Zekaria 14 - Baibuli Ekibono kya Katonda 2014

Amaghanga galumba Yerusalemu

¹ Olunaku lwa Musengwa Katonda lw'alisaliraku omusango luli kwidha, olwo abazigu banhage ebintu byaimwe era babigabane nga mulingiriire.

² Musengwa Katonda akoba ati alisoloza abantu b'amaghanga goonagoona, baalumba Yerusalemu mu lutalo. Balikighangula, baanhagulula ebintu mu mayumba, era baagema abakazi baabakaka. Ekitundu ku bantu baamu balitwalibwa mu bunhage, aye abalisigalagho tibalitoolebwa mu kibuga.

³ Agho Musengwa Katonda alimala yaalumba amaghanga ago, yaagalwanisa ng'oti bwe yalwana mu ntalo edhaabita.

⁴ Mu kiseera ekyo alyemerera ku Lusozi olw'Emiti Emyoliva, oluli ku luuyi olw'e buvandhuba olwa Yerusalemu. Olusozi olwo lulyeyatisaamu endhawu ibiri okuva e buvandhuba okutuuka e bugwandhuba, lwaidhamu ekiiko ekigazi einho. Olwawu olundi olw'olusozi olwo luliseseetukira ku luuyi olw'omukono omugooda olw'e buvandhuba, ate olwawu olundi lwaseseetukira ku luuyi olw'omukono omusaadha olw'e buvandhuba.

⁵ Muliwona nga mubitira mu kiiko ekyo ekirigabaniamu olusozi aghabiri. Mulirumuka nga badhaadha baimwe bwe baakola ku lule musisi lwe yabita mu biseera bya kyabazinga Uzzia ow'e Buyudaaya. Agho Musengwa Katonda waife aliidha ng'ali ghalala n'abatukuvu boonaboona.

⁶ Mu kiseera ekyo teribaayo kiinhogogo waire olufu.

⁷ Era teribaayo nzikiiza. Bulibanga musana ekiseera kyonakyona. Ni mu kiseera eky'obwire, ghalibangagho butangaavu ng'oti musana. Aye Musengwa Katonda yenka naidhi ekiseera ekyo ghe kiribeeragho.

⁸ Mu kiseera ekyo amaadhi amalungi galikuuluula nga gava mu Yerusalemu. Galyegabamu ghabiri agandi gaaja mu nhandha eri e buvandhuba, ate agandi gaaja mu nhandha eri e bugwandhuba. Galikuuluula omwaka gwonagwona nga tigalekera, ka bibe ebiseera eby'akasana oba eby'ekiinhogogo.

⁹ Agho Musengwa Katonda n'aliba Kyabazinga ow'ensi yoonayoona, abantu boonaboona baamusinzanga nga ni Musengwa Katonda yenka ye baidhi.

¹⁰ Ekiketezo kyonakyona ekiri ku luuyi olw'omukono omusaadha olw'e buvandhuba olwa Yerusalemu, okuva e Geba okutuuka e Rimmoni, kirifuulibwa museetwe mwereere. Aye Yerusalemu kirisigala mu kifo kyakyo nga kiri ghaigulu okuwula ebiketezo byonabyona ebikyezungulwire. Era ekibuga ekyo kiriva ku gwetebwa Omulyango gwa Benjamini, kyaja kyatuuka ku gwetebwa Omulyango ogw'omu Nsonda aghaali omulyango omukaire, era kyatuuka ku kyetebwa Ekituuti ekya Hananeli, ni ku bikunhiro bya kyabazinga eby'omwenge ogw'emizabbibu.

¹¹ Abantu balibanga mu Yerusalemu nga bali mu miraala, kuba baliba tibakeeraliikirira kuzikirizibwa olw'ekikolimo okuba ku kibuga ekyo.

¹² Musengwa Katonda alibonereza abantu b'amaghanga agalitanula olutalo ku Yerusalemu, ng'abasindikira endwaire embi einho: emibiri gyaibwe girivunda nga bakaatambula, amaiso gaibwe gaabavundira mu bighanga, n'enimi dhaibwe dhaabavundira mu kanwa.

¹³ Mu kiseera ekyo Musengwa Katonda alibaleetera okwezinduka einho, baasoberwa n'okusoberwa. Olwo buli muntu yaagema mwine amuli okumpi, yaamulwanisa.

¹⁴ N'abantu ab'omu Bayudaaya boona balirwanisa abazigu abo ku lwa Yerusalemu. Balisoloza eby'obukombe eby'amaghanga agandi nga bingi inho: zaabu, feeza, n'engoye.

¹⁵ Endwaire embi einho erigema n'embalaasi, n'enhumbu, n'engamiya, n'endogoyi, era na buli nsolo yoonayoona eryagaanibwa mu nkambi y'abazigu.

¹⁶ Olwo abo boonaboona abaliwonagho ku b'amaghanga agaliba galumbye Yerusalemu, baliniinaniinanga buli mwaka, baajanga okusinza Musengwa Katonda Afuga Amagye era Kyabazinga, n'okukolanga Ekibinuko eky'Entindi.

¹⁷ Era eighanga lyonalyona eritaaniineniinenga kuja Yerusalemu, okusinza Musengwa Katonda Afuga Amagye era Kyabazinga, ekiketezo kyalyo tikiigwengamu maadhi naire.

¹⁸ Abamisiri bwe baliroba okuja okukola Ekibinuko eky'Entindi ekyo, Musengwa Katonda alibasindikira endwaire embi y'alisindikira amaghanga agandi agaloba okuja okukikuza.

¹⁹ Ekyo n'ekibonerezo ekirigheebwa Misiri, n'amaghanga agandi goonagoona agataaniineniinenga kuja kukola Kibinuko kya Ntindi.

²⁰ Mu kiseera ekyo, ni bwebiba ebide obude bye basiba mu mbalaasi, byona biriba bighandiikiibwaku biti: “Yayawulibwa nga ya Musengwa Katonda.” N'entamu edh'omu isinzizo lya Musengwa Katonda dhiritwalibwanga okuba entukuvu ng'oti n'ebibya ebiba emberi gh'alutaari.

²¹ Entamu dhoonadhoona mu Yerusalemu ni mu Buyudaaya dhiryawulibwa nga dha Musengwa Katonda Afuga Amagye. Olwo abaja okughaayo emisengo balitoolanga ku edho baafumbamu emamba ey'omusengo. Mu kiseera ekyo, mu isinzizo lya Musengwa Katonda Afuga Amagye timulibaamu kabiri musuubuzi waire omulala ati.