Zekaria 10 - Baibuli Ekibono kya Katonda 2014

Musengwa Katonda asuubiza okununula abantu be

¹ Imwe abantu ba Musengwa Katonda, mumusabenga abaghe amaadhi mu biseera byago bye gagwiramu. Musengwa Katonda oyo n'aleetera ebire okwekuluumulula, olwo yaagha abantu amaadhi, gaagwa mu nimiro dhaibwe dhaameramu ebisimbe.

² Abantu beebuuza ku misambwa, ni ku balaguzi, ni ku bavuunuzi b'ebirooto, aye bye babairamu bya buguya byereere era bizira kye bibayamba naire. Kale ekyo kyaleetera abantu okutambulatambula eyo batyo ng'oti ntaama edhibuze. Olwo baadaazibwadaazibwa olw'okubulwa omukulembeze.

³ Musengwa Katonda Afuga Amagye akoba ati: “Nsungughaliire inho abakulembeze abo abafuga abantu bange, era ndidha kubabonereza. Nze Musengwa Katonda Afuga Amagye, mwene ndirabiriranga abantu bange Abayudaaya ng'oti n'omwayi bw'alabirira ebyayo bye. Era ndibaleetera okuba ng'oti n'embalaasi edh'omu lutalo edhitatya naire.

⁴ Mu abo n'omuliva abafuzi, n'abakulembeze, n'abaduumizi mu magye, abalifuga abantu bange.

⁵ Abantu b'omu Buyudaaya baliba ng'abalwani ab'omu lutalo ab'amaani, nga batyankirira abazigu baibwe mu bisoodo eby'omu nguudo. Balirwana baghangula n'abazigu baibwe ab'oku mbalaasi, kuba nze Musengwa Katonda ndi ghalala nabo.

⁶ Ndireetera abantu b'omu Buyudaaya okuba ab'amaani, era naawonia abantu b'omu Isiraeli abo okuzikirizibwa. Ndibagemerwa ekisa, naabaiza eka ewaibwe. Baliba ng'oti se tibalekulirangaku agho, kuba ninze Musengwa Katonda waibwe, era nze ndiiramu okusaba kwaibwe.

⁷ Olwo abantu b'omu Isiraeli baliba ng'oti n'abalwani abaziramu ntete. Era mule baliba basanhuukirivu ng'oti n'abanhweire omwenge ogw'emizabbibu. Baidhukulu baibwe bwe baliidhukiranga obughanguzi buno, balisagambanga olw'ebyo nze Musengwa Katonda bye nkoze.

⁸ Ndifuuwa akaleetu okweta abantu bange abo, naabasololeza ghalala; kuba ninze nabanunula. Era ndibaleetera okwiramu okwala, baaba kamaala nga bwe baalinga eira.

⁹ Waire nabasansaaniza mu maghanga, aye era balindidhukiranga nga bali eyo mu nsi edh'eghala. Era beene aghalala n'abaana baibwe balisigala nga bakaali balamu, baamala baira eka ewaibwe.

¹⁰ Ndibasoloza naabatoola mu Misiri, naabatoola ni mu Assiria naabaiza ewaibwe. Naabata mu Gileadi ni mu Lebanoni, woonawoona ghaidhula abantu.

¹¹ Bwe baliba nga bali kubita mu nhandha ey'e Misiri, nze Musengwa Katonda ndikuba okwefuukuula okw'enhandha eyo, n'entobo ey'omwiga Kiyira yaakala. Okwekuluntaza kw'Abasiria kuliisibwa ghansi, n'obuyinza bw'Abamisiri bwawaagho.

¹² Ndireetera abantu bange okuba ab'amaani. Era baligheesanga eriina lyange ekitiisa.” Musengwa Katonda atyo bw'akobye.