Yude 1 - SOMA CHHAD - CHHAMBO

¹ Yeshu Masihi tson yang Yaqobosi phono inkhan Yudi rollana Ata inkhan Ashipi shitia rinchan yang Yeshu Masihi phya strungse yodkhan yong-mole-pheskhanuni mingtaḵẖsika.

² Skyonzot salbao nang Zomluks nang rgalukspo khyentanga styaqen thoben dukshik.

³ Kasa rinchanun, ngas khyentanga ngantang saq nadrese yodkhan khomluksi rshmangeang zbria mana mangmo phraluks ben yodtsana, ngas khyentanga khyentes rtsangmaunla respa chikchik salskhan de chheslukspoe phya stroq tangse narpa phingshik zere dyana jalta zbrichao mâ thsathsa sams.

⁴ Chiazerbana ngacha nanyambo mikhachik rshkuse yongse dresed khong na sprolangsi rshmangpo snani dusiangnuk mana snanlana rshtaḵẖs tangskhan yodpin; dyu-un Ashipa misheskhanun nganti Ashipi shazdeo rtsoqpo samluksiang spoed; yang nganti chikpar Ashipa nang Rshnamcho Yeshu Masiha men zerkhan in.

⁵ Khyentangang ditamun saq respa chikchik rshtaḵẖspa songsed, do in nang di tampo khyontanga itu phinged, chizesna Ashipas mithsir chikchik Eguptosi yuliangna hute chnachukse yang phinyse khyongse jukpona chhesluks mabaskhanun saq malusshuks.

⁶ Yang Khos rangi rgyalchospo rshtan chukse majaqskhan dobasang rangis phese yodkhan malsao phangskhan skopaun rshtane luspi rdosuniang thub-muntaqariang chhopo jaqi shaḵẖs thsaqpa kaqse jaqen duk.

⁷ Dyatarikh Sodom nang Gomora yang douni khridkhori yulun khongun natsoḵẖs base rtsoqpo lasuniang yang mibe loqphari mencha lasuniang phoqsuk, rshtane lushi me-e naḵẖsiang phoqse bredpa chhacha songsed.

⁸ Do in nâng di mencha bakhanunis rangi kyaqkyoqi sambauniang phoqse khongun natsoḵẖs rgo rtsoqpo ben ashi inkhan rgyalchospoa changmenkhan samen yang chhezbreli themba yodkhanunika ukhan tanged.

⁹ Amma skopauni gowa Mikhaelis Moshe-e roe rshmangeang Nganpao na spradsprad batsana ukhanika khoeka snyad bachi khyud maphod, dobasang dyu zes : "Ashipas khyerang bredpa zadshik!"

¹⁰ Amma khongunis rshtaḵẖspa medkhan mana chiunika ukhan tanged amma shangsmedkhan byolthsongsun natsoḵẖs sheskhan chiuniang khongunis rang jikchuged.

¹¹ Khongunika domba! Chiazerbana khong Kaini lamika druls yang hlek thobi phya tama mangmo base Balaam natsoḵẖs lamstor song; yang kora natsoḵẖs loqpari zgradzgrad base medcha song.

¹² Khongun khyenti rgaluksi gronuniang khyentang nanyambo za thungtsana khyenti lamiang nubchukpi chhubraq tsoḵẖs in; jiksmedika rangi ltoa skangskhan thsokhan lurdzi in; hlungunis spure khyorkhan chharpa medkhan sprin-un in, stoni khazas medkhan staqjiun in, ljongs nyiskona shiskhan, pataq na phudskhan in.

¹³ Rgyamthsoe zbukshan chhuzbraun in rangi khrelmediluksi zboao phyistâ phinged; mana rshtane thiksmed ṯhub-muntaqariang phoqse yodkhan khoren dukkhan skarmaun in.

¹⁴ Dyurûni Adami jukna rduni resi inkhan Enokisang dyu khyenspin : "Ltosang Ashipa rangi strongstong rtsangmaun nanyambo skyodsed."

¹⁵ Miun saqi shaḵẖs phea yang mirchorkhanun saqa khongis mirchorchi luksika baskhan de mirchorchi lasun saqi phya yang de mirchorkhan nyespachanunis khoe laqparla zeskhan de Rshante tamun saqi phya, budthalsongkhan chhachukpi phya skyodsed."

¹⁶ Dyuru shubshub bakhan grabshad bakhan rangi rtsoqpo tongoun nazomse drulkhan in; yang rangi khaun na thosthos yodpi tamun zerkhanun in, yang phankhyephya miunla rdongstod bakhanun in.

¹⁷ Amma khyentang rinchanun! ngachi Ashipa Yeshu Masihi phrinkhyerkhanunis snanla zeskhan tamun ituk jaqshik!

¹⁸ Khongis khyentanga jugi namziang rangi ashipa mishespi luksi tongoun nazomse drulkhan jargad bakhan bingnuk zere zeredpin.

¹⁹ Di miun khrul ltsangkhan rangi rtsoqpo tongounla ltakhan yang rtsangma Sems misheskhan in.

²⁰ Amma, khyentang rinchanun, rangi mârtsangma chneslukspeang rang khallen tsoḵẖshik rtsikse yang rtsangma Semsiang laqpa zune,

²¹ Rangis rang Ashipi rgalukspeang rshtanchukse jaqshik! Yang rshtane lushi sonluksi phya ngachi Ashipa Yeshu Masihi shazdeola thenchik ben dukshik!

²² Yang thaqtigeang thabthap bakhanunla zingshik!

²³ Yang khachik thene meangna phingshik! yang khachigika jikse zdikpa thsorshik! dobasang rgoeka thseṯu songskhan gonchao na ḵẖamloq sheshik!

²⁴ Dare khyentang ḵẖate phoqchikana strungma nyankhan, yang rangi thsangskhan chhezbreli rgyazgocang mana thadkhika yang kyaqkyoq medpa ltsangma nyankhan,

²⁵ ngantanga khomluks salskhan shangshan chikpar inkhan Ashipi chhezbrel nang thonmoe luks nang rgyastridpo nang bashanpo ngariti Ashipa Yeshu Masihi laqkhas mana snanlana songkhan na tsoḵẖspodareang yongcha yodpi dusun la-ang songshik! AMEN! [MISAQA TANGSKHAN YUDI SHUGU]