Zekaria 6 - Baibuli Ekibono kya Katonda 2014

Okubonekerwa ebigaali eby'omu lutalo ebina

¹ Kabiri naafuna okubonekerwa okundi, era okuja okulinga nti nga mbona ebigaali eby'omu lutalo bina biri kuviira ghagati gh'ensozi ibiri. Ensozi edho dhaali nga dha kyuma kya kikomo.

² Ekigaali ekyasooka kyali n'embalaasi dha kasaayisaayi nga dhiri kukighaluza, ate ekyokubiri kyaba n'embalaasi ndhirugavu nga n'edhiri kukighaluza.

³ Ekigaali ekyokusatu kyali n'embalaasi ndheru nga dhiri kukighaluza, ate ekyokuna kyaba n'embalaasi dha kikuusikuusi nga n'edhiri kukighaluza.

⁴ Agho naabuza malaika eyali ali kwogeranga ninze nti: “Musengwa, ebigaali eby'omu lutalo ebyo bitegeeza ki?”

⁵ Yandhiramu ati: “Ebyo biri kuja ku ndhuyi eina edhiri ghansi gh'eigulu, era byakamala okuva ghale mu maiso ga Musengwa Katonda ow'ensi yoonayoona.”

⁶ Ekigaali ekiri n'embalaasi endhirugavu edhiri kukighaluza, kiri kuja ku luuyi olw'omukono omugooda olw'e buvandhuba. Ekiri n'embalaasi endheru kiri kuja ku luuyi lwa bugwandhuba. Ate ekiri n'embalaasi edh'ekikuusikuusi kiri kuja ku luuyi lwa mukono musaadha olw'e buvandhuba.

⁷ Embalaasi edho bwe dhaavaayo dhaali kasukasu okuja okukebera ensi. Malaika yaadhikoba ati: “Muje mukebere ensi.” Kale dhaaja dhaagikebera.

⁸ Agho malaika yaakaabuka yankoba ati: “Bona eno, embalaasi edhijiire ku luuyi olw'omukono omugooda olw'e buvandhuba dhireeteire obusungu bwa Musengwa Katonda okuwoleera.”

Musengwa Katonda alagira okuvaaza Yoshua engule

⁹ Agho Musengwa Katonda yaayogera ninze, yankoba ati:

¹⁰ “Toola ebirabo ebigheereibwayo Heledai ni Tobiya ni Yedaia, abaakaira okuva e Babiloni mu bunhage, omale oje olunaku lwene olwo mu ndhu ya Yosia mutabane wa Zefania.

¹¹ Oidha kutoola ku feeza ni zaabu bye baghaireyo, okolemu engule ogivaaze ku mutwe gwa Yoshua Omukulu wa Bakabona, mutabane wa Yehozadaki.

¹² Omukobe oti Musengwa Katonda Afuga Amagye akoba ati, ‘Bona eno, omuntu ayetebwa eriina Olusaga aja kukulira gheene agho mwene gh'ali, era aja kuzimba eisinzizo lya Musengwa Katonda.

¹³ Oyo n'alizimba eisinzizo eryo, era oyo ye baligha ekitiisa eky'obwakyabazinga, yaaba mufuzi. Ghalibaagho kabona alibanga agho okumpi n'ekityamo kye eky'obwakyabazinga, nga bombi bategeeragana mu miraala.’

¹⁴ Heledai, Tobiya, Yedaia ni Yosia mutabane wa Zefania, n'abaidha okulabiriranga engule eyo eidha kubanga mu isinzizo lya Musengwa Katonda ng'ekiidhukizo.”

¹⁵ Abantu ab'eghala baliidha baayamba mu kuzimba obuyaaka eisinzizo lya Musengwa Katonda, olwo mwamanha nga Musengwa Katonda Afuga Amagye n'eyantuma ye muli. Ebyo birituukirira, bwe muligondera n'omwoyo omulala ebyo Musengwa Katonda waimwe by'alagira.