Zabbuli 95 - Baibuli Ekibono kya Katonda 2014

Mumusaake n'obuwulize

¹ Mwenamwena mwidhe twembere Musengwa Katonda, mwidhe tumukubire emizira oyo omukuumi era omulokozi waife!

² Ka tuje y'ali tumusiime tumukubire emizira nga twemba n'enhembo edh'okumusaaka;

³ kuba Musengwa Katonda ni Katonda mwene omukologho, era ni Kyabazinga omukologho asinga bakatonda ab'amaghanga agandi.

⁴ Oyo n'afuga ebiiko ebiri ku nsi n'ensozi endeeyiriri dhoona dhidhe.

⁵ Enhandha yiye kuba n'eyagikola, n'obukalu n'eyabutaagho n'engalo dhe.

⁶ Mwidhe tumusinze nga twewombeese, tumukubire amakiryaivu oyo Musengwa Katonda, Omutonzi waife.

⁷ Oyo ni Katonda waife, ife tuli bantu be b'alabirira, era tuli ntaama dhe dh'ayaya. Kale ngoli ni olwaleero muwulira ky'akoba!

⁸ Akoba ati: “Mulekere agho okukalangusa emyoyo gyaimwe nga badhaadha baimwe bwe baakola nga bali e Meriba. Ku lunaku olwo nga bali e Massa mu irungu,

⁹ bandeba era bankemenkereza, waire nga baali bamaze okubona bye nabakolera.

¹⁰ Abantu abo baamala emyaka amakumi ana (40) nga banguuda ku mwoyo, bansina. Naakoba nti, ‘Abantu bano badheemu okuviira irala mu myoyo gyaibwe, era amateeka gange tibagajiiraku naire.’

¹¹ Kyenava ni ndayira mu busungu nti, ‘Tija kubaganha kutuuka ghe nali nja okubagheera okuwuumula.’ ”