Zekaria 8 - Baibuli Ekibono kya Katonda 2014

Musengwa Katonda asuubiza okwizaagho Yerusalemu

¹ Kabiri Musengwa Katonda Afuga Amagye yaayogera ninze, yankoba ati:

² “Nze Musengwa Katonda Afuga Amagye enkikidi engema ku lw'ekibuga Yerusalemu, kuba ngonza inho abantu baakyo. Era okugonza kwe ndi nakwo okunene okwo kundeetera okusungughalira abazigu baibwe.

³ Luliba lulala naira ku lusozi lwange Sioni, naaba mu kibuga kyange Yerusalemu. Olwo ekibuga ekyo balikyetanga ekibuga eky'abantu abeesigwa, era baakyetanga olusozi lwange nze Musengwa Katonda Afuga Amagye olutukuvu.

⁴ Abasaadha n'abakazi abakaire einho abatambulira obw'oku mikoomo olw'emyaka, baliiramu okutyamanga mu mpya edh'ekibuga Yerusalemu.

⁵ Era enguudo dhaakyo dhiriiramu okwidhula abalenzi n'abaghala abali kuzaanha.

⁶ “Ekyo kiboneka okuba ng'ekitasoboka eri abo abaawonagho abali mu ighanga lino buti, aye eri nze ghazira kitasoboka.

⁷ Bona eno, ndinunula abantu bange, naabatoola mu nsi edh'e buvandhuba n'e bugwandhuba ye baatwalibwa.

⁸ Ndibaiza mu Yerusalemu baabanga omwo. Baliba bantu bange, nze naaba Katonda waibwe omwesigwa era omutuufu.

⁹ “Mugume imwe abali kuwulira mpegaano ebibono bino abalanzi bye baakoba, mu biseera abazimbi bye baateeragho omusingi ogw'eisinzizo lyange, nga lija okwiramu okuzimbibwa.

¹⁰ Ebiseera ebyo bwe byali nga bikaali kutuuka, tighaalingagho muntu asobola kusasulira mupakasi oba ensolo okumukolera omulimo. Era nga ghaziragho muntu atali mu bweraliikirivu bwa bazigu kumulumba, kuba naleetera abantu okukyaghagana.

¹¹ Aye mpegaano, nze Musengwa Katonda Afuga amagye, tija kubisa bantu ba ighanga lino abaawonagho nga bwe nabisanga abaaligho mu biseera ebyo.

¹² Baidha kusiganga emere nga bali mu miraala, emizabbibu gibalenga ebibala, eitaka lyeyongerenga okubaaku ebirime, n'amaadhi gagwenga. Ebyo byonabyona ndibigha abantu b'eighanga lino abaawonagho.

¹³ Imwe ab'omu Buyudaaya n'ab'omu Isiraeli, mwali mufuuse ekibono abamaghanga agandi kye baakozesanga okukolima. Aye buti ndidha kubanunula, olwo bakozesenga eriina lyaimwe okusabiranga abantu enkabi. Kale mutatya naire, mugume bugume.”

¹⁴ Musengwa Katonda Afuga Amagye akoba ati: “Badhaadha baimwe bwe bansonsoonia ni bandeetera okusungughala, nategeka okubakola akabi era naatuukiriza entegeka eyo aghazira kukyusaamu kirowoozo kyange naire.

¹⁵ Aye mpegaano ntegeike okugha abantu b'omu Yerusalemu n'ab'omu Buyudaaya enkabi. Kale mutatya naire.

¹⁶ Bino bye mugwaine okukolanga: buli muntu akobere mwine amazima. Musalenga mu mazima mu mbuga dhaimwe edh'amateeka, mu nsambo ereetagho emiraala.

¹⁷ Era mutayiiyanga mu myoyo gyaimwe kukola kabi ku banaimwe, waire okulayiranga ebiziramu kuba ebyo byonabyona, nze Musengwa Katonda, mbikyayira irala inho.”

¹⁸ Kabiri Musengwa Katonda Afuga Amagye yaayogera ninze, yankoba ati:

¹⁹ “Okusiiba kwaimwe okw'omu mwezi ogwokuna, n'okw'omu gwokutaanu, n'okw'omu gwomusanvu, n'okw'omu gweikumi, kulifuukamu biseera bya masanhu na kusagamba eri ab'eighanga Buyudaaya nga bali mu bibinuko. Agho ni mugwaine mugonzenga okukolerera amazima n'emiraala.”

²⁰ Musengwa Katonda Afuga Amagye akoba ati: “Ekiseera kirituuka, abantu abamaghanga kamaala n'ab'omu bibuga kamaala baidha e Yerusalemu.

²¹ Abantu ab'omu kibuga kino balikoba ab'omu kibuga ekindi bati, ‘Mwidhe tuje ye Musengwa Katonda Afuga Amagye, tumweghembe atugemerwe ekivunika. Ife tujiire.’

²² Abantu abamaghanga kamaala nga mulimu n'ag'amaani, baliidha e Yerusalemu ye Musengwa Katonda Afuga Amagye, okumusinza n'okumweghemba abagemerwe ekisa.

²³ Era Musengwa Katonda oyo Afuga Amagye akoba ati mu biseera ebyo, abantu ikumi abamaghanga agandi balyegema ku Muyudaaya mulala, nga bakoba bati, ‘Tuganhe tuje n'iwe, kuba twawulira tuti Katonda ali n'imwe.’ ”