Zekaria 3 - Baibuli Ekibono kya Katonda 2014

Omulanzi abonekerwa Omukulu wa Bakabona

¹ Kabiri nafuna okubonekerwa okundi, Musengwa Katonda yandholeka Yoshua Omukulu wa Bakabona ng'ayemereire mu maiso ga malaika wa Musengwa Katonda oyo. Era ku luuyi lwa Yoshua olw'omukono omusaadha, ghaali gheemereiregho Sitaani nga yeetegeike okulumiriza Yoshua oyo omusango.

² Agho malaika wa Musengwa Katonda yaakoba Sitaani ati: “Iwe Sitaani, Musengwa Katonda agwananga yaakusalira omusango. Musengwa Katonda oyo eyalonda Yerusalemu agwananga yaakusalira omusango gwakusinga. Oyo y'oli kwenda okulumiriza ali ng'oti n'ekisiki kye baswankwire mu muliro.”

³ Yoshua yali ayemereire mu maiso ga malaika ng'ali mu bivaalo ebiidhwire eikoodera.

⁴ Malaika yaakoba abaali beemereire mu maiso ge ati: “Mumutoolemu ebivaalo ebyo ebiidhwire eikoodera.” Era yaakoba Yoshua ati: “Bona eno, nkutoireku ebibi byo byonabyona, era nja kukuvaaza ebivaalo eby'ekitiibwa.”

⁵ Era yaalagira ati: “Mumusibe n'ekitambaala ekitukula ku mutwe.” Kale baamusiba ekitambaala ekitukula ku mutwe, baamuvaaza n'ebivaalo ebitukula, nga malaika wa Musengwa Katonda ayemereire agho.

⁶ Agho malaika wa Musengwa Katonda yaagumya Yoshua ng'akoba ati

⁷ Musengwa Katonda Afuga Amagye akobye ati: “Bw'onaagemanga amateeka gange era n'ojiiranga ku biragiro byange, oidha kusigala nga niiwe olabirira eisinzizo lyange ghalala n'empya dhaalyo. Era ndidha kukuganha okuseetanga ye ndi ng'oti ni bamalaika abo abali agho.

⁸ Kale ni, iwe Yoshua Omukulu wa Bakabona ghalala ni bakabona baino, muwulire kino: Niimwe akamanhiso ak'ebiseera ebirungi eyo ye bwidha. Era nja kubooleka omugheereza wange ayetebwa Olusaga!

⁹ Bona, nja kuta mu maiso ga Yoshua eibaale nga liriku endhuyi musanvu, nditoneku n'ekighandiiko. Era nditoolagho ekibi eky'ensi eno mu lunaku lulala luti lwonka.

¹⁰ Okuva olunaku olwo, buli muntu alyetanga mwine aje ewuwe awuumulireku mu isamba lye ery'emizabbibu n'ery'emitiini.”