Zabbuli 85 - Baibuli Ekibono kya Katonda 2014

Okusabira ensi eiremu okuba emiraala

¹ Wo Musengwa Katonda, wagonza inho ensi yo wairiza Yakobo obukombe.

² Wasonigha abantu bo ebibi byaibwe, waabasaasira olw'okwonoona kwaibwe.

³ Walekera okubabaaku ekiruyi, waalekera okubasungughalira n'obusungu obungi.

⁴ Wo Katonda iwe omulokozi waife, iramu okutugonza olekere agho okutusungughalira.

⁵ Mbo bwene oja kutusungughalira byanda na byanda, obusungu bwo bugeme ni ku nse edhiriiragho?

⁶ Totwizeemu maani buyaaka, ife abantu bo tusagambenga olw'ebyo by'otukolera?

⁷ Wo Musengwa Katonda, twoleke nga bw'otugonza obutalekera, era otuzaawule.

⁸ Leka mpulire Musengwa Katonda ky'aja okukoba, kuba ndidhi aja kwogera ebituleetera emiraala ife abantu be abamutya, kasita tuba nga titwizeeyo mu bya kisiru.

⁹ Mu butuufu bwene mwetegefu okulokola abo abamugha ekitiisa, olwo ekitiisa kye kibe nga kibonebwa mu nsi yaife.

¹⁰ Okugonza okutakoma kwidha kwagaanana n'obwesigwa; ate obutuufu bunhwegeragane n'emiraala.

¹¹ Okwikiriza kwa Isiraeli kuja kusituka okuva mu nsi, ate obutukuvu bwa Katonda bulingirire ensi nga buli mu igulu.

¹² Bwenebwene Musengwa Katonda aidha kutugha ebirungi, ensi yaife ebale ebibala kyodo.

¹³ Obutuufu bwa Musengwa Katonda bumukulemberamu, bwaja nga bukubira ebigere bye engira.