Zekaria 5 - Baibuli Ekibono kya Katonda 2014

Okubonekerwa enzingo y'ekitabo egulukira mu ibbanga

¹ Kabiri naafuna okubonekerwa okundi, era okuja okulinga nti nga mbona enzingo y'ekitabo, ng'eri kugulukira mu ibbanga.

² Malaika yambuuza ati: “Kiki ky'oli kubona?” Nairamu nti: “Ndi kubona enzingo y'ekitabo ng'eri kugulukira mu ibbanga. Obuleeyi bwayo buli mita mwenda, ate obugazi bwayo bwaba mita ina n'ekitundu.”

³ Agho yankoba ati: “Mu nzingo y'ekitabo eyo mwaghandiikibwamu ekikolimo ekija okugema ensi yoonayoona. Olwo kibe nti omuntu yeenayeena anaibanga baidha kumutoolanga mu nsi eno, n'omuntu yeenayeena anaalayiranga eby'okusubagha, yeena bamutoolenga mu nsi eno.

⁴ Musengwa Katonda Afuga Amagye akoba ati alisindika ekikolimo ekyo kyangira mu ndhu dh'abaibi, ni mu ndhu dh'abo abanaalayiranga eby'okusubagha mu liina lya Musengwa Katonda. Era ekikolimo ekyo kiriba mu ndhu edho kyadhisaaniagho okudhimaliriragho.”

Okubonekerwa omukazi ali mu kiibo

⁵ Agho malaika eyali ali kwogeranga ninze yaaseeta, yankoba ati: “Linga ere obone ekiri kwidha.”

⁶ Naamubuuza nti: “Kiki ekyo?” Yairamu ati: “Kiibo, era kitegeeza ekibi eky'ensi yoonayoona.”

⁷ Ekiibo ekyo kyaliku ekisandikira ekyakolebwa mu kyuma ekizito. Naja okulinga nti nga mbona bali kukisandukula, era naabona nga mu kiibo mulimu omukazi atyaime.

⁸ Malaika yankoba ati: “Omukazi oyo ategeeza ekibi.” Agho yaasiinhira omukazi okumwiza mu kiibo, era yaakiizaaku ekisandikira kyaku ekizito.

⁹ Kabiri naja okulinga nti, nga mbona ghaligho abakazi babiri abali kwidha, nga bali kuguluka n'amaghagha ng'oti ga sekanhulya. Baidha baatoolagho ekiibo ekyo baguluka, baaja nakyo.

¹⁰ Naabuza malaika nti: “Bali kukitwala gha?”

¹¹ Yandhiramu ati: “Bali kukitwala Babilonia, ye baja okukizimbira eisabo. Bwe balimala okulizimba, balita ekiibo ekyo mu isabo eryo baakisinza.”