Zabbuli 97 - Baibuli Ekibono kya Katonda 2014

Katonda ni Kyabazinga afuga ebintu byonabyona

¹ Musengwa Katonda ni Kyabazinga, ensi yoonayoona k'esagambe, n'ebiketezo eby'oku nhandha eby'okumpi n'eghala bisangaale.

² Ali ghagati mu bire n'enzikiiza eri bedimudimu, afuga mu butuufu ng'akolera ku mazima.

³ Akulembezaamu omuliro, gwaja nga gwokyayokya abazigu be abamwezungulwire.

⁴ Olukuba lwe lumyansa lwamulisa ensi; ensi yaalubona yaatengeeta.

⁵ Ensozi dhisaanuuka ng'oti muzigo aghaba Musengwa Katonda, oyo Musengwa Katonda afuga ensi yoonayoona.

⁶ Eby'omu igulu birangirira nga bw'ali omutuufu, abantu b'ensi dhoonadhoona baabona ekitiisa kye.

⁷ Abo boonaboona abasinza ebitali Katonda, ni beesaaka olw'okwesiga ebifaananie obufaananie ebyo ebiziramu na muganhulo, baswazibwa; kuba ebyo byonabyona bimukubira amakiryaivu.

⁸ Ab'e Sioni bawulira era baasangaala, n'ab'omu bibuga bya Buyudaaya basagamba olw'ensala yo iwe Musengwa Katonda.

⁹ Wo Musengwa Katonda, niiwe oli ghaigulu yeene, ofuga ebintu byonabyona eby'oku nsi; oli mukologho okusinga bakatonda ab'amaghanga agandi boonaboona.

¹⁰ Musengwa Katonda agonza abo abakyagha ebibi; yaakuuma abantu be abamutya; era yaabatoola mu buyinza obw'ababi, yaabawonia.

¹¹ Obutangaavu bwakira abatuufu, n'eisanhu lyaidhira abo abagondera ebiragiro bya Katonda.

¹² Imwe abatuufu, musagambe olw'ebyo Musengwa Katonda by'akola era mumusiimenga.