Zabbuli 96 - Baibuli Ekibono kya Katonda 2014

Katonda ni Kyabazinga ow'ensi yoonayoona

¹ Mwenamwena mwembere Musengwa Katonda olwembo oluyaaka, ensi yoonayoona k'eyembere Musengwa Katonda.

² Mwembere Musengwa Katonda mumusaake, mukoberenga abantu buli kaakyeire nga bwe yatulokola.

³ Mumanhise ensi dhoonadhoona nga bw'ali ow'ekitiisa, abantu boonaboona bamanhe nga bw'akola eby'amaani.

⁴ Musengwa Katonda mukologho era ni yenka agwaine okusinzibwa. Oyo n'ali n'okutiibwa okusinga bakatonda ab'amaghanga agandi boonaboona;

⁵ kuba bakatonda boonaboona ab'amaghanga agandi, bintu buntu ebisinzibwa ebitali Katonda, aye Musengwa Katonda n'eyakola eigulu.

⁶ Aidhwire ekitiisa era mufuzi; mu kifo kye ekitukuvu mwidhwire ebyoleka nga wa maani era nga mulungi.

⁷ Imwe abantu ab'ensi dhoonadhoona mwatule Musengwa Katonda; mwatule Musengwa Katonda nga bw'ali ow'ekitiisa era ow'obukumu.

⁸ Mwatule eriina lya Musengwa Katonda nga bwe liri n'ekitiisa; mwidhe ku mpya dhe nga mumuleetera ebigheebwayo.

⁹ Musinze Musengwa Katonda ng'aboneike mu butukuvu bwe; imwe mwenamwena ab'oku nsi mumutye mu maiso ge.

¹⁰ Mukobere amaghanga goonagoona muti: “Musengwa Katonda ni Kyabazinga! Ensi kyeva n'eba engumu mu kifo kyayo, ni ghabula ekisobola okugiseseetula. Aja kusalira abantu omusango nga tasaliriza.”

¹¹ Eigulu ka lisangaale n'ensi esagambe, enhandha k'ewolome n'ebirimu byonabyona olw'eisanhu.

¹² Enimiro n'ebidhirimu byonabyona ka bisangaale, olwo emiti gyonagyona egy'omu kibira gyembe n'eisanhu,

¹³ byonabyona nga biri mu maiso ga Musengwa Katonda ali kwidha. Aidha kusalira ensi omusango mu butuufu, ni mu mazima nga tasaliriza.