Zabbuli 90 - Baibuli Ekibono kya Katonda 2014

Ekitabo ekyokuna Zab 90—106 Abantu banafu aye Katonda wa maani

¹ Wo Musengwa Katonda, okuva eira n'eira niiwe otukuuma.

² Ng'ensozi dhikaali kubaagho, era ng'okaali kutonda nsi n'ebirimu byonabyona, niiwe Katonda eyaligho, era alibaagho ebyanda n'ebyanda.

³ Iwe oizaayo omuntu mu nkungu mwe yakolebwa, ng'olagira oti: “Omwana w'omuntu irayo ye wava.”

⁴ Emyaka olukumi y'oli giri ng'oti n'olwaidho olwabise; oba ng'oti n'esaawa entono dhiti edhiwaaku amangu mu biseera eby'obwire.

⁵ Osaaniagho obulamu bw'abantu, baabulagho mangu ng'oti kirooto; oba ng'oti n'eisubi erinhirira ku nkyo:

⁶ ku nkyo lisituka lyaboneka bukalamu, aye eigulo lyaniala lyafa.

⁷ Iwe bw'osungughala, obusungu bwo butuzikiriza; ekiruyi kyo kyatutiisa twawaamu.

⁸ Iwe obona ebibi byaife, ni bwebiba ebyo bye tukola mu ngiso.

⁹ Obusungu bwo busala ku nnaku edh'obulamu bwaife; obulamu bwaife bwawaagho mangu geene.

¹⁰ Emyaka gyaife egy'obughangaazi giri nsanvu, oba kinaana, bwe tuba abagumu. Aye ng'ate giidhwire okufaabiikana n'ebizibu kamaala, era giwaaku mangu twabulagho.

¹¹ Naani aidhi amaani g'obusungu bwo kye gasobola okukola? Era naani ategeera obusungu bwo nga bwe butiisa?

¹² Tukusaba otwegerese okumanha obulamu bwaife nga bwe buli obumpi, tusobole okufuna amagezi.

¹³ Wo Musengwa Katonda, oja kusungughala kutuusa li? Twiriremu ife abagheereza bo otusaasire.

¹⁴ Twidhuzenga okugonza kwo okutakoma buli nkyo, olwo tusobole okusagambanga nga tuli basangaavu obulamu bwaife bwonabwona.

¹⁵ Tughe okusanhuka einho tusobole okwesasuuza olw'enaku kamaala dhe watulumya, n'olw'emyaka kamaala gye twabeera mu bizibu.

¹⁶ Yoleka abagheereza bo eby'amaani by'okola; oyoleke n'abaidhukulu baibwe obukumu bwo obw'ekitiisa.

¹⁷ Wo Musengwa Katonda waife, tukusaba enkabi dho dhibenga n'ife, kiisi kye tugemaku kitujiirenga bukalamu bwenebwene ghabule ekitulema.