Zabbuli 9 - Baibuli Ekibono kya Katonda 2014

Okusiima Katonda olw'obutuufu bwe

¹ Neeyanza Musengwa Katonda n'omwoyo gwange gwonagwona, era ndidha kwogeranga ku by'okola ebyewuninkiriza.

² Ndidha kusangaala era nsagambire mu iwe; ndidha kwembanga nga nkusaaka, iwe Ali Ghaigulu Yeene.

³ Bw'obonekaku abazigu bange bakyusa baalumuka, baagangalima baafa.

⁴ Iwe olw'obutukuvu bwo osaze omusango waayoleka nga bwendi omutuufu.

⁵ Abatatya Katonda obasaliire omusango gwabasinga, waazikiriza abakozi b'ebibi. Ghazira aja kubaidhukira naire ebyanda n'ebyanda.

⁶ Abazigu bawoiregho ebyanda n'ebyanda, ebibuga byaibwe wabizikiriza, era tibaja kwidhukirwa naire.

⁷ Aye Musengwa Katonda aba kyabazinga ebyanda n'ebyanda, atyama ku kityamo kye eky'obwakyabazinga kye yataagho okusaliraku omusango.

⁸ Asalira ensi omusango mu butuufu, era asalira abantu omusango nga tasaliriza.

⁹ Musengwa Katonda n'obulumukiro bw'abo abazira bwogerero, era n'obubudamo mu biseera ebizibu.

¹⁰ Abo abakwidhi, obwesige bwaibwe babuta mu iwe, kuba Musengwa Katonda tiweerabira abo abatakabana okwidha y'oli.

¹¹ Mwembe enhembo edhisaaka Musengwa Katonda atyama mu Sioni; mukobere abamaghanga goonagoona ebyo by'akola.

¹² Musengwa Katonda afaayo inho ku abo abadaazibwadaazibwa, era tasiriikirira kulira kwaibwe. Yeesasuuza olw'omusaayi gwaibwe ng'abonereza abo ababaita.

¹³ Wo Musengwa Katonda, nkusaba ondhune! Bona bwe ndaazibwadaazibwa abazigu! Ntoola mu ngalo dha walumbe

¹⁴ nsobole okwemerera mu maiso g'abantu ab'e Yerusalemu, mbakobere byonabyona ebindeetera okukusaaka. Ndidha kusagamba olw'okundokola.

¹⁵ Abatatya Katonda baagwa mu biina bye baasima okutega abantu abandi era baagwa mu ntuula beene dhe baatega.

¹⁶ Musengwa Katonda yeeyoleike ng'asala omusango mu butuufu, era abakozi b'ebibi beetegamu beene n'ebikolwa byaibwe byene.

¹⁷ Abakozi b'ebibi, n'abo boonaboona abava ku Katonda, ba kuja magombe.

¹⁸ Abanaku tibaja kwerabirwanga buliidho, waire abaavu okuweeramu irala eisuubi ebyanda n'ebyanda.

¹⁹ Wo Musengwa Katonda, idha! Otaganha bantu kukunhooma! Abatatya Katonda boonaboona baleete gh'oli, obasalire omusango.

²⁰ Wo Musengwa Katonda, baleetere okutya, bategeere nga bantu buntu.