Zabbuli 83 - Baibuli Ekibono kya Katonda 2014

Okusaba okw'ensi abazigu ye beesoomeire okulumba

¹ Wo Katonda, otasirika busirike, waire okuba obwagho nga toli kufaayo.

² Bona, abazigu bo bali kwegugunga; abo abakukyagha bali kudheema.

³ Bakola entegeka edh'okulumba abantu bo; era beeteesa bwe banaalumba abantu bo b'okuuma.

⁴ Bakoba bati: “Ka tumalegho eighanga lya Isiraeli, ghabule aidhukira nga ghaalighooku eighanga eryetebwa Isiraeli.”

⁵ Bwenebwene beekobaana eky'okudheema, era beeyimba baakola endagaano ey'okukwesonsaaku.

⁶ Abazigu abo ni bano: Abaedomu, Abaishimaeli, Abamoabu, Abahagari,

⁷ Abagebali, Abammoni, Abamaleki, Abafilisiti n'Abatiro.

⁸ N'Abassiria boona baabeeyimbyeku, bayambe abasaadha ab'amaani baidhukulu ba Loti.

⁹ Aye iwe bakole kye wakola Abamidia, era kye wakola Sisera ni Yabini ku mwiga Kishoni,

¹⁰ abaitirwa mu kibuga Endori, ni baba agho ku itaka ng'oti mmungo ya busa.

¹¹ Abafuzi baibwe bakole nga bwe wakola Orebu ni Zeebu, n'abakungu baibwe obakole nga bwe wakola Zeba ni Zalumunna.

¹² Abo n'abaakoba bati: “Ka twetwalire eitaka lya Katonda libe lyaife ku bwaife.”

¹³ Wo Katonda wange, bafuule ng'oti n'enkungu eri kwezungululira mu mpewo ey'amaani, babe ng'oti n'omusinsi empewo gw'efuuwa ere.

¹⁴ Ng'oluyiira bwerusenkeenha ekibira, n'enimi edh'omuliro ni dhikoleeza ensozi,

¹⁵ weena otyo bw'obe obabingirire n'amaadhi agalimu kiwunga ow'amaani, obatiikize irala n'empewo ere yeene ezikiriza.

¹⁶ Baswaze ebitoogerekeka, balwe eira baire y'oli iwe Musengwa Katonda.

¹⁷ Ensoni ka dhibagemenga era basoberwenga ebyanda n'ebyanda; bafe nga banhoomebwa.

¹⁸ Ka bamanhe nga iwe wenka niiwe Musengwa Katonda, era nga niiwe oyo Ali Ghaigulu Yeene asinga ebintu byonabyona eby'oku nsi.