Zefania 3 - Baibuli Ekibono kya Katonda 2014

Okwonoona okw'abantu ab'omu Yerusalemu n'okununulwa kwaibwe

¹ Ekibuga Yerusalemu kikagwireku. Kiidhwire abantu abadheemu, n'aboonooni, n'abatuntuza banaibwe.

² Kizira muntu ye kiwulirisa era tikiganha kugololwa mu nsobi dhaakyo. Tikyesiga Musengwa Katonda, era tikisaba Katonda waakyo oyo akibeere.

³ Abakungu mu kibuga omwo bali oti mpologoma edhiwologoma. Abalamuzi baamu baaba ng'oti n'emisege egiyiiga eigulo nga giri ndhala inho, ni gitalekaagho kagumba kusigala kubonebwaku nga bukyeire.

⁴ Abalanzi baamu baawaamu ensa era ba nkwe. Bakabona baamu boonoona ebintu ebitukuvu, era baafuulaniafuulania amateeka bafune bye benda.

⁵ Aye Musengwa Katonda ali mu kibuga omwo, era akola bituufu byonka, takola kibi. Buli nkyo, aghazira kwosaamu, ayoleka ng'aziramu kwekubira. Aye abatenda kujiira ku mazima tibabaamu na nsoni, bongera kukola bibi.

⁶ Musengwa Katonda akoba ati: “Nzikiriiza amaghanga, naasaaniagho ebimante ebigumu ebyezungulwire ebibuga byago, n'ebituuti ebirengererwaku. Naazisa enguudo dh'omu bibuga ebyo nga ghazira adhibitamu ebibuga ebyo byawolongera nga ghazira muntu abibaamu.

⁷ Naadhuuba nti abantu bange banantya era baaganha okugololwa ensobi dhaibwe. Era naadhuuba nti tibaidha kwerabira ebyo byonabyona bye nababonerezaamu. Aye beeyongera bweyongere okukola ebikolwa ebibi.”

⁸ Musengwa Katonda akoba ati: “Kale ni muteegerere olunaku lwe ndyesimbagho okugha obudhulizi obulumiriza amaghanga ebibi bye gakola. Nsazeegho okusololeza aghalala amaghanga n'obwakyabazinga, mbamalireku ekiruyi kyange kyonakyona kuba obusungu bwange obuli ng'oti muliro, obuva ku nkikidi ye ndi nayo ku bantu bange, buja kuzikiriza ensi yoonayoona.

⁹ “Bwenebwene mu kiseera ekyo nja kukyusa abantu abamaghanga goonagoona basabenga nze zenka, era bampeerezenga n'omwoyo mulala.

¹⁰ N'abantu bange abaasansaanira eghala, eyo ng'osomoike emiiga egy'omu Ethiopia, baja kundeetera ebigheebwayo.

¹¹ Mu kiseera ekyo, imwe abantu bange timuja kugemwa nsoni kabiri olw'okudheema kwe mwandheemeranga. Nja kubatoolamu abo boonaboona abeekuluntaza mu imwe n'abo abeegulumiza. Era timuja kwirayo kundheemera ku lusozi lwange olutukuvu.

¹² Be ndirekagho mu imwe, n'abo abawombeefu n'abaavu abanaidhanga okunsaba okubeerwa.

¹³ Era abantu abo abaliwonagho mu Isiraeli tibalikola kisobu naire, tibalyogera bya buguya, oba okukozesa olulimi olubuzaabuza. Baidha kubanga bulungi nga bazira kye badhulirira, era nga ghazira kintu kyonakyona kibatiisa.”

Olwembo olw'eisanhu

¹⁴ Imwe Abaisiraeli, mwembe era mukube n'emizira. Imwe ab'e Yerusalemu, musangaale era musagambe n'omwoyo gwaimwe gwonagwona.

¹⁵ Musengwa Katonda atoiregho ekibonerezo kyaimwe, abinze abazigu baimwe boonaboona. Musengwa Katonda oyo kyabazinga wa Isiraeli ali mu imwe buti, ghazira kye mukaatya.

¹⁶ Mu kiseera ekyo, abantu baja kukoba ab'e Yerusalemu bati: “Sioni, otatya! Guma omwoyo!

¹⁷ Musengwa Katonda waimwe, ali mu imwe. Oyo n'omulwanirizi abagha obughanguzi. Ku lwaimwe aidha kusagambanga n'eisanhu era olw'okugonza kwe aidha kubagha obulamu obuyaaka. Aidha kwembanga okwoleka nga bw'abasangaaliire,

¹⁸ ng'ali masanhu meereere ng'oti n'omuntu ali ku mbaga.” Musengwa Katonda akoba ati: “Nja kutoolagho akabi ke neesoomera okubasindikira, era mbatooleku okuswazibwa.

¹⁹ Mu kiseera ekyo nja kubonereza abo ababatuntuza boonaboona; nja kuwonia abalema, era nsololeze ghalala abo abaatwalibwa mu bunhage. Okubairenga okuswala kwaibwe nja kukufuula kitiisa kyaibwe, era bamanhibwe ensi yoonayoona.

²⁰ Mu kiseera ekyo mwenamwena nja kubasololeza ghalala mbaize eka. Bwenebwene nja kubafuula bamanhifu era abasaakibwa mu nsi yoonayoona, era mbairizeegho ebirungi nga mwenamwena mubona.” Musengwa Katonda n'akobye.