Zabbuli 89 - Baibuli Ekibono kya Katonda 2014

Olwembo mu biseera ebizibu

¹ Wo Musengwa Katonda, ndidha kwembanga okugonza kwo okutakoma ebyanda n'ebyanda era ndidha kukoberanga abantu ab'ense n'ense nga bw'oli omwesigwa.

² Okugonza kwo kwa kubaagho byanda na byanda, n'obwesigwa bwo bugumu begulugulu ng'oti igulu.

³ Wakoba oti: “Nakola endagaano ni Daudi ye neerondera; era naasuubiza omugheereza wange oyo nti,

⁴ ‘Baidhukulu bo n'abaja okutyamanga mu kityamo kyo nga bakyabazinga, era ni bonkabonka abanaafuganga ebyanda n'ebyanda.’ ”

⁵ Wo Musengwa Katonda, eby'omu igulu byonabyona ka bikusaake olw'ebyewuunhio by'okola; n'abatukuvu abatyama mu igulu ka bembe obwesigwa bwo,

⁶ kuba bwene naani ku bali ghaigulu eyo ayaga ni Musengwa Katonda? Oba naani ku bali mu igulu ali ng'oti ni Musengwa Katonda?

⁷ Niiwe Katonda atiibwa abatukuvu boonaboona abatyama mu igulu; era omukologho atiisa ebyo byonabyona ebimwezungulwire.

⁸ Wo Musengwa Katonda Afuga Amagye, naani ow'amaani ng'oti niiwe? Oli mwesigwa mu buli kintu.

⁹ Niiwe ofuga okwefuukuula okw'enhandha, era bwe yeefuukuula ogiragira yaalaala.

¹⁰ Watentena ogusota gu Rahabu waagwita; waabinga abazigu bo n'omukono gwo ogw'amaani, baasansaana.

¹¹ Eigulu liryo, n'ensi yiyo n'ebigirimu byonabyona, niiwe owabikola.

¹² Niiwe owatonda ebiri ku luuyi olw'omukono omugooda olw'e buvandhuba, n'ebiri ku luuyi olw'omukono omusaadha olw'e buvandhuba. Ensozi Tabori ni Herimoni dhisaaka eriina lyo n'eisanhu.

¹³ Oli wa buyinza bungi, oli wa maani inho atatuukikaku.

¹⁴ Obwakyabazinga bwo bujiira ku kukola ebituufu n'okukola amazima; okugonza kwo okutakoma n'obwesigwa bwo byeyolekera mu buli ky'okola.

¹⁵ Wo Musengwa Katonda, nga ba nkabi abo abakukubira emizira, ni batambula nga bagonzi y'oli.

¹⁶ Ni basagamba olw'eriina lyo olunaku lwonalwona, nga bakusaaka ebitaloodheka olw'obutuufu bwo.

¹⁷ Kuba niiwe otugha obughanguzi obutaloodheka; era olw'okutugonza waatugha okusagamba ng'abaghanguzi.

¹⁸ Iwe Musengwa Katonda watulondera atukuuma ng'oti ngabo; iwe Omutukuvu wa Isiraeli waatugha kyabazinga owaife.

¹⁹ Wabonekera abagheereza bo abeesigwa mu biseera eby'eira, waabakoba oti: “Ntaire omukono gwange ku mulwani ow'amaani okumubeera; ngulumiiza oyo ye nalonda mu bantu.

²⁰ Ntoire omugheereza wange Daudi naamufuula kyabazinga, nga mmusiiga omuzigo gwange omutukuvu.

²¹ Ndidha kumughanga amaani gange buliidho; obuyinza bwange bwidha kumufuulanga ow'amaani.

²² Abazigu be tibaja kumusinza magezi; ababi tibaja kumughangula.

²³ Nja kusaaniagho abazigu be ng'abona, ndhite n'abo boonaboona abamukyagha.

²⁴ Ndidha kubanga mwesigwa y'ali era mmugonzenga obutalekera. Ndidha kumugha okusagambanga ng'omughanguzi.

²⁵ Obwakyabazinga bwe ndibugaziya okuva ku Nhandha Eyaghagati okutuuka ku mwiga Eufurate.

²⁶ Daudi oyo aidha kundhetanga ati, ‘Niiwe Lata era niiwe Katonda wange; niiwe onkuuma era niiwe ondokola.’

²⁷ Ndimufuula mutabane wange omuberi, kyabazinga omukologho asinga bakyabazinga boonaboona ab'oku nsi.

²⁸ Ndidha kumugonzanga obutalekera ebyanda n'ebyanda, n'endagaano yange naye eja kubangagho byanda na byanda.

²⁹ Obwakyabazinga bwe ndidha kubufuula bwa nsikirano ebyanda n'ebyanda; buja kubaagho ekiseera kyonakyona eigulu kye lirimala nga lirigho.

³⁰ Aye baidhukulu be bwebanaalekangayo okuwulira amateeka gange, ni batajiira ku bye mbalagira,

³¹ ni badobania bye mbeegeresa, era ni batakuuma biragiro byange,

³² ndibabonereza olw'okwonoona kwaibwe, naabaleetera okudaagadaaga olw'ebibi byaibwe.

³³ Aye tirilekera kumugonza oba okulekera okuba omwesigwa y'ali.

³⁴ Tirimenha ndagaano yange naye, waire okukyusaamu ku bye namusuubiza.

³⁵ Mu butukuvu bwange neeyamye omukuzi mulala guti nga gumala: tija kusubagha Daudi naire.

³⁶ Olulyo lwe luja kubangagho ebyanda n'ebyanda, n'obwakyabazinga bwe bubeegho okutuusa endhuba bw'eriva ku nsi.

³⁷ Tibuja kuvaagho ng'oti n'omwezi bwe gutavaagho, era buja kuguma begulugulu ng'oti n'eigulu bwe liri.”

³⁸ Aye kabiri mpegaano iwe Musengwa Katonda oswire ere omuntu ye wasiiga omuzigo era tokaamulaadha; oidhwire ekiruyi ku muntu ye walonda.

³⁹ Osaziizaamu endagaano yo n'omugheereza wo, n'engule ye waagifuuta mu itaka.

⁴⁰ Owomoirewomoire ebituli mu bimante bye, waamenhamenha ebifo bye eby'okwewogomamu.

⁴¹ Buti ababise boonaboona bamumazeeku ebibye nga babinhaga; ab'oku muliinaano baamusekerera.

⁴² Oghaire abazigu be obughanguzi; waaleetera abazigu be boonaboona okusagamba.

⁴³ Eby'okulwanisa bye obiitaitaine, waamuleka baamughangula mu lutalo.

⁴⁴ Omutoire mu ngalo omwigo gwe ogw'obufuzi, n'ekityamo kye eky'obwakyabazinga waakisuula ku itaka.

⁴⁵ Omuleeteire okukairigha ng'akaali muto, waamuleetera okuswala einho.

⁴⁶ Wo Musengwa Katonda, oja kwegisa kutuusa li? Byanda na byanda? Ekiruyi kyo kija kulekera li okwaka ng'oti muliro?

⁴⁷ Wo Musengwa Katonda, idhukira obulamu bwange nga bwe buli obumpi! Obulamu obw'abantu boonaboona muzira muganhulo!

⁴⁸ Muntu ki asobola okuba omulamu n'atafa? Naani aghanga okwekuuma n'ataja mu magombe?

⁴⁹ Musengwa Katonda, okugonza kwo okutakoma okw'eira kwalaga gha? Ebyo bye wasuubiza Daudi byaja gha?

⁵⁰ Wo Musengwa Katonda, bona nze omugheereza wo bwendhuuluusiibwa, abantu ni banvuma ebitakobeka.

⁵¹ Wo Musengwa Katonda, abazigu bo batyo bwe bavuma oyo ye wasiiga omuzigo, batyo bwe bamuvuma buli gh'aniina ekigere.

⁵² Musengwa Katonda asaakibwenga ebyanda n'ebyanda! Amiina era Amiina!