1 कुरिन्थियून 1 - सोरियाली नय्या नियम

¹ मैं, पौलुस यो चिठ्ठी स जो प्रभु यीशु मसीह को प्रेरित हुन खिन परमेश्वरे की इच्छा ले चुन रैछ और मैं याँ हमार विश्वासी भाई सोस्थिनेस का दगाड़ छूँ जो मेरि मद्दत करछो।

² मैं यो चिठ्ठी परमेश्वरा का विश्वासीन की मण्डली खिन भेजूनमरयूँ, जो कुरिन्थुस शैहर में छै, मतलब की उन लोगून जिनून परमेश्वरेले अपून लोग हुन खिन यीशु मसीहक दगाड़ एक करभेरन अलग करिना को छै और पवित्र लोग हुन खिन बुलाछ; और उन सबून का नाम ले जो हर जाग हमार और अपून प्रभु यीशु मसीहक नामले प्रार्थना करनान।

³ मैं प्रार्थना करछूँ, कि हमार पिता परमेश्वर और प्रभु यीशु मसीहक तरफ भटे तुमून अनुग्रह और शान्ति मिलनै रौ।

मसीह में आशीष

⁴ मैं तुमार बारिमें अपून परमेश्वरो को धन्यबाद हमेशा करछूँ, क्‍याखिनकि तुमोरो यीशु मसीहक दगाड़ रिशता हुना का कारण परमेश्वर ले अपून अनुग्रहक द्वारा तुमून भौत सारा आशीष दीयान।

⁵ क्याखिनकि तुमोरो यीशु मसीह का दगाड़ गैरो रिशता छै, उक कारण परमेश्वर ले तुमून भौत सारी काबिलियत दी रैछ, जैमें बचनो को प्रचार करून और आत्मा का द्वारा हरेक काम करना की समझ दी रैछ।

⁶ यो बात स साबित करछो, जो मैंले तुमून मसीहक बारिमें बातछ उ सच्ची छै।

⁷ यो कारण छै, कि जब तुम हमार प्रभु यीशु मसीह का वापस उनाको इन्तजार करनै रूछा, और अब तुमार पास उ आत्मिक बरदान छन जिनेरी तुमून जरूरत छै।

⁸ परमेश्वर तुमून अन्त तक विश्वास में मजबूत करोलो, कि प्रभु यीशु मसीह दुबारा वापस आलो, त तुम निर्दोष पाई जा।

⁹ परमेश्वर इसो करोलो, क्याखिनकि उ जो कुंछो ऊस उ करून में विश्वायोग्य छै, और उले तुमून अपून च्याला, हमार प्रभु यीशु मसीह का दगाड़ एक संगति में बुला रैछ।

विश्वासीन की मण्डली में फुट

¹⁰ हे म्यारा विश्वासी भाईयो, मैं तुमूनथैं हमार प्रभु यीशु मसीह नामले बिनती करछूँ कि तुम सबून एक-दुसरा का दगाड़ सहमत हुन चैछो, ताकि तुमून में मन-मोटाव नै हो, लेकिन एक्कै हो भेरन एक-दुसारा का दगाड़ मेल-मिलाप ले रौ।

¹¹ क्याखिनकि हे म्यारा विश्वासी भाईयो, खलोए का परिवारा का लोगून ले मैंस तुमार बारिमें बताछ, कि तुमून में झगाड़-फिसाद हुन मर्यान।

¹² म्येरो कुंना को मतलब यो छै, कि तुमून में भटे कोई त अपूनास कुंछो, “मैं पौलुसो को शिष्य छूँ,” कोई “मैं अपुल्लोसो को,” कोई “मैं कैफा को,” या “मैं मसीह को शिष्य छूँ।”

¹³ यो बात ठीक नाहातिनी, क्याखिनकि मसीह स द्वी हिस्सा में नै बाणि ग्यो, शायद तुम गलती ले यो सोचछा कि मैं, पौलुस तुमून आजाद करून खिन सूली में चढ़ाई ग्यो? शायद तुम गलती ले यो सोचून मरैछा कि तुमून येक कारण बपतिस्मा दीई ग्योछ ताकि तुम म्यारा शिष्य बना।

¹⁴ मैं परमेश्वरो को धन्यबाद करछूँ कि क्रिस्पुस और गयुस स छोड़िभेरन मैंले तुमूनमें भटे कैस ले बपतिस्मा नै दीयो।

¹⁵ कोई इसो नै के सकूनो, कि तुमून म्यारा शिष्यून का रूप में बपतिस्मा मिल रियोछ।

¹⁶ और हाँ, मैंस याद छै कि मैंले स्तिफनास का परिवार का लोगून ले बपतिस्मा दीछ; इनून छोड़, मैंले कैसे बपतिस्मा नै दीनो।

¹⁷ क्याखिनकि मसीह ले मैंस बपतिस्मा दीन खिन नै, पर सुसमाचार सुणून खिन भेज रैछ, और जब मैं लोगून परमेश्वरो को सुसमाचार सुणूछूँ, त मैं अपूनी काबिलियत ले नै सुणूनू, नै त लोग सिर्फ मेरि काबिलियत मेंई विश्वास करना, और उन सूली में मसीह की मौत की सामर्थ स नी जाणना।

मसीह की सामर्थ और परमेश्वरोको ज्ञान

¹⁸ क्याखिनकि जब लोग परमेश्वरो को यो सुसमाचार सुणूनान, कि यीशु मसीह सूली में हमार पापून खिन बलिदान हो ग्यो, त उनूनमें भटे कुछ लोग कुंनान कि यो सुसमाचार मूर्खतापूर्ण छै। इसो तरीका ले सोचून वाला लोग परमेश्वरा का सजा का हक्कदार छन, लेकिन हमून खिन जो यो सुसमाचार में विश्वास और उद्धार पा रैछ उनून खिन परमेश्वरै सामर्थ छै।

¹⁹ क्याखिनकि पवित्रशास्त्र में लिखीनाको छै, “मैं ज्ञानिन को ज्ञान नाश करूँलो, और समझदारून की समझस बेकार कर द्यूलो।”

²⁰ और हम यो बातले समझनू कि जो बुद्धिमान छन उनोरो ज्ञान की कोई कीमत नाहातिन; मूसा का नियम-कानून का सिखून वालान की ले कोई कीमत नाहातिन, और यो संसार में इसा लोगून की ले कीमत नाहातिन जो बोलून में चालाक छन। क्याखिनकि परमेश्वरा सामुनि यो ज्ञान की कोई कीमत नाहातिन।

²¹ मैं इसो येक कारण कुछूँ, क्याखिनकि परमेश्वरेले समझदारी ले फैसला लीछ कि यो संसार लोगून अपून काबलियत का द्वारा ऊस नी जाण सकछ्या। येक कारण परमेश्वर उन लोगून बचूना को फैसला करछ्य जो सुसमाचार में विश्वास करनान जैको प्रचार हमूले करछ्य, हालाकि लोग यो प्रचार मूर्खता की बात समझनान।

²² यो यहूदी लोगून खिन मूर्खतापूर्ण लागछो, क्याखिनकि उ यो सच्चाई स साबित करून खिन स्वर्ग भटे चिन चाँनान, और गैर-यहूदी लोग ले लोगून का ज्ञान का खोज में छन।

²³ लेकिन हम यो प्रचार करनू कि मसीह हमून हमार पापून है छुड़ून खिन सूली में मर ग्यो, यो यहूदी लोगून का विश्वास खिन ठोकर को कारण छै और गैर-यहूदीन लोगून खिन मूर्खता खिन छै।

²⁴ लेकिन परमेश्वरा का चुनिना का लोगून खिन, चाहे यहूदी हुन या गैर-यहूदी, योई मसीह परमेश्वर की सामर्थ, और परमेश्वरो को ज्ञान छै।

²⁵ क्याखिनकि जो परमेश्वरै की मूर्खताको जसो लागछो उ लोगून का ज्ञान भटे ज्यादा बुद्धिमान छै, और परमेश्वरे की कमजोरी लोगून का शक्ति भटे ज्यादा मजबूत छै।

²⁶ हे म्यारा विश्वासी भाईयो, यो बारिमें सोचा, कि तुम कि छ्या, जब परमेश्वर ले तुमून बुलाछ, लोगून का नजरून में तुम भौत बुद्धिमान नी छ्या, और नै भौत ताकतवर छ्या और नै त समाज में तुमोरो भौत रूतबा छ्यो।

²⁷ लेकिन परमेश्वरे ले संसाराक मूर्खून चुन लीछै, कि ज्ञानवानून लज्जित करो; और संसाराक कमजोरून चुन लीछै, कि ताकतवर लज्जित करो।

²⁸ और भौत रूतबा वाला लोगून को घमण्ड चूर करून खिन परमेश्वर ले उन लोगून चुन हालछै, जो संसारा का नजर में तुच्छ और नीच और जिनेरी कोई गिनती नाहातिन।

²⁹ परमेश्वरेले यो येक कारण क्योछ कि कोई ले आदिमी उक सामुनि घमण्ड नै कर सकौ।

³⁰ लेकिन परमेश्वर ले तुमून यीशु मसीह का दगाड़ एकजुट करिना को छै, और मसीह का द्वारा हमून अपूनो ज्ञान दीछो। परमेश्वरेले हमून उक नजरून में धर्मी बनूछो। मसीह का द्वारा हमून पवित्र बनाई जानू, और उ हमून पापून भटे छुटकारा दीछो।

³¹ क्याखिनकि मसीह हमोरो सब कुछ छै, जो पवित्रशास्त्र में लिखीना को छै, “जो घमण्ड करौ उमें घमण्ड करौ जो परमेश्वर ले करिना छै।”