Zefania 1 - Baibuli Ekibono kya Katonda 2014

¹ Buno n'obukwenda Musengwa Katonda bwe yatuma Zefania aje akobere abantu, mu biseera bya kyabazinga wa Buyudaaya eyayetebwanga Yosia, eyali mutabane wa Amoni. Zefania oyo yali mutabane wa Kushi, Kushi yali mutabane wa Gedalia, Gedalia yali mutabane wa Amaria, Amaria yali mutabane wa kyabazinga Hezekia.

Olunaku Musengwa Katonda lw'alisaliraku ensi omusango

² Musengwa Katonda yakoba ati: “Nja kuzikiriza ebintu byonabyona ebiri ku nsi:

³ abantu, n'ensolo, n'enhonhi, n'ebiba mu nhandha. Nja kuzikiriza aboonooni boonaboona, n'abantu boonaboona baaweegho ku nsi. Nze Musengwa Katonda ninze nkobye.

⁴ “Nja kubonereza abantu ab'omu Yerusalemu boonaboona n'abo ababa mu Buyudaaya mwonamwona. Era nja kuzikiriza abasinza omusambwa Baali boonaboona abakaasigairegho, n'amaina aga bakabona abamugheereza goonagoona geerabirirwe irala.

⁵ Nja kuzikiriza abo abaaniina ghaigulu ku ndhu okusinza ebintu eby'oku igulu, n'abo boonaboona abansinza nze Musengwa Katonda, kabiri ni bamala balayira omusambwa Moleki.

⁶ Era nja kuzikiriza abo boonaboona abatakaidha ye ndi waire okunsaba okubabeera.”

⁷ Musiriikirire aghali Musengwa Katonda, kuba olunaku lwe luli kumpi kutuuka. Musengwa Katonda ategeike okughaayo abantu be basalibwe ng'oti musengo, era amaze n'okweta abageni abaja okukola omukolo ogwo.

⁸ Musengwa Katonda akoba ati: “Nja kubonereza abakungu ba kyabazinga, n'ab'endhu ye, n'abo boonaboona abaagema empisa edh'abamaghanga agandi.

⁹ Ku lunaku olwo, nja kubonereza abo boonaboona abasinza mu nsinza ey'abamaghanga agandi, era ni baidhuza endhu ya musengwa waibwe omunhago gwe bafuna mu kwiba ni mu kutemula.”

¹⁰ Era Musengwa Katonda akoba ati: “Ku lunaku olwo, ghaja kubaagho okulira gha Mulyango ogwetebwa ogw'Ebyenhandha ogw'ekibuga Yerusalemu, era ghabeegho okuwowoola mu Kiketezo Ekiyaaka eky'ekibuga ekyo, era ghabeegho okugwa okw'amaani mu nsozi.

¹¹ Muwowoole inho imwe ababa mu kiketezo eky'eifo eky'ekibuga, kuba abasuubuzi baimwe boonaboona bawoiregho okufa.

¹² “Mu kiseera ekyo nja kutoola entaala nje nga ndhagaaza mu Yerusalemu mwonamwona. Nja kubonereza abantu boonaboona abali obulungi abazira kibeeraliikiriza, abakoba mule bati, ‘Musengwa Katonda ghazira ky'aidha kukola, ka kibe ekirungi oba ekibi.’

¹³ Eby'obukombe byaibwe bija kunhagibwa, n'endhu dhaibwe dhimenhebwegho. Waire bali kuzimba endhu, aye tibaja kudhisulamu. Waire bali kusimba amasamba ag'emizabbibu, aye tibaja kunhwa ku mwenge gwa mizabbibu guva mu masamba ago.”

¹⁴ Olunaku lwa Musengwa Katonda olukologho luli kumpi era luli kwangughaku inho. Olunaku olwo okuluwuliraku lwa bulumi, era luliza n'abasaadha abalwani ab'amaani!

¹⁵ Olunaku olwo luja kuba lwa busungu, lwa bizibu, lwa kuzikirira era lwa bulumi. Luja kuba lunaku lwa kuzikirira na kusaanagho. Luja kuba lunaku lwa kivumbi era lwa kazigizigi, olwidhwire ebire n'enzikiiza agemye bedimudimu.

¹⁶ Ku lunaku olwo amagwala agalaalika olutalo gaja kuvuga, okuleekaana okw'abalwani kuwulirwe nga balumbye ebibuga ebyezungulwirwa ebimante ebigumu, n'ebituuti byaku ebireeyiriri ebirengererwaku.

¹⁷ Musengwa Katonda akoba ati: “Nja kuleetera abantu ebizibu batuuke n'okutambula nga bamaamanta ng'oti batulu, kuba bakoze ebibi ebinsungughaza. Omusaayi gwaibwe guja kuyuyibwa ku itaka ng'oti maadhi, n'emirambo gyaibwe girekebwe agho ng'oti busa.”

¹⁸ Ku lunaku olwo Musengwa Katonda lw'aliragiraku obusungu bwe ezira kirisobola kubawonia, waire feeza ni zaabu waibwe yeenayeena. Obusungu bwe obuli ng'oti muliro, obuva ku nkikidi y'ali nayo ku lw'abantu be, buja kuzikiriza ensi yoonayoona. Aja kutuusa abantu boonaboona ababa ku nsi, ku nkomerero yaibwe eriba ya mangu inho ng'oti kutemya na kuzibula.