Zabbuli 86 - Baibuli Ekibono kya Katonda 2014

Okusaba okw'omuntu ali n'abazigu

¹ Wo Musengwa Katonda, ntegera kutu owulire okusaba kwange, kuba ndi muntu mughafu era mwavu.

² Kuuma obulamu bwange, kuba nkutya; era omponie ebizibu nze omugheereza wo akwesiga. Niiwe Katonda wange.

³ Wo Musengwa Katonda, nkusaba ondhune kuba niiwe ye ndirira omusana n'obwire.

⁴ Nze omugheereza wo mpa okuba omusangaavu, kuba niiwe ye nsinza.

⁵ Wo Musengwa Katonda iwe oli mulungi, onsonigha era tolekera kugonza abo abakusinza.

⁶ Wo Musengwa Katonda, ntegera kutu nga nkusaba; owulire okulira kwange nga nkweghemba okumbeera.

⁷ Bwemba mu bizibu nkusaba, kuba iwe oiramu okusaba kwange.

⁸ Mu bakatonda ab'amaghanga agandi boonaboona ghazira ali ng'oti niiwe, era ghazira akola biri ng'oti n'ebibyo by'okola.

⁹ Amaghanga goonagoona ge watonda, gaja kwidha gakukubire amakiryaivu, era gaatule ng'eriina lyo bwe liri ery'ekitiisa.

¹⁰ Iwe oli mukologho, ni by'okola byewuunhisa; niiwe Katonda wenka.

¹¹ Wo Musengwa Katonda, ngalagira bwembe neebise, memale olwo ntambulirenga mu mazima go; era ondhegerese okukutyanga n'omwoyo mulala.

¹² Wo Musengwa Katonda wange, nsiima inho n'omwoyo gwange gwonagwona by'onkolera, era ndidha kughanga eriina lyo ekitiisa ebyanda n'ebyanda.

¹³ Kuba ongonza inho obutalekera era wamponia okwikirira e magombe.

¹⁴ Wo Katonda wange, abantu abeekuluntaza baneesimbyemu; ekikuukuulu ky'abantu abakambwe kyenda kundhita, era abantu abo tibakufaaku naire.

¹⁵ Aye iwe Musengwa Katonda, niiwe Katonda asaasira era agemerwa abantu ekivunika, olwagho okusungughala, ogonza abantu obutalekera era oli mwesigwa inho.

¹⁶ Otankuba nkoone aye idha ondhune, ompe ku maani go nze omugheereza wo, era ondokole nze omwana w'omwiru wo omukazi.

¹⁷ Nkolera ekinaayoleka nga bw'ongonza, olwo abo abankyagha baswale, okubona nga iwe Musengwa Katonda onhambye wandhizaamu amaani.