Zabbuli 91 - Baibuli Ekibono kya Katonda 2014

Katonda akuuma abo abamwesiga

¹ Omuntu asula mu ndhu y'oyo Ali Ghaigulu Yeene, n'akuumibwa oyo Aghanga Ebintu Byonabyona,

² alikoba Musengwa Katonda ati: “Niiwe onkuuma, niiwe ekifo kyange oky'okwewogomamu. Niiwe Katonda wange ye neesiga.”

³ Katonda aidha kukuwonianga emitego gye bakutega, era akuwonienga n'endwaire edhiita.

⁴ Aidha kukughembaku n'amaghagha ge ghabulenga ekikutuukaku, akukuumenga olw'obwesigwa bwe ng'akulwanirira.

⁵ Ghazira kinaakutiisanga obwire, waire ebizibu okukutiisa omusana.

⁶ Olumbe olukunkuna mu nzikiiza tiruukutiisenga, waire namuzisa okukwita omusana.

⁷ Abantu olukumi basobola okwitibwa baagwa ku luuyi lwo olundi, ate omutwalo baagwa ku mukono gwo omusaadha, aye iwe akabi tikalikutuukaku.

⁸ Iwe olitaagho bwa maiso, waabona abakozi b'ebibi nga bwebabonerezebwa.

⁹ Olw'okuba iwe weesize Musengwa Katonda, era waatwala oyo Ali Ghaigulu Yeene okuba omukuumi wo,

¹⁰ ghazira kibi kija kukutuukaku, waire ekiinoino kyonakyona okuseeta okumpi n'endhu yo;

¹¹ kuba aliragira bamalaika be baakulabirira, nga baakukuuma buli gh'oja.

¹² Balikulera mu ngalo dhaibwe olobe kwekonta kigere ku ibaale.

¹³ Olibita ghagati mu nsolo enkambwe, era waaniinirira emisota egy'obusagwa.

¹⁴ Kuba Katonda akoba ati: “Ndidha kumutoola aghazibu olw'okuba angonza inho, era ndidha kumukuumanga olw'okuba ayatula eriina lyange, yaalisaaka.

¹⁵ Bw'anandhetanga ndidha kumuvugiranga; ndidha kubanga ghalala naye mu buli kizibu. Mmuwonienga ebimunhigiriza, era mmugheesenga ekitiisa.

¹⁶ Ndidha kumughangaaza inho era mmulokole.”