क्याखिनकि पवित्रशास्त्र में लिख रैछ, कि “धरती और उमें जो कैले छै, उ प्रभु को छै।”

²⁷ जो लोग विश्वासी नाहातिन, अगर उन तुमून दावत में बुलून और तुम जाना चाछा, त जो कैले तुमार सामुनि राखि जौ उई खाया। हालाकि यो जन पुछा कि यह मूर्तिन को चढ़ाईना को छै या नाहातिन, और इसो करना ले तुमोरो जमीर परेशान नी होलो।

²⁸ लेकिन अगर कोई अपून आप थैं यो कुंछो, “यो उ खानखिन छै, जैस एक मूर्ति में चढ़ाईना को छ्यो,” येस जन खा, उ आदिमी खिन जेले तुमून बताछ, और यो ले क्याखिनकि कोई यो सोच सकछो कि इसो खाखिन खानो गलत छै।

²⁹ म्येरो मतलब, त्यारा जमीर भटे नै, लेकिन उ दुसारा आदिमी का जमीर भटे छै, मेरि आजादी भला कै दुसारा का जमीर का द्वारा परखी जौ?

³⁰ अगर मैं खाना स धन्यबाद करभेरन खाछूँ त जो खानास मैं धन्यबाद करछूँ, उक कारण मैंमें दोष क्याखिन लगूछै?

³¹ म्येरो कुंना को मतलब यो छै, तुम चाहे खा, चाहे पिया, चाहे जै कैले करा, लेकिन परमेश्वरे की महिमा खिन करि जानो चैछो।

^32-33 मैं सबून खुश करना की कोशिश करछूँ, मैं अपून भलाई का बारिमें नै सोचून मरयूँ, बल्कि सबून की भलाई का बारिमें सोचून मरयूँ, ताकि उन उद्धार पा सकूँन। उसीकैं तुम ले रौ कि यहूदीन या गैर-यहूदीन या परमेश्वरै की विश्वासीन की मण्डली खिन कैले परेशानी या कैले ठोकर पैद नै करा।