Zabbuli 94 - Baibuli Ekibono kya Katonda 2014

Okusaba Katonda atasaliriza

¹ Wo Musengwa Katonda, niiwe Katonda abonereza nga weesasuuza, idha oyoleke obusungu bwo.

² Situkiramu, niiwe asalira ensi emisango, abo abeebona nga ba ghaigulu obasasule ekyo ekibagwaniire.

³ Wo Musengwa Katonda, ababi balituusa li, bwenebwene balituusa li okweyagala?

⁴ Ababi boonaboona beesaaka olw'ebikolwa byaibwe ebibi bye bakola.

⁵ Banhigiriza abantu bo, baadaazadaaza eighanga lyo lye weerondera.

⁶ Baita banamwandu ni bamulekwa, era baatemula abasenze be tusenza mu nsi yaife.

⁷ Bakoba mule bati: “Musengwa Katonda tatubona. Katonda wa Yakobo tafaayo.”

⁸ Mulitegeera li imwe abadoofu abasembayo? Mulibaamuuku li ku magezi imwe abasiru?

⁹ Katonda oyo eyakola kutu asobola atya obutawulira? Oyo eyatonda eriiso aghanga atya obutabona?

¹⁰ Oyo akangaivula amaghanga agandi, taababonereze? Oyo ayegeresa abantu okumanha, asobola atya obutamanha?

¹¹ Musengwa Katonda aidhi ebidhuubo eby'abantu, era aidhi nga tibigasa.

¹² Wo Musengwa Katonda, nga wa nkabi omuntu y'okangaivula, oyo y'oyegeresa amateeka go.

¹³ Iwe omugha okuwuumulaku ebizibu, okutuusa lw'obonereza ababi.

¹⁴ Musengwa Katonda taja kusuulirira bantu be; taja kulekulira agho ighanga lye yeerondera.

¹⁵ Balisalanga emisango mu butuufu, abo abatya Katonda baajiiranga ku bisaliibwagho.

¹⁶ Naani eyambeeraku ng'ababi abo bantanwireku olutalo? Oba naani eyayemerera ku luuyi lwange ng'abakozi b'ebibi baanumbye?

¹⁷ Ngoli Musengwa Katonda tiyandhuna, ngoli nze naja ira mu nsi ey'abafu.

¹⁸ Bwe nayana nti: “Ndi kutyerera,” iwe Musengwa Katonda wangemerera olw'okuba ongonza obutalekera.

¹⁹ Buli lwemba n'ebineeraliikiriza, ongumya wandeetera okusangaala.

²⁰ Iwe tosobola kuba ku luuyi lwa bafuzi babi, abafuulania amateeka, ekibi ni bakyeta ekirungi.

²¹ Beeteesa okulumba abantu abalungi, baasalira abantu ogw'okufa abaziraku musango.

²² Aye nze, Musengwa Katonda n'obulumukiro bwange, era ni Katonda wange ambudamya mu biseera ebizibu.

²³ Abo aidha kubabonereza olw'obubi bwaibwe, era aidha kubazikiriza olw'okwonoona kwaibwe; bwenebwene Musengwa Katonda aja kubasaaniagho.