Zabbuli 98 - Baibuli Ekibono kya Katonda 2014

Tusaake Musengwa Katonda omughanguzi

¹ Mwenamwena mwembere Musengwa Katonda olwembo oluyaaka, kuba akoze ebyewuunhisa! Olw'obutukuvu bwe ayoleike ng'ali n'obuyinza n'amaani, ebimuleeteire obughanguzi.

² Musengwa Katonda amanhiisa ensi yoonayoona obughanguzi bwe, yaayoleka ensi dhoonadhoona obukumu bwe obuwonia.

³ Yakuuma ekisuubizo, kye yasuubiza endhu ya Isiraeli, eky'okubagonzanga obutalekera n'okubanga omwesigwa ye bali. Okuva ensi y'eva okutuuka y'ekanga, abantu boonaboona baabona obughanguzi bwa Katonda waife obulokola.

⁴ Abantu mwenamwena ab'oku nsi mukubire Musengwa Katonda emizira; mutimbuke mu mwembere enhembo edh'eisanhu edhisaaka!

⁵ Mwembe enhembo edhisaaka Musengwa Katonda, mumukubire enhembo ku ndingidi.

⁶ Mufuuwe amagwala n'endeka! Mukubire Musengwa Katonda emizira, oyo Kyabazinga waife.

⁷ Enhandha k'ewolome n'ebirimu byonabyona olw'eisanhu; n'ensi eyembe n'ebigiriku byonabyona.

⁸ Omwidhuzo gw'amaadhi ka gukube mu ngalo; n'ensozi dhembere ghalala n'eisanhu mu maiso ga Musengwa Katonda,

⁹ kuba ali kwidha okusalira ensi omusango mu butuufu. Aidha kufuga abantu boonaboona, ng'akolera ku mazima.