Zekaria 4 - Baibuli Ekibono kya Katonda 2014

Okubonekerwa ekikondo eky'entaala

¹ Agho malaika eyali ali kwogeranga ninze yaidha kabiri, yanzuusa ng'oti mbairenga ntendwike.

² Yambuuza ati: “Kiki ky'oli kubona?” Naamwiramu nti: “Ndi kubona ekikondo eky'entaala ekyakolebwa mu zaabu, nga ku ngulu kwakyo kuliku akadoome akabaamu amafuta. Ku kikondo ekyo kuliku entaala musanvu, nga buli ntaala eriku entambi musanvu musanvu.

³ Era nga ku mbali kw'ekikondo ekyo kuliku emiti emyoliva ebiri, ogundi ku luuyi olw'omukono omusaadha n'ogundi ku luuyi olw'omugooda.”

⁴ Agho naabuuza malaika eyali ali kwogeranga ninze nti: “Musengwa Katonda wange, ebyo bitegeeza ki?”

⁵ Malaika yambuuza ati: “Toidhi ebyo kye bitegeeza?” Naamwiramu nti: “Musengwa Katonda wange, tiidhi.”

Katonda asuubiza Zerubbabeli obughanguzi

⁶ Agho malaika oyo yankoba okutwalira Zerubbabeli obukwenda bwa Musengwa Katonda obukoba buti: “Olighangula ti lwa kuba wa maani, waire okuba ow'obuyinza, aye lwa Musengwa Katonda Afuga Amagye okukugha omwoyo gwe.

⁷ Ebizibu ebiri ng'oti nsozi ndeeyiriri birivaagho ghaaba ng'oti museetwe. Oliiramu okuzimba obuyaaka eisinzizo, era bw'oliba otaaku eibaale erisembayo, abantu balyasiikana bati, ‘Liboneka bulungi, obulungi bwenebwene!’ ”

⁸ Era Musengwa Katonda yaayogera ninze, yankoba ati:

⁹ “Zerubbabeli atairegho omusingi ogw'eisinzizo lino, era mwene oyo n'aidha okumaliriza okulizimba. Olwo abantu bange balimanha nga nze Musengwa Katonda Afuga Amagye, ninze eyakutuma ye bali.

¹⁰ Abo boonaboona ababaire bawoiremu amaani olw'okubona ng'ebintu biri kuja kasoobo, baja kusangaala nga baboine Zerubbabeli bw'ali kuja mu maiso n'okuzimba eisinzizo.”

^10b Malaika era yankoba ati: “Entaala omusanvu dh'oboine, ago n'amaiso ga Musengwa Katonda agabona woonawoona ku nsi.”

¹¹ Agho naamubuuza nti: “Ate emiti emyoliva ebiri egiri ku mbali kw'ekikondo ekyo, ogundi ku luuyi olw'omukono omusaadha n'ogundi ku luuyi olw'omugooda, gitegeeza ki?”

¹² Era naamubuuza nti: “Ensaga eibiri edh'omuti omwoliva edhiri ku mbali okw'emikonda ebiri egya zaabu egikozesebwa okwitulula amafuta ag'entaala, dhitegeeza ki?”

¹³ Malaika yambuuza ati: “Toidhi ebyo kye bitegeeza?” Naamwiramu nti: “Musengwa Katonda wange, tiidhi.”

¹⁴ Agho yankobera ati: “Abo n'abantu ababiri Musengwa Katonda ow'ensi yoonayoona be yalonda, era yaabasiiga omuzigo bamugheerezenga.”