Zekaria 1 - Baibuli Ekibono kya Katonda 2014

Musengwa Katonda ayeta abantu baire y'ali

¹ Mu mwezi ogwomunaana, mu mwaka ogwokubiri nga Dario ni kyabazinga w'e Perusia, Musengwa Katonda yayogera ni Zekaria omulanzi, mutabane wa Berekia era nga mwidhukulu wa Iddo.

² Yaamukoba ati: “Nze Musengwa Katonda nasungughalira inho badhaadha baimwe.

³ Aye mperaano ndi kukoba abantu nti mwire ye ndi nze Musengwa Katonda Afuga Amagye, olwo zeena ndidha kwira ye muli.

⁴ Mutaba ng'oti ni badhaadha baimwe, abalanzi ab'eira be baakoberanga obukwenda bwange nze Musengwa Katonda Afuga Amagye. Abalanzi baakobanga badhaadha baimwe okuva mu mpisa dhaibwe embi ni mu bikolwa byaibwe ebibi. Aye badhaadha baimwe baaloba kuwulira nze Musengwa Katonda bye mbakoba, waire okufaayo okukola bye mbalagira.

⁵ Aye buti badhaadha baimwe abo bali gha? N'abalanzi abo babaagho nga balamu byanda na byanda?

⁶ Aye okulabula kwange n'ebiragiro byange, bye nabisa mu bagheereza bange abalanzi, byatuukirira ku badhaadha baimwe abo, baatuuka n'okwenenia. Baakoba bati, ‘Musengwa Katonda Afuga Amagye akoze nga bwe yasalagho, yaatubonereza olw'empisa dhaife embi n'olw'ebikolwa byaife ebibi nga bwe tugwaniire.’ ”

Omulanzi abonekerwa embalaasi

⁷ Lwali lunaku lwa makumi abiri na ina olw'omwezi ogweikumi n'omulala ogwetebwa Shebati, mu mwaka ogwokubiri nga Dario ni kyabazinga w'e Perusia. Musengwa Katonda yaayogera ninze Zekaria omulanzi, mutabane wa Berekia era mwidhukulu wa Iddo, mu kubonekerwa obwire.

⁸ Naabona malaika wa Musengwa Katonda ng'ali kuvuga embalaasi emyufu, ng'agyemereiza mu miti egy'ebisaka egyali mu kiiko. Einhuma we yaliyo embalaasi edhindi emyufu, n'edha kikuusikuusi, n'endheru.

⁹ Agho naamubuuza nti: “Musengwa, embalaasi edho dhitegeeza ki?” Malaika yandhiramu ati: “Ndidha ku kwoleka kye dhitegeeza.”

¹⁰ Kale malaika oyo eyali ayemereire mu miti egy'ebisaka, yandhiramu ati: “Edho, Musengwa Katonda n'eyadhituma okuja okukebera ensi.”

¹¹ Era dhaakobera malaika wa Musengwa Katonda oyo eyali ayemereire mu miti egy'ebisaka, dhiti: “Tumaze okukebera ensi, twabona ng'eri agho etyo.”

¹² Agho malaika oyo yaakoba ati: “Wo Musengwa Katonda Afuga Amagye, oligemerwa li ekisa Yerusalemu n'ebibuga eby'omu Buyudaaya, by'osungughaliire emyaka gino ensanvu?”

¹³ Musengwa Katonda yaamwiramu n'ekisa ng'amugumya.

¹⁴ Malaika oyo yankoba nangirire Musengwa Katonda Afuga Amagye bye yakoba ati: “Enkikidi engema inho olw'okugonza kwange okungi eri Yerusalemu ni Sioni.

¹⁵ Era nsungughaliire inho amaghanga agali mu miraala, kuba nze nasungughaliraku abantu bange akatono kati, aye amaghanga ago gaayongeranga bwongere kuleetera bantu bange abo kudaazibwadaazibwa.

¹⁶ Kale buti ndhize mu Yerusalemu n'okusaasira okungi. Eisinzizo lyange baja kwiramu okulizimba, ni Yerusalemu bakizimbe buyaaka.”

¹⁷ Malaika era yankoba okulangirira nti: “Musengwa Katonda Afuga Amagye akoba ati ebibuga bye biriiramu okuba obukalamu. Era akoba ati aliiramu okuyambanga Yerusalemu, yaakitwala ng'ekibuga ekikye ku bubwe.”

Okubonekerwa amayiga ag'ensolo

¹⁸ Kabiri naafuna okubonekerwa okundi, era okuja okulinga nti nga mbona amayiga ag'ensolo ana.

¹⁹ Naabuuza malaika eyali alikwogeranga ninze nti: “Amayiga ago gategeeza ki?” Yandhiramu ati: “Gategeeza amaghanga ag'obuyinza agaasansaania abantu ab'omu Buyudaaya, n'ab'omu Isiraeli, n'ab'omu Yerusalemu.”

²⁰ Agho Musengwa Katonda yandholeka abagheesi bana.

²¹ Nze naabuuza nti: “Abo baidhie kukola ki?” Yandhiramu ati: “Baidhie okudhugumiza n'okusaaniagho amaghanga ag'obuyinza agaatyankirira Buyudaaya, ni gasansaania abantu baamu.”