Zabbuli 84 - Baibuli Ekibono kya Katonda 2014

Olwembo olw'okusaaka endhu ya Katonda

¹ Wo Musengwa Katonda iwe Afuga Amagye, eisinzizo lyo nga irungi!

² Neegomba inho okuba mu isinzizo lya Musengwa Katonda! Zeenazeena ndidhwire eisanhu, nga nhembera Katonda omulamu.

³ Wo Musengwa Katonda iwe Afuga Amagye, mbo n'enkazaluya dhoona dhifuna agh'okusula, n'obumiini bwona bwezimbira ebisu mwe bukuumira obwana bwabwo agho okumpi ni alutaari dho, iwe Kyabazinga wange era Katonda wange.

⁴ Ba nkabi abo ababa mu ndhu yo, nga buli kaakyeire bemba enhembo edhikusaaka.

⁵ Ba nkabi abo abafuna amaani okuva y'eiwe, era ng'olugendo olw'okuja e Sioni lubali ku mwoyo.

⁶ Bwe babita mu kiiko eky'e Baka, kifuukamu enhindo edhivaamu emiiga, amaadhi agasookereza okugwa gakiidhuza ebidiba.

⁷ Bwe batambula baja nga bwe beeyongera okufuna amaani; balibona Katonda asinga bakatonda mu Sioni.

⁸ Wo Musengwa Katonda Afuga Amagye, wulirisa okusaba kwange. Ntegera kutu iwe Katonda wa Yakobo.

⁹ Wo Katonda, gha kyabazinga enkabi oyo atulwanirira, saasira oyo ye wasiiga omuzigo.

¹⁰ Okumala olunaku olulala mu isinzizo lyo, kusinga okumala enaku olukumi aghantu aghandi woonawoona. Mmala gaba mukuumi ku mulyango gw'endhu ya Katonda wange, ntabaire munda mwa ndhu dha bakozi ba bibi;

¹¹ kuba Musengwa Katonda oyo n'endhuba etumuliikirira ye tuja era n'atuwonia ng'oti ngabo. Atusaasira era yaatugha ekitiisa. Abo abakola by'ayenda ghazira kirungi ky'abaima.

¹² Wo Musengwa Katonda Afuga Amagye, nga beesiimye abakwesiga.