Zekaria 11 - Baibuli Ekibono kya Katonda 2014

Okugwa okw'abafuzi abo abakambwe

¹ Iwe Lebanoni igulagho endhigi dho, omuliro gwokye emiti gyo emivule gugizikirize!

² Imwe emiti emisipuressi muwowoole kuba emivule gigwire, emiti egyo emirungi einho bagizikiriiza. Imwe emiti emikologho egy'e Bashani muwowoole, kuba ekibira ekibaire ekizibirivu bakitemyegho!

³ Wulira abaayi bwe bawowoola, olw'okufiirwa ekitiibwa kyaibwe. Wulira empologoma bwe dhiwologoma, olw'okuba ekibira ky'e Yorudani mwe dhiba bakizikiriiza.

Abaayi ababiri

⁴ Agho Musengwa Katonda wange yankoba ati: “Fuuka mwayi wa ntaama edh'okwitibwa.

⁵ Abo abadhigula, baja baadhiita era ghaaloba kubaagho ababonereza. Abo abadhitunda bakoba bati, ‘Musengwa Katonda asaakibwe, tufuuse bakombe!’ Era abaayi baadho tibadhisaasira naire.”

⁶ Musengwa Katonda kyava n'akoba ati: “Zeena tikairayo kusaasira muntu mu nsi eno. Bona eno, nze mwene ndighaayo abantu boonaboona, naabata mu buyinza bw'abafuzi baibwe. Abafuzi abo balizikiriza ensi eno, era ezira muntu ye ndinunula kumutoola mu buyinza bwaibwe.”

⁷ Kale naafuuka mwayi wa ntaama edh'okwitibwa, nga ndhayira abo abaadhisuubulanga. Era naatoola emiigo ebiri, naagigema mu ngalo: ogundi naagutuuma eriina “Nkabi” ate ogundi naagutuuma eriina “Kweyimba”. Agho naasigala nga ndi kulabirira entaama edho.

⁸ Ghaabaagho abaayi basatu abankyagha ni bandeetera okubeesinwa. Kale naababinga mu mwezi mulala guti.

⁹ Agho naakoba entaama nti: “Tikaali mwayi waimwe. Edho edh'okufa ka dhife, edho edh'okuzikirira ka dhizikirire, edho edhinaasigalagho ka dhiriidhagane emamba.”

¹⁰ Agho naatoola omwigo gwe natuuma eriina “Nkabi” naagumenhamu, okusazaamu endagaano Musengwa Katonda ye yali akoze n'abantu ab'amaghanga goonagoona.

¹¹ Kale endagaano eyo yaasazibwamu ku lunaku olwo. Era abo abaasuubulanga entaama baali agho nga baaningiriire, baategeera nga Musengwa Katonda n'eyali ali kwogerera mu ekyo kye nakola.

¹² Naabakoba nti: “Bwe muba nga musazeegho okunsasula, mumpe empeera yange. Aye oba timwenda kugimpa, mugisigaze.” Kale bampa ebitundu bya feeza amakumi asatu, nga n'empeera yange.

¹³ Musengwa Katonda yankoba ati: “Ebitundu bya feeza ebyo bite mu ndyanga ey'eisinzizo.” Kale naatoola ebitundu bya feeza amakumi asatu ebyo, empeera ey'ekikungu ye baabona nga n'engyamu, naagita mu ndyanga ey'eisinzizo.

¹⁴ Naatoola omwigo ogwokubiri gwe natuuma eriina “Kweyimba”, naagumenhamu okusazaamu okweyimba kwa Buyudaaya ni Isiraeli.

¹⁵ Agho Musengwa Katonda yankoba ati: “Kabiri fuuka mwayi wa ntaama, aye ku luno fuuka mwayi wa ntaama azira ky'agasa naire

¹⁶ kuba, bona eno, ndi kutaagho mu nsi eno omwayi w'entaama atafaayo ku edho edhiri kuzikirira, oba okwagala edho edhiri kutambulatambula eyo dhityo. Era ataidhandhaba edho edhighenhera, waire okutwala edho edhikaali enamu aghali eisubi dhirye. Aye aligho okulya obulye emamba y'edho ensavu, n'alya n'amabbonge.

¹⁷ Akagwireku omwayi w'entaama oyo azira ky'agasa naire, alekulira obwagho ekisibo! Olutalo lugwananga lwamukuba yaava mu buyinza yaagwira irala. Era omukono gwamuniala n'eriiso lye ery'oku mukono omusaadha lyamutulughala.”