Zabbuli 92 - Baibuli Ekibono kya Katonda 2014

Olwembo olw'okusaaka Katonda

¹ Kigwaine okukusiima by'okola, iwe Musengwa Katonda! Kigwaine okwemba enhembo edhisaaka eriina lyo, iwe Ali Ghaigulu Yeene!

² Era kigwaine buli nkyo okukoberanga abantu nga bw'obagonza obutalekera, na buli igulo okubamanhisanga nga bw'oli omwesigwa;

³ eno nga bwe tukuuta endingidi era nga bwetusuna ebivuga eby'enkosi ebindi.

⁴ Wo Musengwa Katonda, nasangaala inho olw'ebyo eby'amaani bye wakola; naayemba n'eisanhu olw'ebyo bye wakola n'engalo dho.

⁵ Wo Musengwa Katonda, by'okola byewuninkiriza! Ebidhuubo byo biswikiriire inho okutegeera okw'omuntu!

⁶ Omudoofu tasobola kumanha kino, n'omusiru taghanga kukitegeera,

⁷ ati waire ababi bamera ng'oti isubi, abakozi b'ebibi kiisi kye bakola ni kibalamira, baategekerwa kuzikirira okw'olubeerera.

⁸ Aye iwe Musengwa Katonda niiwe ofuga ebintu byonabyona ebyanda n'ebyanda.

⁹ Wo Musengwa Katonda, ife twidhi ng'abazigu bo baja kuzikirira, abakozi b'ebibi boonaboona baja kusasika.

¹⁰ Aye nze ompaire amaani ng'oti ga mbogo nume, wansiiga omuzigo.

¹¹ Mboine n'amaiso gange okugwa okw'abazigu bange, era naawulira n'amatu gange okulira okw'ababi abo abaanumbagana.

¹² Abatuufu baja kweyongeranga okuba obulungi ng'oti n'omuti omunaazi, era bakule ng'oti n'emivule egy'e Lebanoni.

¹³ Bali ng'oti n'emiti egyasimbwa mu ndhu ya Musengwa Katonda, era bakula bukalamu mu isinzizo lya Katonda waife.

¹⁴ Waire bakaire aye bakaabala ebibala, era bakaali bagimu ababoneka obukalamu.

¹⁵ Kino kyoleka nga Musengwa Katonda bw'aziramu kwekubira, oyo n'ankuuma, era aziramu bukyamu bwonabwona.